Read Chang Naga ROM 7 Bible Online

ROM 7 - Chang Naga bible

ROM 7

¹Jaisinasi shuong, müt che lang ki shongko ngühkhüm kho hao thüka kia dogo kanei maisho ngekei (aieilausi ngei ho ngühkhüm ngebü to lauda).

²Laolamla haubü yaksa che kho lao lang ki shongko hao to phenyoakei; lausikei lao kho haisije sao kho chemkan ngühkhüm ka satenakei.

³Hibü saoei tokei lao lang kian müt at to phenyobü kialonga sao kho asangalannyu dogo nyenlabü; lausikei lao haisije sao kho ngühkhüm ka satenakei, hibü sao kho lubü jungto hausikei sao kho asangalannyu aying.

⁴Küjai künasi shuong, kan shangakei jetei ong. Kan Khristaeibü manga phejan chela yeia hoba sen Mühghaü junga lejim kitila shanga haibü ka langngaibou cheeibü la yeitila shanga kan che Ngühkhüma haikukei.

⁵Sen ladang kaodak hangeilamei leibü aenei ki, Ngühkhümei longtibü seneibü shabü dühbüei ponpendou akongko sen to kümbeileikei, hoba loushedbü kho haibü kiteikei.

⁶Lausikei tou sen hatlepbou khühbü la che haikukei hoba tou Ngühkhüm ka satenakei; touje senei hangbü dobü ngühkhüma aying lausikei haanbü soushou langkeia khangenda.

⁷Khülonga senei ai laula? Ngühkhüm si shabü jetei hoba che ong sai? Khei aying! Ngei lenda, ngühkhümei aying tegüje shabü kho ai yingkeije tengekhoulabü. Ngühkhümei “Nyi tedüh” dogo alen tegüje dühbü kho ai yingkeije ngei tengekhoulabü.

⁸Kho ngühkhümei shabü la kaokuok kukei hoba kü to phang pendou dühbü longtikei. Ho Ngühkhüm hangshong aying tegüje shabü kho maimaitham haibü yingkhoulabü!

⁹Kü langkeia ngühkhüm shanga angebü jih che kiteikei; lausikei ngei ladang ka jaüan ngühkhüm ngekei, shabü kho longche danga longeikei,

¹⁰hoba ngo haikei. Kü la langkei sungbalabü ngühkhümei ngo haito jantikei.

¹¹Aishanga shabüei ngühkhüma younak lambei. Hoei khüpettikei hoba ngo ngühkhüm danko haitikei.

¹²Hibü Ngühkhüm kho saopobü hoba sakkubü khokei saopobü, ngühmaang hoba maibü ki.

¹³Khülonga kü la haibü sungbabü aoa ngei maibü shanga aiche tetlabü ki sai? Kheikei aying. Tükdebü kho ho, shabü kho shabü tegü chühentila shanga, ngeibü maibü kho kü la haibü sungbabüa jungeikei — laulabüei, haoeibü akhühlepenbü shabü shangshentila shanga shabüei ngühkhüm kho jungeikei.

¹⁴Ngühkhüm kho Mühghaüei kukei dogo senei ngekei; lausikei ngo shabü aao che tegü yakkubü müt che ong ki.

¹⁵Ngei ngeibü jembü kümsilei aditenda, aishanga ngei ai kümmang sühda kho ngei akümda; lausikei khüpeinyu ngei ai mangsenda kho ngei kümda.

¹⁶Ngei kümmang asühbü kümbü khoei ongkei ngühkhüm khoje maiakei dogo lenenda.

¹⁷Lausikei tükdebüei ngei ai kümda kho ngo aying, lausikei kü to kibü shabü.

¹⁸Aishanga ngei ngekei, ngeibü kaodak hangsilam aeka damalongaje maibü kho kü to akida, aishanga ngei maibü kümla maangangsikei kü la hau akida.

¹⁹Ngei ai maibü kümmang sühda, ngei kho akümda; khüpeinyu ngei amangsühbü amaibü kho ong ngei kümda.

²⁰Ngei kümmang asühbü kümbou kho ngo aying lausikei kü to kibü shabüei kümda.

²¹Ngei hapbü ngühkhüm kho hanei ki: ngei maibü kümmang sühda lausikei amaibüei ladangkei kü mütpemje üpyoda.

²²Ngei kü maangponeije olinko Mühghaü Ngühkhüm to hehoat kida,

²³lausikei ngeibü manga ngeibü ngühchung kho wapyoko ngühkhüm phangche hapda. Ho ngeibü maanga kümboleiko kibü shabü ngühkhüm ki hoba hoei ngo langsenbü la yeitida.

²⁴Ngo lai sanoulabü müt che! Aoei ngo ho mang hoba haibüa phenyobü pendou ka püetla?

²⁵Mühghaü sangshi, aieilausi ngei Jisu Khrista, seneibü Bunyubou, ngo khümenbou ki! “Hibü tou kü to jouan kibü kho, ngeibü aukabüei Mühghaü ngühkhüm khangenla thungeida lausikei müteibü hangeilamei kü la shabü ngühkhüm phanga khangentida.”