Read Chang Naga ROM 8 Bible Online

ROM 8 - Chang Naga bible

ROM 8

¹Hibü Khrista Jisu to kibü shuong shanga shedbü kubü aki.

²Aishanga Khrista Jisu to kibü soushou langkei ngühkhümei ngo shabü ngühkhüm hoba haibü ka leiyena.

³Müteibü hangalama hau akibü danko ngühkhümei ai akümen kho Mühghaüei kümbei. Shabü to totyotila shanga, haoei hao Shou, sen müteibü shabü phe jeteibü mang hanei hautikei, hoba kho müt mang danko haoei shabü la shedbü kukei.

⁴Haoei ho sen tou kaodak pheei paibü shuong aying lausikei soushouei paibü shuong danko tükdebü ngühkhümei mangsühbü shuong haüthüktila shanga kümbei.

⁵Aishanga aoyou kaodak hangeilamei paida haoen kaodak maangpon la yeida, lausikei aoyou haoeneibü soushou hangeilamei paida haoen soushou maangpon la yeida.

⁶Kaodak aenei dambü kho haibü lausikei soushou aenei dambü kho langkei hoba sangmai.

⁷Aishanga kaodak dambülebü kho Mühghaü to dangbü; ho Mühghaü ngühkhüm phanga akida, hoba maimaitham kila athük.

⁸Aoyou kaodak hangeilamei thüpetbü phanga kida haoenei Mühghaü olintila athük.

⁹Lausikei Mühghaü soushou maimaitham kan yoa kialonga, kheijinei kan kaneibü kaodak hangeilamei thüpetbü phanga aying lausikei kaneibü soushou hangeilamei thüpetbü phanga kida. Müt cheei Khrista Soushou akilonga hao kho haoeibü aying.

¹⁰Lausikei Khrista ka to kisije, shabü hangshong kaibü mang kho haiasikei, kaibü soushou kho lang ki, aieilausi no kho Mühghaü thedanga mat maitia.

¹¹Jisu haibü ka langngaitibou Mühghaü Soushou kan to kialonga, hao Soushou kan to thüngbü danko, aoei Khrista Jisu haibü ka langngaitikei haoei kaneibü hailabü mang lakei langkei kulabü.

¹²Hibü, jaisinasi shuong, sen kümjanleijan che phanga ki, lausikei kho kaodak hangsilam aying.

¹³Kan kaodak songsido hangeilamei kialonga kan hailabü; lausikei kanei Soushou danko kaneibü pheeibü songsido kho haitisije, kan lang kilabü.

¹⁴Aoyou Mühghaü Soushouei leida haoen Mühghaü shousi shuong ki.

¹⁵Aishanga kanei sungletbü ho, kan nyibou hatlabü thu to leilabü lele aaoeibü soushou aying. Ho sen shousi la yeitibü soushou ki, hoba senei “Abba, Abou.” dogo welauda.

¹⁶Sen kho Mühghaü shousi shuong dogo aukabü kula shanga Soushoukei seneibü soushou to yoda.

¹⁷Hobaje sen shousi shuong yingsije senei Mühghaü jongsak, laobou Khrista yoa hambü jongsak ki, kho jongsak kho hapda. Sen haoeibü soneikangbüa thuiyo janyobü shuong yingla shanga, sen haoeibü khonkua thuiyojanyobü shuong ki.

¹⁸Toubü jihsiphaia khonkubü ho loulabüa sen la tang khitkula kibü soneikangbü khütoje aikei takteian chühla athüklabü dogo ngei daman chühda.

¹⁹Kaodak, müt yangsikok pendouei Mühghaü shousi shuong tang khitla kibü khüto aeibou chüheiko haiyeida.

²⁰Aishanga yaübü kaodak lejim akibü phangto attibü kho, haoei maangangko aying,

²¹lausikei haoei leilubüeibü aaola yeian kibü thu ka satentilabü hoba Mühghaü shousi shuongeibü soneikangbü solo haptila shanga dambü phoan kümbei.

²²Aieilausi senei ngekei, meten haanbü ho buksije, tou ho jihsiphaia sühko, yaübü kaodak kabü phejan pendou nabukshat khonkua aeibou ngühyo wiyoda;

²³kho ong aying lausikei sen soushoua shaangbü jongsak hapan kibü shuongkei sen Mühghaü shousi yeitila shanga hoba seneibü langkei pendou soloa kila haiyeibü ka sen lolo ngühyoda.

²⁴Aishanga ho maanglema sen khümenkei. Senei maanglembü kho senei hapla thükalongaje maanglem kho ai ngühtet ki. Ateije nyekei hapbo kibü to maanglemda si?

²⁵Lausikei senei hapla athükbü che to maanglemsije senei ho shanga natenko haisühda.

²⁶Kho tegü Soushou kei sen hau akibü to thuila sen jungto louda; aieilausi senei ai shanga welaula ayingsi ho shanga lai welaulaje angekei, lausikei Soushouei sen shanga senei alauenbü ngüh khoei Mühghaü junga sühtikuda.

²⁷Aoei maangpon lamda haoei Soushou tetlabü kho ngekei, aishanga mütshuong nyena Soushouei hao to sukujakulabü kho Mühghaüei maangangbü ki;

²⁸hoba senei ngekei, aoyouei Mühghaü sanouda hoba haoeibü nyekchüh to maangshikko ngaa, haoen shanga Soushouei ajanjan pendou kho maibü shanga ong thangyenko kümbuda.

²⁹Aishanga Shou kho chemdang yaangbüa jaishoubou yingtila Mühghaüei shangieda haoeibü shuong pienkei hoba hao shou phatko nayeila shanga shangjinkei.

³⁰Haoei kho tegü shangjinbü shuong kho haoei ngaankei; haoei ngaanbü shuong hao thedanga mat maitikei; hoba haoei mat maitibü shuong kho haoeibü soneikangbü to leibakei.

³¹Khülonga senei kho ainei thontila? Mühghaü kho sen shanga yingsije, sen khulimbo ao ki?

³²Haoei hao shou maimai asenet lausikei haoei hao sen pendou shanga kuan apbei. Hobaje haoei khün sühko kümenalonga, haoei sen la ajanjan pendou khei ong akulep lo?

³³Mühghaüei pienbü shuong khulimbo aoei shedbü sungbala? Mühghaüei sen tangtikuda.

³⁴Aoei attila? Khrista Jisu ao haikei, khei ayingsi ao haibü ka langngaikei, kho Khrista Jisu kho Mühghaü maenei ki, hoba haoei sen nyena sukujakuda.

³⁵Khrista sanou ka sen aiei bangtila? Khonku, maangshat, ayingsi shieinangeibüei sai? Ayingsi mühsinou, mütkongbü, hoba haibü thushedei sai?

³⁶Laishiba damenashi: “Kan laüa kün chaseko haitida; kün haitilabü sanshuong hima weeida.”

³⁷Aying, khübü pendou khünei sen to aoei sanouda hao danko, sen hau kiko thükenbü shuong ki.

³⁸Aishanga haibü ayingsi langkeibü yingashi, khuthük hangangbü ayingsi shabü satan haukei yingashi, toubü ayingsi loulabü thueikei yingashi, seisi- huon kibü shuongkei yingashi,

³⁹müha kibü soushou ayingsi yemlam kabü soushou shuongkei yingashi, mühnyuei küplepbü phanga kibü aieikei Bunyubou Khrista Jisu danko tang khittibü Mühghaü sanou ka sen bangtila athüklabü dogo ngei chong- chingko ngeakei.