Read Chang Naga ROM 9 Bible Online

ROM 9 - Chang Naga bible

ROM 9

¹Ngei Khristan che tegü ngühmai lauda; ngo ayepeida. Ngeibü dambüei kü to thuida hoba ho Soushou Saopobüei lomakei.

²Ngeibü maangpon ngangbü hoba athonenbü khonkuei shenakei.

³Hoei ong ngeibü jaisinasi, ngeibü phe hoba ngeibü sii to thuida laubü che tegüje, ngei Khrista ka lepde bangan, Mühgaü khüksiuok phanga kilabü lele welauankei kikhoulabü.

⁴Haoen Israelbü ki; Mühghaüei haoen kho haoshousi la lela pienkei, haoen la haoeibü soneikangbü lenkei, haoen la theyolanyobü kukei, Ngühkhüm kukei, lemshang chem hoba theletbü kukei;

⁵boukim shuong kho haoeneibü hoba müt aedang kaje Messiakei haoen ka loukei. Ao pendou thüka Mühghaü ki hao thon akiko sangshi. Amen.

⁶Mühghaü theletbü kho aloushadkei dogo aying; aishanga Israel ka thenjung loubü shuong pendou kho tükdebüei Israelbü ji.

⁷Ayingsi Abraham thensilen kho hao shousi shuong dogoje aweeida; aishanga “Ho Isak shousi shuong ka kaibü thensilen kho nyenlabü”,

⁸tetlabü kho Mühghaü shousi shuong dogo nyenlabü kho kaodak hangsilam aeka thenbü kho aying; haoeibü tükdebü thensilen khoje,

⁹“Pienbü jihsiphaia ngo loulabü hoba Saraei bousu shou che buklabü,” dogo theletbü phaia bukbü shuong ong ki.

¹⁰Lausikei kho ong aying, Rebekaeibü shousi shuongeibü boukei seneibü pi Isak kho ong kikei.

¹¹Lankei, haoen abukjinei hoba amai maibü ai angejineithama

¹²jaishoubouei nashoubou khangenlabü dogo sao to lenteikei. Kho Mühghaüei haoei ong ngada dogo lenla shanga pienbü ngühkhüm khangenbü yingan kiteikei.

¹³Laishibaei lauda, “Ngei Jakob to sanoukei, lausikei ngei Esau mangsenkei.”

¹⁴Khülonga senei lai thontila? Mühghaü matjem kho ngühmaang alanbü sai? Khei ji!

¹⁵Aishanga haoei Mosa to laukei, “Ngei aoto sanoulaje hao to sanoulabü hoba ngei ao to onoulaje hao to onoulabü.”

¹⁶Hibü, ajanjan pendou kho, mütei maangangbü ayingsi haang longbü danko aying lausikei Mühghaüeibü onoubüa ong nongakei.

¹⁷Haoei Farao la Laishibaa lenbü tegü, “Ngei no kho ailaje aying lausikei no danko ngeibü sei lenlabü hoba kaodak pendoua kü nyen ngeentila shanga longtikei.”

¹⁸Khülongaje haoei müt che to sanou lenmang sühsi haoei khei kümda, hoba haoei ateibü ngüm kaangtimang sühalonga haoei kho kümda.

¹⁹Kanei kü to laulabü, “Khei yinganje haoei aila müt la shedbü kuda? Aoeicheje hao ngüh lulimbei si?”

²⁰Lausikei no, thüngathamabü müt che ong yingan, Mühghaü to jongaienlabü lele ao ki? Kümenbü peisilei cheei khoeibü kümbou to “Nyi ngo aila hainyu kümbei?” dogo lenenlep si?

²¹Chak yaübü cheei jeteibü shungkung thamdak ka che namton juongbou hoba cheje shibou dogo kümla hau ki aying lo?

²²Hobaje Mühghaüei kho tegü ong kümda ji si? Haoeije haoeibü khauang maangpok kho lenmang sühsikei hoba haoeibü seisihau ngetimang sühsikei, leilutila lamlean kibü “Haoeibü khauang maangpok nyekchüh” kho haoei aeibou haisühko natenkei.

²³Hobaje haoei ho, haoeibü onoubü nyekchüh aenei, haoeibü soneikangbü lamlean phokubü shuong shanga, haoeibü onoubü keisiyang tang khittila shanga kümbei,

²⁴hoba haoei Jihudabü yoka ong aying lausikei Küksithang yoka ngaanbü khübü haoeibü onou nyekchüh shuong kho sen ki.

²⁵Haoei Hosea lea lenbü tegü, “Ngei kü müt ayingbü mütshuong pendou to ‘ngeibü mütshuong’ dogo ngalabü, hoba asanoubü sao to ‘ngei sanounyu’ dogo ngalabü.

²⁶Hobaje ho haüthüklabü, lanei haoen to: ‘Kan ngeibü müt shuong aying,’ dogo lauan ki khüneitham haoen to ‘langkeibü Mühghaü shousi shuong’ dogo ngalabü.”

²⁷Hobaje Isaiaei Israel shanga hai phinthonda, “Israelbü kho yungko kabü phetsen tegü awekhümbo shangasikei, shibou ong khümenlabü;

²⁸haoei ai kümlabü dogo lauda kho kaodaka Bunyubouei tongde hoba jemetshouko kümlabü.”

²⁹Isaiaei shaangbou lea lenan kibü tegü, “Khuthük Lakoubü shuongeibü Bunyubouei sen la thensilen at üpyoku tegüje, sen Sodom tegü hoba Gomora tegütham kikhoulabou.”

³⁰Khülonga senei haka ai lai thontila? Küksithang aoyouei Mühghaü to phenyola shanga dambo akitei, haoenei mailem ka longbü phenyobü che hapbei.

³¹Lausikei, Israelbü aoyouei kho tegübü phenyobü akuenlabü ngühkhüm to chüheiko kikei, haoenei ladangkei kheibü ngühkhüm kho ühüpou.

³²Aiei? Aishanga haoenei khübü phenyobü kho mailem danko aying lausikei haoenei kümenleienbü danko hapla haujembei.

³³Hobaje kho laang khünei haoen phaiyetkei. Laishibaei lenbü tegü: “Chühashi, ngei Ziona müt phaiyetlabü laang che, haoen phaiyettilabü laangdak che khünda; lausikei aoei hao to mailemda (ao laangdak ki) haoei hao ladangkei angangtilabü.”