Read Chang Naga 1 KORINT 1 Bible Online

1 KORINT 1 - Chang Naga bible

1 KORINT 1

¹Ho le, Khrista Jisu youkoikjai che yeila Mühghaüei maangangbüa ngabou Paul, hoba jaisina Sosthena ka,

²Korinta Mühghaü lashong jungto. Kaoen pendoua haoeneibü hoba seneibü Bunyubou, Bunyubou Jisu Khrista nyena ngabü shuong pendou yoa kan Khrista Jisua phangche pienan phokei hoba Mühghaü mütshuong yingla ngaankei.

³Seneibü Bou Mühghaü hoba Bunyubou Jisu Khrista ka kan jungto onou hoba hakso yingshi.

⁴Ponpendou kan shanga ngei kü Mühghaü nyen sangda. Khrista Jisua kan la kubü onou shanga ngei hao nyen sangda,

⁵aishanga hao ajanjan pendoua keibü yeikei. Kanei hapbüngebü pendou kia, hoba ho wanenko laula thükakei,

⁶aieilausi Khrista shangabü kaneibü ngühchung kan to kaangtikei.

⁷Hibü kanei seneibü Bunyubou Jisu Khrista tang khitbü haiyeijinei kan soushou jongsak aineikei akongkei.

⁸Haoei kan seneibü Bunyubou Jisu Khrista Chaloua shedbü akiko yeitila haoei kan thon sühko kaangtilabü.

⁹Mühghaü, aoei kan hao Shou hoba seneibü Bunyubou Jisu Khrista himjam to ngakei, hao maanglemenbü ki.

¹⁰Jaisinasi shuong, seneibü Bunyubou Jisu Khrista nyen danko ngei kan to sudajada; kan pendou sembung chela leshi; kan yoa janyinbü tekiti, lausikei maangpon hoba dambüa thepyen- ashi.

¹¹Aishanga ngeibü jaisinasi shuong, kan yoa oyophetyo kia dogo ngei Klo chemdang ka ngühlang ditletkei.

¹²Ngei laubü kho ho: kan cheei “Ngo Pauleibü,” atei “Ngo Apoloeibü,” atei “Ngo Kaifaeibü,” hoba lubü atei “Ngo Khristaeibü,” dogo lauda.

¹³Khrista janyinkei si? Paul kan shanga peiseia thüngkei si? Kan Paul nyena baptikei si?

¹⁴Kan kü nyena baptikei dogo aoeikei alaulabü lele, Grispa si Gaya to liman kan yoa ngei aokei abaptikusi ngei Mühghaü nyen sangda.

¹⁶Hobaje ngei Stefen chemdang baptikukei, khüto liman ngei aoche ongkei baptikulaoje ngei angekei.

¹⁷Khristaei baptikula ohauti, lausikei Khrista peisei sei ngüh jim akibüla dogo haoei ngo lansanbüa Ngühlang Maibü songlenla hautikei.

¹⁸Aishanga maubü lama kibü dan shanga peisei songlen kho ngoubü ngüh, lausikei sen aoyou khümenbü lama ki khübü shuong shanga Mühghaü sei.

¹⁹Aishanga Laishibaei lauda, “Songbüdobüeibü songsihon ngei mautikulabü, hoba maangli maangsang songsido jim akitilabü.”

²⁰Songbüdobü müt lan ki? Ngühkhüm lenbou lan ki? Ho kaodaka ngüh wetyobou lan ki? Mühghaüei kaodak songsihon ngoubüla ayeiti lo?

²¹Aishanga Mühghaü songsihona kaodakei jembü songsihon danko Mühghaü angesije, künei songlenbü ngoubü ngüh danko aoyouei mailemlaje haoen khümenla Mühghaü maangangbü kiteikei.

²²Jihudabüei amaaphilabü hida hoba Grikbüei songsihon lamda,

²³lausikei künei Jihudabü shanga phaiyetshang hoba Küksithang shanga ngoubü ngüh, peiseia thüngbü Khrista songlenda;

²⁴lausikei aoyou ngaan ki, Jihudabü si Grikbü ham shanga hao kho Khrista, Mühghaü sei hoba Mühghaü songsihon.

²⁵Aishanga Mühghaü ngoubü kho müt maangli maangsang to songsihon kibou hoba Mühghaü hau akibü kho müteibü hau to sekokbou.

²⁶Jaisinasi shuong, kan ngabü damanchühashi. Kan juongnyu thamje phea hapbüngebü aying, juongthamje hau kibü aying hoba juong thamje yaangenbüje aying;

²⁷lausikei Mühghaüei songbüdobü himou bautila kaodaka asangadobü pienkei, hoba Mühghaüei hau kibü shuong himoutila kaodaka ibünyaübü shuong pienkei;

²⁸ai peisilei ong ki kho lejim akibü yeitila shanga kaodaka hanbou, aweasüngbü hoba toukei ai peisilei ong aki, khübü kho Mühghaüei pienkei,

²⁹khei ao müteikei Mühghaü thedanga yong alamla shanga.

³⁰Haoeibü kümsilei danko Khrista Jisu kia hoba hao seneibü songsihon la yeibou kho Mühghaü ki. Mühghaüei sen hao to leiyenkei, hao mütshuong la yeitikei hoba angthetkei.

³¹Hibü Laishibaei lenbü tegü, “Aoei yaangmang sühda, haoei Bunyubou shangabü yaangentiashi.”