Read Chang Naga 1 KORINT 10 Bible Online

1 KORINT 10 - Chang Naga bible

1 KORINT 10

¹Jaisinasi shuong, ngei kan la seneibü pisibou to haüthükbü ditentimang sühda. Haoen sangmeiei leikei, pendouei Saklangbü Yungnyu khatkei,

²hoba sangmei si yungnyua pendou Mosa himjama baptikei.

³Pendouei jeteibü soushou shausiyung shaukei,

⁴hoba pendouei jeteibü soushou dei yungkei; aishanga haoenei haoen phai sembo kibü soushou laangnyudak ka yungkei. Laangnyudak kho Khrista kiteikei.

⁵Lausikei haoen juongbou to Mühghaü maang ühai, hoba haoeneibü mangjimei lamang nyakkei.

⁶Khübü pendou kho, khei haoenei tegü senei amaibü to maang ataktila sen shanga maangsanglabü tetsida che la yeikei.

⁷Haoen at tegü heangsho lembü la teyei; Laishibaei lauda, “Mütshuongei shaula hoba yungla setkei, hoba tomla laakla loenkei.”

⁸Hoenei atei asangalanbü jungeian nyetchenei müt hajar saoto sem tuongbü tegütham, senei tejungeikho.

⁹Ayingsi haoen atei takteian pinyuei shembü tegütham, senei Bunyubou tetakteikho.

¹⁰Hobaje haoen atei nyamnyaman, Shemtibou Khuthük Hangangbüei shemtibü tegü, senei tenyamnyambho.

¹¹Khübü pendou haoen la tetsida che tegü haüthükkei, lausikei sen aoyou thükto meten thonbü lousüha, khübü mütshuong la maangsanglabü che tegü doan phokukei.

¹²Aoei kaangkhühtham loakei dogo damda haoen üatetla maangsangshi.

¹³Mütei natenlabü takteibü to liman kan jungto ai takteibükei aloukei. Mühghaü kho maanglemenbü, hoba haoei kanei natenlabü to liman atakteilabü, lausikei kanei natenlabü lele haoei takteibüa satenlabü lam ipbulabü.

¹⁴Hibü, ngei sanoubü jaisinasi shuong, heangsho lembü ka saten- ashi.

¹⁵Ngei kan to hapbüngebü to tegü lauda, ngei laubü ngüh kho kan lolo daman chühashi.

¹⁶Ladang senei haülabü thung kho haükuda, kheijinei Khrista siia senei janyoda aying lo? Hobaje ladang senei wentek shaknyinda, Khrista manga senei janyoda aying lo?

¹⁷Wentek che ong yingasikei, sen juong kiasikei mang che ong, aishanga sen pendouei wentek che ka janyo shomyoda.

¹⁸Jihudabü mailem hoba hangsilam daman chühashi; lemla jinbü shaubü danei Mühghaü khangenbü lemshona nongnaekei aying lo?

¹⁹Kholonga ngei ai lauda? Silip jabü shausiyung aiche denche ki sai? Ayingsi heangsho kho aiche phangche sai?

²⁰Ji, lausikei Kükeithangei lembü kho Mühghaü to ayingko shabü sou to lemda. Ngei kan shabü sou himjam yoa yotimang asühda.

²¹Kanei Bunyubou thung si shabü sou thung yungla athük; kanei Bunyubou lem shaushang si shabü sou lem shaushang hama yola athük.

²²Senei Bunyubou nyek to shattimang sühda sai? Sen hao to hau kibou sai?

²³“Pendou janbü” dogo kanei lauda. Haü, lausikei pendouje sen maila shanga aying. “Pendou janbü” dogo kanei lauda lausikei pendouje ku aying.

²⁴Aoeikei jembü maila ong adambo mü shangakei damshi.

²⁵Phe jemshanga ai yakda kho sensimaang shanga aikei apheeiko jekshauashi.

²⁶Kaodak hoba khonei kibü pendou Bunyuboueibü.

²⁷Songalebü cheei no oknyinla ngaalonga, hoba nyi haumang sühalonga, ka junga ai denkulaje nyi sensimaang shanga ai ashako shauashi.

²⁸Lausikei atei ka to, “Ho lembüsabü peisilei sem,” dogo lausije, kheijinei ka la ngetibou hoba sensimaang laüa kho teshau;

²⁹kaibü sensimaang shanga aying lausikei müt che khoeibü laüa ngei lauda. “Aila ngeibü dongebü solo matjem lubü sensimaangei kula?” dogo kanei lauda.

³⁰Ngei nyensang kuko shaualonga, laobou shanga ngei nyen sangda, kho shangabü kü nyen aila shala?

³¹Hibü, kanei shauasikei ayingsi yungasikei ayingsi ai ong kümasikei, pendou Mühghaü soneikangbü shanga kümashi.

³²Ngei tegütham, aoei jembü ku alambo müt juong pailetla lambo, pendoua pendou maang haitiko jungeikei, kho tegü kaneikei Jihudabü yingasikei, Grikbü yingasikei, Mühghaü lashong yingasikei aokei tephaiyetti.