Read Chang Naga 1 KORINT 11 Bible Online

1 KORINT 11 - Chang Naga bible

1 KORINT 11

¹Ngei Khrista nei noubü tegü künei nouashi.

²Ngei kan nyen sangda aishanga kanei ngo ajanjan pendoua damenda hoba ngei kan to lenbü ngühthen kaangkhühtham hatlepda.

³Lausikei mütpem wekoeibü khu Khrista, hoba yaksa khu bousu hoba Khrista khu Mühghaü dogo ngei kan la ngetimang sühda.

⁴Bousu aoei neikhu yukan welaulaje ayingsi Mühghaü ngüh laulaje haoei haoeibü khu Khrista la himou sungbakuda.

⁵Lausikei yaksa aoei ong neikhu ayukko welaulaje ayingsi Mühghaü ngüh laulaje saoei lao, ao saoeibü khu ki, hao la himou sungbakuda; aishanga sao kho khutongnyu yaksa to aikei lulu aying.

⁶Yaksa cheei neikhu ayuklonga saoei khu shuan apashi; lausikei yaksa shanga khulou kipan apan kila ayingsi khu dongan kila nyenshed dogo damsije saoei neikhu yukshi.

⁷Lausikei bousuje Mühghaü phatbü hoba soneikangbü yingsije, maimaitham neikhu ayukjan; lausikei yaksa kho bousu soneikangbü ki.

⁸Aishanga bousu kho yaksa ka aying, lausikei yaksa kho bousu ka kümbei;

⁹hoba bousu kho yaksa shanga ayaü lausikei yaksa kho bousu shanga yaükei.

¹⁰Hibü, khuthük hangangbü shuong kiabuba, yaksaei jembü khua ama- aphelabü hau che phojan.

¹¹Lausikei Bunyuboua yaksa kho bousu to anongetko aying;

¹²aishanga ailai yaksa kho bousu ka longkei kho tegü bousu kho yaksa danko bukda; lausikei pendou Mühghaü ka ki.

¹³Kan lolo matjem kuashi: yaksaei neikhu ayukko Mühghaü to welaula janbü si ai?

¹⁴Bousuei khulou amaalonga kho hao shanga nyenshed dogo haangeikei kanla alenda lo?

¹⁵Lausikei yaksa khulou lounyu yemsije kho sao shanga nyensang nyenhang ki. Aishanga sao la khulou loubü kho küplepla shanga kukei.

¹⁶Müt atei kaosakalonga khüto liman sen ayingsi Mühghaü lashonga jungeibü lubü song aki.

¹⁷Habü hangsilam lenjinei, ngei kan asangda; aieilausi kaneibü kambüei maibü toje amaibü yaangbou kümda.

¹⁸Shaangboua, kan lashonga takshatjinei kan yoa janyinbü kia dogo ngei ditoua, hoba ngei ho ngüh mailemshangda.

¹⁹Aieilausi kan yoa Mühghaü junga ao janbou yingkeije shentila ngühthang ayenko kilabü haang.

²⁰Lausikei kan ladang chela kamshaida, kanei kho Bunyubou lem shauda ji;

²¹aishanga kanei lulueibü shausiyung to thapyolangda hoba müt che müh ngaijinei cheje jaketan ngaida.

²²Kanei chema shaula yungla athük si? Kanei Mühghaü lashong nyikulep lo? Hobaje shalebü shuong himou bautilep lo? Ngei kan to ai lenla? Ngei kan nyen sanglep sai? Ho shanga ladangkei asanglabü.

²³Aishanga ngei kan to ai lenkei, kho Bunyubou ka sungletkei: hao khümbo kuan apbü you, Bunyubouei wentek sungkei,

²⁴hoba nyensang kuan phaia shaknyinko laukei, “Ho kan shanga kubü ngeibü mang; ngo damenko ho jungeiashi.”

²⁵Hobaje lem shauan phaia kho tegü ong haoei thungkei sungko laukei, “Ho thung kü siia thebülanbü haanbü ki. Kanei ho thung ladüngnei yunglaje ngo damenko kho jungeiashi.”

²⁶Aishanga kanei ladüngei ho wentek shaulaje hoba thung ka yunglaje, kanei hao aloushongko Bunyubou haibü ngekletda.

²⁷Hibü aoei ong amuko wentek shaulaje, ayingsi Bunyubou thung yunglaje, haoei Bunyubou mang hoba sii khulimbo shedbü shonlabü.

²⁸Lausikei mütei jembü lolo takteiashi, hoba kho khei wentek kho shaushi hoba thung kho yungshi.

²⁹Aishanga aoei mang shangabü daman achühko shaulaje hoba yunglaje haoei jembü matjem kuko shauda.

³⁰Khoei ong kan yoa juongnyu hau aki hoba shatda, hoba juongnyu haia.

³¹Senei sen lolo matjem kuenalonga sen mat ajemlabü.

³²Lausikei ladang Bunyubouei sen mat jemda, kaodakbü yoa sen üattikula shanga haoei sen thepetda.

³³Hibü ngeibü jaisinasi shuong, ladang kan Bunyubou lem shaula chela kamshaida; cheei che haisühashi.

³⁴At to mühei haialonga kan kambü ashedlabü lele, haoei jembü chema shaushi. Ngo ladang loulaje kheijinei lubü hangsilam shangabü lenyolabü.