Read Chang Naga 1 KORINT 12 Bible Online

1 KORINT 12 - Chang Naga bible

1 KORINT 12

¹Jaisinasi shuong, ngei kan la soushou jongsak shangabü ngetimang sühda.

²Ladang kan küksithang la yeian kiteikei, ngoubüloubü heangsho shuong jungto, ai aeto ong kan leikei khito kan leilangkei dogo kanei ngekei.

³Hibü Mühghaü Soushoua laubü aoeikei, “Jisu shedsikhau yingshi”, dogo alauda, hoba Soushou Saopobü to liman aoeikei, “Jisu kho Bunyubou” dogo laula athük.

⁴Soushou jongsak phang juong kia, lausikei pendou kubou Soushou che ong.

⁵Khangenbü phang juong kia, lausikei Bunyu che ong;

⁶Soushou kümsilei phang phanga kia, lausikei Mühghaü aoei pendoua pendou kümda, hao che ong ki.

⁷Lausikei mütpem weko la pendou maila yaangla Soushou tang khitbü kuda.

⁸Aishanga Mühghaüei che la Soushou danko songsihon ngüh laula kuda, hoba lubü che la Soushou jeteibü danko ngebüdobü ngüh laula,

⁹hoba lubü che la Soushou jeteibü danko mailem, hoba lubü che la Soushou jeteibü danko maitibü soushou jongsak;

¹⁰hoba lubü che la seikümseilei, hoba lubü che la songlenla, hoba lubü che la soushou shuong shenbü hoba lubü che la ngühyema lauenbü, hoba lubü che la khübü ngühyem sepeila kuda;

¹¹lausikei Soushou jeteibüei hao maangangbüei müt- pem weko la habü pendou jankuda.

¹²Aishanga mang ailai che ong yingan küksihuo juongnyu yembei, hoba mang küksihuo juongnyu thonan, lausikei mang che ong, kho tegü Khrista ki;

¹³aishanga sen Jihudabü yingasikei, Grikbü yingasikei, aaomüt yingasikei, dongebü yingasikei, pendou Soushou chenei baptikukei, hoba sen pendou Soushou che ka jentikei.

¹⁴Müteibü manga küksihuo che ong aying, lausikei juongnyu kia.

¹⁵Youei “Ngo ik ayingbü ngo manga athonkei”, dogo laualonga, kho laubüei dogo hao manga ayoko aki.

¹⁶Nouei “Ngo nyek ayingbü ngo manga athonkei”, dogo laualonga, kho laubüei dogo hao manga ayoko aki.

¹⁷Mang khümbo nyek yingalonga, aiei ditla? Mang khümbo nou yingalonga, aiei lüm jemenla?

¹⁸Lausikei Mühghaüei küksihuo phang phanga haoei phomang sühbü tegü haoei yemtikei.

¹⁹Lausikei pendou küksihuo che ong yingalonga mang lanei kila?

²⁰Kho tegü küksihuo juongnyu kia lausikei mang che ong.

²¹Hobaje nyekei ik to, “Ngei no khaman aki”, dogo laula athük; ayingsi khuei you to, “Ngei no khaman aki”, dogo laula athük.

²²Aying, aeiko manga hau akibü küksihuo bouje lejim ki.

²³Hobaje mang küksihuo laobou senei amu dogo damda khola senei soumo aei kuda, hoba seneibü he amaibou kho aei hemaibou ki;

²⁴lausikei küksihuo he maibü shanga kho akhamda. Lausikei mang janyinbü akiko,

²⁵küksihuo si küksihuo jeteitei thuiyola shanga, Mühghaüei küksihuo he amaibou la soumo aei kuko seneibü mang küksihuo tükde thangjamtikei.

²⁶Hobaje küksihuo che khonsakalonga, küksihuo pendou hao yoa khonsakyoda; hoba küksihuo che soumo kisije, kho yoa pendouei olinyoda.

²⁷Toukei kan Khrista mang ki, hoba kan mütpem che che kho khoeibü küksihuo.

²⁸Hobaje Mühghaüei lashonga: shaangboua youkoikjai shuong, nyiboubüa thuseibü shuong, semboubüa lenbou shuong, kho phaia seikümseilei, kho phaia maitikubü soushou jongsak kibü shuong, kho phaia thuibü shuong, songdaklabü sei, hoba ngühyema lauenlabü jongsak, khübü haükukei.

²⁹Pendou youkoikjaibü ong sai? Pendou thuseibü ong sai? Pendou lenbou ong sai? Pendouei seikümseilei jungeida sai?

³⁰Pendouei maitikubü soushou jongsak ki sai? Pendouei ngüh- yema lauenda sai? Pendouei tetlabü sepeienda sai?

³¹Lausikei soushou jongsak maiboutham shanga aei maangdakashi.