Read Chang Naga 1 KORINT 13 Bible Online

1 KORINT 13 - Chang Naga bible

1 KORINT 13

¹Hobaje ngei tou kan la aei maibou lam che lenkho. Ngei müteibü ngüh hoba khuthük hangangbü ngühyemakei laula thükkei, lausikei kü to sanou akilonga ngo langbü thüngdou ayingsi kaangbü la che ong.

²Hobaje ngei songlenlabü jongsak kiasikei, hoba huphang ngüh pendou hoba hapbüngebü pendou ngeasikei, hoba ngei shongh tonan aplabü lele mailem yaang kiasikei, lausikei sanou akilonga ngo ai aying.

³Hobaje ngei shalejonglebü samla jembü peisilei pendou kuasikei, hoba jembü mang lontilabü shanga khümbomeiko kuasikei, lausikei sanou akilonga, ngo ku aki.

⁴Sanouei lounyu natenda, hoba onou lenda. Sanouei nyekto ashatda, sanouei yong alamda, hoba alilida,

⁵apubangko ajungeida, jembü kusikhang alamda, khauang alongda, müshanga alaueida,

⁶amaibüa aolinda, lausikei ngühmai yoa olinyoda; pendou amenda, pendou mailemda,

⁷pendou maanglemda, pendou natenda.

⁸Sanou ladangkei athonda. Lausikei songlen kialonga, kho dankhümlabü; ngüh phang phanga kialonga kho nanglabü; hapbüngebü kialonga kho thonlabü.

⁹Aishanga senei jamde ong ngekei hoba thoche ong songlenda;

¹⁰lausikei ladang penbüsoubü loulaje kheijinei apenasoubü dankhümlabü.

¹¹Ngo nashoua ngei nashou tegü laukei, nashou tegü ngei dambei, nashou tegü ngei damanchühkei; touje chingsi ngei nashou songsido apa.

¹²Aieilausi touje senei mangchüha shanga ashatko hapda, lausikei kheijinei senei theshuok hapyolabü. Touje ngei jamde ong ngekei, lausikei kheijinei, ngo ailai khümbomeiko ngean ki, kho tegü ngeikei khümbomeiko ngelabü.

¹³Touje, mailem, maanglem hoba sanou, habü sem ponpen kida: hoba khübü yoa sanou yaangbou.