Read Chang Naga 1 KORINT 14 Bible Online

1 KORINT 14 - Chang Naga bible

1 KORINT 14

¹Sanoua nyek theashi; hoba toukei soushou jongsak shanga aeibou maang takashi, lausikei songlen jongsak shanga aei maangtakashi.

²Aoei ngühyema lauda haoei müt to ayingko Mühghaü to joyoda; aishanga aoeikei aditenda; lausikei huphang ngüh soushoua lauda.

³Lausikei aoei songlenda haoei müt to hau kilabü ngüh, thungeibü ngüh hoba hakso ngüh lauda.

⁴Aoei ngühyema lauda, haoei jembü lolo hau kitida; lausikei aoei songlenda, haoei lashong hau kitida.

⁵Ngei kan pendou la ngühyema lautimang sühda, lausikei aeiche kanei song lentimang sühda. Hobaje ngühyema laubouei lashong hau kitilabü lele sepeibou akilonga, ngühyema laubü toje songlenbou yaangbou.

⁶Hibü jaisinasi shuong, ngei kan jungto tang khitbü ngüh, ayingsi hapbüngebü, ayingsi songlenbü ayingsi lenbü alauko kan jungto ngühyema lauko lousije, kanei ai pailetla?

⁷Hobaje langkei akibü langh kubou peisilei pithung yingasikei, kongkin yingasikei, haoenei lang lulu akulonga ai metda ayingsi kaangdaje ailai shuokla?

⁸Hobaje teklaangei langh tükde along longa, aoei wapyola lamlela?

⁹Kho tegütham kanei lishangei ngüh ditenlabü shangashatbü alaulonga, kanei ai lauda ailai ngela? Kanei yeia joyoko kilabü.

¹⁰Hibü, kaodaka ngühyem haju- chenyu kia, hoba ngühtet akibü ngühyem ayokei.

¹¹Hibü ngühyem ngühtet angeshongkoje, ngüh laubü thedanga küksithang tegü kilabü.

¹²Kho tegü kanei Soushou jongsaka maangtakashi, lashong hau kitila shanga, kan penbüsoubü yeila lamashi.

¹³Hibü, aoei ngühyemei lauda, haoei tetlabü lenenla shanga welauashi.

¹⁴Aishanga ngei lubü ngühyemei welaualonga, kü soushouei welauda, lausikei ngeibü ditenbü ku aki.

¹⁵Kholonga ai kümla? Ngei soushouei welaujan hoba tokei ngei ditenbüei welaujan; ngei soushoua chia laujan, lausikei ngei ditenbüa chia laujan.

¹⁶Khei ayinglonga nyi soushouei ong nyen sangsije, angebüei nyi laubüa ashuokko haoei ailai, “Amen” dogo laula? Aishanga haoenei nyi laubü aditen.

¹⁷Kaibü nyensangbü welau aicheküman maila thükkei, lausikei lubüje hau akitida.

¹⁸Ngei kan pendou to lubü ngühyem juongbouei lauensi ngei Mühghaü nyen sangda;

¹⁹khei yingasikei lashong kambüa ngei lubü ngühyemei hajar an laubü khantoje lubü lenenlabü lele ngühpem ngao ong ngeibü ditenbüei laubü khaibou.

²⁰Jaisinasi shuong, maangpona nashou tegü teying. Amaibüa nasak yingshi, lausikei kan maang- pona inthonbü yingshi.

²¹Ngühkhüma Laishibaei hai lauda: “Lubü ngühyem phangcheei laubü mütei, hoba yen sembung ka ngei habü mütshuong to joyolabü; lausi dogokei haoenei kü ngüh aditkulabü.” dogo Bunyubouei lauda.

²²Hibü lubü ngühyemei laubü kho mailembü dan shanga lausikei maialembü dan shanga amaaphilabü ki; lausikei songlen kho maialembü dan shanga aying, mailembü dan shanga amaaphilabü ki.

²³Hibü lashongbü dan pendou takshatan mütpem wekoei lubü ngühyemei lausije, ladang angebü ayingsi maialembü loulaje haoenei, “Kan dalada,” dogo alaulep lo?

²⁴Lausikei mütpem wekoei songlenko kian angebü ayingsi maialembü che lotalonga haoei ditbü pendouei hao shedbü ngetida, hoba pendouei matjem kuda.

²⁵Hao maangpona huan kibü pendou ngesakbü to khokenda. Kheijinei haoei kaoa khüpetko, “Mühghaü maimaitham kan yoa kia,” dogo tang khitko Mühghaü lemlabü.

²⁶Kholonga, jaisinasi shuong, senei lai laula? Kan ladang chela yoshaida, mütpem wekoei chia, nyensang chia chebang, lenbü chebang, tang khitbü chebang, lubü ngühyem ayingsi sepeibü chebang kila thükkei, lausikei pendou kho lashongbü hau kitilabü shanga ong kümjan.

²⁷Lubü ngühyemei laubü kisije müt nyi la ayingsi juongbouei müt sem la thenei thenko lautiashi, hoba ngühjapbou che kijan.

²⁸Lausikei ngühjapbü akilonga lubü ngühyemei laumang sühbü dan kho lashong kambüa sangsembo setashi, hoba haoei jembü shangabü hoba Mühghaü to joyotiashi.

²⁹Hobaje thusei-songlen shuong müt nyi ayingsi sem la lautiashi, hoba lubü shuongei haoeneibü ngüh tedtangko damanchühashi.

³⁰Hobaje cheei lauko kitoua setbü dan yoka che jungto tang khitbü louphama longaje shaangbou ngühlaubou kho küpjemailangashi.

³¹Aishanga pendouei ditenlabü hoba pendou thungeijangeila shanga kan pendouei thenei thenko songlenla thükkei.

³²Hobaje thuseibü soushou shuong thuseibü shuong phanga ki;

³³aishanga hao panglangbü Mühghaü aying, lausikei takshatbü Mühghaü. Saopobü shuong lashong pendoua kibü tegü,

³⁴yaksa shuong lashonga sangsembo kishi. Haoen la ngühlaula asakkuda, lausikei Ngühkhümei laubü tegü haoen phanga phokushi.

³⁵Haoenei den- che ditletmang sühalongaje, jembü chema lao to pheshi. Aishanga yaksaei lashonga ngüh laulabü kho himoulabü che ki.

³⁶Yingsije kan ka Mühghaü ngüh pakkei sai? Ayingsi kan jungto ong kho loukei sai?

³⁷Kan yoa müt atei jembü lolo thusei-songlen müt ayingsi soushou-jongsak müt dogo damsije, ngei kan to ai doda kho Bunyubou ka ki dogo haoei ngeashi.

³⁸Atei ho awelonga haokei tewe.

³⁹Hibü, ngeibü jaisinasi shuong, songlenla aeibou maangtakashi, hoba lubü ngühyemei laubü teshingek,

⁴⁰lausikei ajanjan pendou chühjanko yenei yenko kümashi.