Read Chang Naga 1 KORINT 15 Bible Online

1 KORINT 15 - Chang Naga bible

1 KORINT 15

¹Tou jaisinasi shuong, ngei kan la songlenbü Ngühlang Maibü shanga damentimang sühda, hoba ho ai yingkeije lenmang sühda. Kanei ho sungletkei, hoba kan khonei loda;

²hoba ngei kan to songlenbü ngüh kanei kaangko hatlepalonga, kanei amlanga mailembei ayinglonga kan ho danko khümena.

³Aishanga pendou to kongnyubou tegü ngei ai sungletkei, kho ngei kan to lenda; Laishibaa kibü tegü Khrista seneibü shabü shanga haikei;

⁴hoba hao khünkei, hoba Laishibaa kibü tegü sembounyet hao langngaitikei;

⁵hoba hao Kefa jungto longkei, kho phaia Anthüknyi jungto longkei;

⁶kheijinei jih chenei jaisina saongao ngaoto aeian jungto hao longkei; hoba haoen yoa juongbou tou sühko langakei, lausikei at haia;

⁷kheijinei hao Jakob jungto longkei hoba khei youkoikjai pendou jungto longkei;

⁸hoba pendou to küpla, ngo “alianyenbü” nasakshou tegübü jungto hao longkei.

⁹Aishanga ngo youkoikjai shuong pendou to hanbou. Ngo youkoikjai dogo nyenla amukei, aieilausi ngei Mühghaü lashong shieikoekei;

¹⁰lausikei Mühghaü onouei ngo ai ki kho ki, hoba haoei kü la kubü onou amlang ayingtei. Tükdebüei ngei haoen pendou to haujembou kümbei, khei yingsikei ngei ji, lausikei kü to kibü Mühghaü onouei ngei kümbei.

¹¹Hibü ngei yingasikei haoenei yingasikei kho khei künei songlenda, hoba kho tegü kanei mailembei.

¹²Tokei, Khrista haibü ka langngaikei dogo songlenkei longa, haibü shuong langngaibü kho aki dogo kan yoa atei laibü lauda?

¹³Haibü ka langngaibü akilonga, Khrista kei alangngaikei;

¹⁴hoba Khrista alangngaiti longa küneibü songlen lejim aki hoba kaneibü mailemkei lejim aki.

¹⁵Khüto yongbou, kün Mühghaü shangabü amlangbü ngühchung künbou la yeikei; aishanga Mühghaüei Khrista langngaitikei dogo künei aukabü künkei; lausikei haibü shuong alangngaiti longaje, haoei Khrista alangngaitikei.

¹⁶Aishanga haibü shuong alangngaiti longaje, Khrista kei alangngaiti.

¹⁷Hobaje Khrista alangngaiti longa, kaneibü mailem lejim aki; kan toukei jembü shabüa kia.

¹⁸Kholongaje toukei, Khristaa aoyou haia haoen shuongkei ponpen shanga maua.

¹⁹Senei ho salanga ong Khrista to mailema longa khunak shousi pendou to sen thu waibou.

²⁰Lausikei tükdebüei Khrista haibü ka langngaitia. Haibü shuongkei pendou langngailabü dogo authebü kia.

²¹Aishanga ailai müt che ka haibü loukei, kho tegü müt che ka haibü shuong langngaibü khokei loukei.

²²Aieilausi ailai Adama pendou haida, kho tegü Khristaa pendou lang kitilabü.

²³Lausikei mütpem weko lulu angthena: authebü tegü shaangboua Khrista, hoba ladang hao loulaje kheijinei haoeibü dan shuong,

²⁴kho thenaje thonbü jih loulabü, laonei songdak, hau hoba sei pendou mautian phaia, haoei Bou Mühghaü la Sangle khümbo kuan aplabü.

²⁵Aishanga Mühghaüei haoeibü dangbü khümbo jembü you phanga aphoku shongko Khristaei songdakjan;

²⁶hoba mautilabü dangbou thonbou kho haibü.

²⁷Aishanga, “Haoei pendou jembü you phanga thepetan phokei”, dogo Laishibaei lauda. Lausikei ladang Laishibaei, Mühghaüei pendou hao you phanga thepetan phoda dogo lauda, Mühghaü, aoei pendou Khrista phanga thepetan phokukei, hao ayokei.

²⁸Lausikei ladang pendou Shou phanga phokhümbulaje, khei Mühghaü pendou thüka pendou yinglabü, aoei pendou hao phanga phokukei, kheijinei haokei Mühghaü phanga phokulabü.

²⁹Langngaibü akilonga aoyou haibü shuong shanga baptikei, haoen danei ai kümla? Haibü shuong alangngai longa ailai mütshuongei haoen shanga baptikuda?

³⁰Künkei aila angh weko thusheda loda?

³¹Jaisinasi shuong, ho shangabü ngo chaangboua haida! Ngei Khrista Jisu seneibü Bunyuboua kan shangabü the lenenbüei ngei maimaitham lauda.

³²Takübü mütei kümbü tegü ngei Efesia sangnyua yamyang to longyoalonga ngei ai pailetkei? Haibü shuong alangngaida longaje, Laishibaei laubü tegü, “Senei shaukho, hoba yungkho aishanga ngiet sen hailabü.”

³³Kan ayinglamto teleilangti: “Jambü amaibüei thechüh maibü lusaktida.”

³⁴Saopobü to sinenashi hoba shabü tejungei. Kan ateije Mühghaü angekei. Ngei ho kan nahimoula lauda.

³⁵Lausikei atei laulabü, “Haibü shuong ailai langngaila? Haoenei ailaibü mangsisau kila?”

³⁶Latetche ngoukei! Nyi saakbü youli ühailongaje nyibou alangda.

³⁷Nyi youli saakjinei, phaia yemla kibü youlong asaakda, lausikei youshou yingasikei lubü yingasikei youli ong saakda.

³⁸Lausikei khola Mühghaüei jembü maangshikbüei mang kuda, hoba youli weko la lulueibü mang kuda.

³⁹Phe pendou phang che aying. Lausikei müt la phe phang che, meisiau phe phang che, au phe phang che, hoba ngau phang che dogo yembei.

⁴⁰Tokei khuthük mang hoba kaodak mang kia. Lausikei khuthük mang soneikangbü hoba kaodak mang soneikangbü phang che ki.

⁴¹Chanyu soneikangbü phang che ki, hoba litnyu soneikangbü phang che hoba khanshoulitshou soneikangbü phang che ki; maimaitham khanshoulitshou si khanshoulitshoukei ngesakbüa saa anglo lulu.

⁴²Haibü shuong langngaibükei kho tegü yingkei. Youli tegü mang kho maulabüa wenkei hoba amaulabüa langngaitida.

⁴³Aweasüngbüa wenkei hoba soneikangbüa langngaitida; athükamina wenkei, seia langngaitida;

⁴⁴kaodak mang che tegü khünkei lausikei soushou manga langngaitida. Kaodak mang kialonga soushou mangkei kia.

⁴⁵Khoei Laishibaei lauda, “Shaangbou Adam, langkeibü müt la yeikei”; hoba thonbou Adamei langkei kubou Soushou la yeikei.

⁴⁶Chühashi, ai soushou ki, kho shaang aying, lausikei ai phe, kho shaang loukei, hoba kho phaia soushou.

⁴⁷Shaangbou müt kho tham ka kümbü kaodakeibü hoba nyiboubü kho khuthük ka loukei.

⁴⁸Kaodak thamdak müt kho thamdak müt phatkei, hoba khuthükbü müt kho khuthük müt phatkei.

⁴⁹Senei kaodak thamdak müt hesihang künan kibü tegütham senei toukei khuthük müt hesihang künlabü.

⁵⁰Jaisinasi shuong, ngei laubü kho ho: phe si siiei Mühghaü Sangle phet phanla athük, ayingsi maulabüei amaulabü phet phanla athük.

⁵¹Ditashi, ngei kan la huphang ngüh che lenlabü: sen pendou ühailabü, lausikei

⁵²mangde, nyek shemtoua, thonbü teklaangei ngajinei sen pendou jakshailabü; aishanga teklaang metlabü, hoba haibü shuong amaubüa langngaitilabü, hoba sen jakshailabü.

⁵³Aishanga ho maulabü mang amaulabü la yeijan, hoba ho haibü mang ühaibüla yeijan.

⁵⁴Ladang ho maulabü mangei amaulabü yeian kiteilaje, hoba ho hailabüei ühailabü yeian kiteilaje, kheijinei Laishibaa doan kibü ngüh ho loushadlabü: “Haibü thükenbüa suia!”

⁵⁵“O haibü, kaibü thükenbü lan ki? O haibü, kaibü lüh lan ki?”

⁵⁶Haibü kho shabü; hoba shabü sei kho ngühkhüm;

⁵⁷lausikei Mühghaü nyen sangashi! Haoei seneibü Bunyubou Jisu Khrista danko sen la thükenbü kuda.

⁵⁸Hibü, ngei sanoubü jaisinasi shuong, Bunyuboua kaneibü kümsilei jim akibü aying dogo ngean, kaangkhühtham, atopeiko, Bunyubou kümsileia ponpen akukkuko hauhtak nepashi.