Read Chang Naga 1 KORINT 16 Bible Online

1 KORINT 16 - Chang Naga bible

1 KORINT 16

¹Tokei, Mühghaü mütshuong shanga haujem hebü shangabü, ngei Galatia lashong dan la ai ngühkhüm kukei kho tegü kanei jungeiashi.

²Ngo loujinei nam ahelabü lele bale weko kanei mütpem weko haoei haülabü hapbü thüng thanashi.

³Hobaje ladang ngo loulaje, kanei aoyou ong muakei dogo lenenlaje, ngei haoen la le kuan kaneibü haujem jongsak Jerusalem to künan hautikho.

⁴Hobaje ngokei haujan yingalonga haoen kü yoa haulabü.

⁵Ngokei Makedonia to hauan phaia ngo kan jungto loulabü, aishanga ngo Makedonia to haula huongda.

⁶Aingenyu, ngo laeto ong haulaje kanei ngo hangla shanga kan yoa ngo sühlep yingkei, ayingsi ngo kan yoa poang neptila thükkei.

⁷Aishanga toubüaje kan to lamoua haüyomang asühda, aishanga Bunyubouei sakkualonga, ngo kan yoa longche thünglabü.

⁸Lausikei Anjinsembou lem sühko ngo Efesiaa thünglabü;

⁹aishanga kümsilei yaang kümenlabü shanga kou ipakei, hoba dangbou juongnyu ki.

¹⁰Tokei Timoti loualonga, hao ajemtenko kan yoa thüngtiashi, aishanga ngei kümbü tegü haoei Bunyubou kümsilei kümda.

¹¹Hibü, aoeikei hao tenyiku. Lausikei hao kü jungto loutila shanga haksoa hao lamto hangashi, aishanga hao jaisina shuong yoa loula ngei chüheida.

¹²Jaisina Apolo shangabü: ngei hao jaisinasi shuong yoa kan jungto loula aeibou sukeijakei; lausikei hao tou loulaje maangto alotsap, lausikei ladang jih hopoan longlaje kheijinei hao loulabü.

¹³Pianleman kishi, mailema kaangkhühtham loashi, maang khaiashi, hau kishi.

¹⁴Kanei kümbü pendou sanoua kümshi.

¹⁵Jaisinasi shuong, kanei Stefana chemdang ngeakei; Akhaiaa haoen songlela lotbü shaangbou hoba haoenei Mühghaü mütshuong thuila shanga jembü lolo khümbo kukei.

¹⁶Kanei kheibü müt phanga hoba Bunyubou kümsilei thuiko kümbüleibü pendou phanga kijan dogo ngei kan to sudajada.

¹⁷Hobaje Stefana, Fortunata hoba Akhaika lousi ngo olinda, aishanga kanei apenasoubü haoenei kukei;

¹⁸aishanga haoenei kü soushou hoba kaneibü soushou haksotikei. Hibü kanei kheibü müt ngeashi.

¹⁹Asiaa lashong danei kan la salem küntida. Aquila si Priskaei, hoba haosi chema kambü shuongei Bunyuboua kan la salem küntida.

²⁰Saopobü shuong pendouei kan la salem küntida. Saopobü sembung shepyobüei salem kuyoashi.

²¹Ngo, Paulei jembü ikei dobü salem küntida.

²²Müt atei Bunyubou asanoulonga hao to shedsikhau baushi! Kaiya, O Bunyubou!

²³Bunyubou Jisu onou kan yoa kishi.

²⁴Khrista Jisua ngeibü sanou kan pendou yoa kishi. Amen.