Read Chang Naga 1 KORINT 2 Bible Online

1 KORINT 2 - Chang Naga bible

1 KORINT 2

¹Kho tegü, jaisinasi shuong, ladang ngo kan jungto loukei, sheten shanenbü ngüh ayingsi songsihon yaangbüei ngo kan jungto Mühghaü huphang ngüh phinthonla alou.

²Ngo kan yoa kijinei Jisu Khrista, hoba hao peiseia thüngbü to liman ngei kan yoa lubü aikei ngela ajanen.

³Ngo kan yoa ponpendou hau akibü hatbü hoba aeibou lühbüa kikei.

⁴Hobaje kan mailema müteibü songsihona lotila shanga aying,

⁵lausikei Mühghaü seia lola shanga, kü ngüh hoba ngeibü songlen suletbü songsihona aying, lausikei Soushou ngühchung hoba seia kikei.

⁶Haü, küneikei chingbü yoa songsihon ngühyem jungeida, lausikei ho kaodak songsihon ayingsi kaodak songdakbü, aoyou lejim akibü la yeida, haoeneibü songsihon aying.

⁷Lausikei laobou huan kibü songsihon Mühghaüei kaodak moyaüjinei thama sen soneikangtila shanga takletkukei, kho künei Mühghaü huphang ngüha lauda.

⁸Ho kaodaka songdakbü aoeikei ho songsihon aditen; haoenei kho ditenkei tegüje, haoenei soneikangbü Bunyubou peiseia tethüngkhoulabü;

⁹lausikei Laishibaei laubü tegü, “Ai müteibü nyekei ühüp hoba nouei adit, hoba müteibü maangpon to üt, kho Mühghaüei hao sanoubü shuong la lamlekukei.”

¹⁰Mühghaüei Soushou khübü kho sen jungto tang khittikei. Soushouei dambü pendou, khei Mühghaü dambü haübükei ngeda.

¹¹Aishanga müt to kibü soushou to liman müt yoa aoei müteibü dambü ngeda? Kho tegü Mühghaü Soushouei ong Mühghaü dambü ngeda.

¹²Mühghaüei sen la lai ong onouko kukei kho ngelabü lele senei kaodak soushou asunglet lausikei Mühghaü ka loubü Soushou sungletkei.

¹³Habü ho senei lauda, lausikei müteibü songsi- honei lenbü ngüh aying, lausikei Soushouei lenbü ngüha soushou dambü shuong soushou mütshuong la wanenko lenda.

¹⁴Kaodak müt lansaneije Mühghaü Soushou hangsilam asungletda; aishanga khübü kho hao shanga lejim akibü ki; haoei khübü ditenla athük aieilausi khübü kho soushouei ong lenenda.

¹⁵Soushou mütei ajanjan pendou takteiko jemenda, lausikei aoeikei haomat jemla athük.

¹⁶Laishibaei laubü tegü, “Maimaitham aoei Bunyubou maangpon ngekei? Aoei hao la lenla?” Lausikei sen to Khristaeibü maangpon ki.