Read Chang Naga 1 KORINT 6 Bible Online

1 KORINT 6 - Chang Naga bible

1 KORINT 6

¹Kan yoa atei jaisina khulimbo mat hapsi, Mühghaü mütshuong phoyoan songalebü matjemshang to haula maang yaangenda lo?

²Mühghaü mütshuongei kaodak mat jemlabü dogo kanei angekei sai? Kaodak mat jemalongaje ngühmat hanbümanbü jemla kan amukei lo?

³Ho chaangbou langkei shangabü laula phoyoan senei khuthük hangangbü shuong mat jemlabü dogo kanei angekei lo?

⁴Haü, ho kaodakbü hangalama matjemla kisi kanei lashonga nyen akibü shuong la mat jemtilep lo?

⁵Ngei ho kan himoutila lauda. Jaisina kanglanga ngühsak nepbü pankula kan yoa maimaitham songbüdobü ayokei lo?

⁶Lausikei jaisina si jaisina kanglanga ngühmat longjinei maialembü thedangto hauda lo?

⁷Maimaitham kan cheei che to mat angyobü hoei kan thüklangtia dogo aukabü kuda. Aeiko ajan ayingbü bouje natou! Ayingsi nakhüpettiouba!

⁸Yongbou kanei ngühmaang alanda hoba kanei khüpettida, hoba kho kanei jaisinasi shuong khulimbo kümda!

⁹Asaopobüei Mühghaü Sangle phet aphanlabü dogo kanei angekei lo? Kan tehuonetti; peja- pelabü yingsikei, heangsho lembü yingasikei, asangalanbü yingasikei, bousu kanglanga amaibü jungeibü yingasikei,

¹⁰kokbü yingasikei, nyekdüh maangdüh yingasikei, ihjakbü dan yingasikei, nyikubü yingasikei, koklangsolangbü yingasikei, khübü aoeikei Mühghaü Sangle phet aphanlabü.

¹¹Hobaje kheibü kho kan yoa at kiteikei; lausikei seneibü Bunyubou Jisu Khrista nyen danko hoba seneibü Mühghaü Soushouei kan sakena, kan saüena, kan Mühghaü junga mat maia.

¹²“Kü shanga pendou janbü” lausikei pendouje ku aki. “Kü shanga pendou janbü” lausikei ngo ai aaolakei ayeilabü.

¹³“Shausiyung kho shiang shanga, hoba shiang kho shausiyung shanga” lausikei Mühghaüei ham mautilabü. Mang kho asangalanbü shanga ji lausikei Bunyubou shanga, hoba Bunyubou kho mang shanga;

¹⁴Mühghaüei Bunyubou langngaitikei hoba haoeibü seiei senkei langngaitilabü.

¹⁵Kaneibü mang kho Khrista mang küksi- huo dogo kanei angekei lo? Kholonga ngei Khrista mang küksihuo ka at sungjung hauan suonlambü mang cheeibü küksi- huo la yeitilep lo? Ladangkei aying!

¹⁶Aoei suonlamnyu to jamlaje sao to phe chela yeida dogo kanei angekei lo? Aishanga Laishibaei lauda, “Haosi ham phe che ong yeilabü.”

¹⁷Lausikei ao Bunyubou to thangjamda hao yoa soushoua che ong.

¹⁸Asangalan ka satenashi. Mütei shonbü lubü shabü pendou haoeibü manga athonkei, lausikei aoei ong asangalanbü jungeilaje haoei jembü mang khulimbo shabü shonda.

¹⁹Kaneibü mang kho kanei Mühghaü ka sungletbü kan to kibü Soushou Saopobü lembüchem dogo kanei angekei lo? Kan jembüeibü aying;

²⁰kan muei jekkei. Hibü kaneibü manga Mühghaü soneikangtiashi.