Read Chang Naga 1 KORINT 7 Bible Online

1 KORINT 7 - Chang Naga bible

1 KORINT 7

¹Tou kanei dobü hangsilam shangabü kho hai: Bousuei yaksa to ajambü maibou.

²Lausikei suonlambü hainyu kisije, bousu wekoei jembü yak phojan hoba yaksa wekoei jembü lao kijan.

³Laoei yak la chemkan phejan kujan, hoba yakeikei lao la kho tegü kujan.

⁴Yak kho jembü mang thüka bunyu aying, lausikei lao kho bunyu; hoba kho tegü lao kho jembü mang thüka bunyu aying, lausikei yak kho bunyu.

⁵Kanei welaua hautak neplabü lele, liko ngühthang yenan hoba jihsiphai che to liman kanei cheei che la ai kujan ki kho tesenet; hoba ühüpyola anatenbü shanga Satanei kan atakteitila shanga nyibou liko haüyoashi.

⁶Ho shangabü ngei ngühkhüm tegü ayingko daman chühkubü hangeilamei lauda.

⁷Ngei müt pendou ngo tegü ong yingtimang sühda; khei yingsikei mütpem weko Mühghaü ka jongsak atei denche, atei denche hapda.

⁸Ngei chem akanbü hoba latnyu shuong to lenda khei ngo tegü kila haoen shanga maikei.

⁹Lausikei haoenei jembü mang aseneten longa, haoen chem kanashi; aishanga dühbü juokbü toje chem kanbü maibou.

¹⁰Lausikei ngei chemkanbü shuong la ngühkhüm kuda (khei ngei ji, lausikei Bunyubouei ngühkhüm kuda), khei yak cheei lao ka abangjan,

¹¹hoba lao cheei hao yak asattijan. Yak cheei bangalonga, sao laolamla ohauko kitiashi, ayingsi lao to paplepashi.

¹²Lubü shuong to, Bunyubouei ayingko ngei lauda, jaisina cheei song alebü yak che kisije, hoba saoei hao to athakko kila maangangsije, haoei sao kho tesatti;

¹³hoba yaksa cheei song alebü lao che kisije, hoba haoei sao yoa khei kimang sühalonga sao lao ka tebang.

¹⁴Aishanga maialembü lao kho yak danko Mühghaüeibü ki, hoba maialembü yak kho lao danko Mühghaüeibü ki.

¹⁵Lausikei song alebouei bangmang sühsije, hao sattiashi. Kho tegübü thua mailembü jaisina ayingsi nousina akhühkei. Lausikei Mühghaüei kan sangmaia kila shanga ngakei.

¹⁶Aishanga, O chembunyu, nyi lao khümenla si akhümenlaje nyi lai ngekei? Ayingsi, O chembubou, nyi yak khümenla si akhümenlaje nyi lai ngekei?

¹⁷Lausikei mütpem weko Bunyubouei hao la jongsak kubü thüng hoba haoei Mühghaü ka sungletbü ngabü thüng langkei kijan. Ho ngei lashong pendoua sakkubü ngühkhüm ki.

¹⁸Müt at kipan kijinei ngakei sai? Hao akipbüla yeila hautejem. Müt at akipbo kijinei ngakei sai? Haoei tekip.

¹⁹Kipbüa ai aki, akipbüakei ai aki; lausikei Mühghaü ngühkhüm jungeibüa kakkei.

²⁰Mütpem weko hao ai thua kijinei ngaa, kho tegü kiashi.

²¹No aaola lean kijinei ngakei sai? Kho tedamei; no dongebü yeila thükan kiasikei aeiko aaothu kümsilei kümashi.

²²Aishanga ao Bunyuboua aaola lean kijinei ngakei, Bunyubouei dongebü yeitibou kho hao; hoba kho tegü ong dongebü müt, ladang hao ngadaje Khrista aao yeida.

²³Kan muei jekkei. Müteibü aao la teyei.

²⁴Jaisinasi shuong, mütpem weko hao ai thua kijinei ngakei, kho tegü ong Mühghaü yoa kishi.

²⁵Chem akanbü shuong shangabü ngei Bunyubou ka ai ngühkhüm aki, lausikei ngo, maanglemenla Bunyubou ka üeisanou hapbü tegü ngei dambü lenkho.

²⁶Tou khonsak kiasikei, mütpem weko hao lai ki, khei kila maikei dogo ngei damda.

²⁷Nyi yak ngaakei sai? Bangla tedam. Nyi yak angakei sai? Yak ngala tedamei.

²⁸Nyi chem kanalonga nyi shabü ashonda; hoba medeiei laolamla hausije, saoei shabü ashonda. Lausikei aoyou chemkanda haoenei ho langkeia khonsak juongnyu haplabü; hoba ngei kan khüka satentimang sühda.

²⁹Jaisinasi shuong, ngei kan la ho lenda: jihsiphai khama nyanga; tou ka jaüan yak kibü shuongei akibü him yeishi,

³⁰hoba aoyou haapda haoen ühaapbü maimai yeishi, olinbü shuongei haoen aolinbü maimai yeishi, aoyouei jekda haoenei ai akibü maimai yeishi,

³¹hoba aoyouei kaodak jungeida haoenei kheinyu ajungeibula yeishi; aishanga tou kibü kaodak ho süng ashonlabü.

³²Ngei kan maangmau songoktimang sühda. Chem akanbü mütei Bunyubou kümsilei shangabü damda hoba haoei Bunyubou olintimang sühda.

³³Lausikei chemkanbü mütei kaodak kümsilei shanga damda hoba haoei yak olintimang sühda,

³⁴hoba hao maangpona janyinda. Medei ayingsi saosüngbü yaksaei Bunyubou kümsilei shanga damda; saoei mang si soushou hama sao haoeibü la yeimang sühda. Lausikei chemkanbü yaksaei kaodak kümsilei shangabü damda; hoba saoei lao olintimang sühda.

³⁵Ngei ho kan la onat jinyokula alauda, lausikei eaaoa kitila hoba atok akhipetko Bunyubou khangenla shanga kan maila yaangla lauda.

³⁶Müt cheei, haoeibü saosüngnyu to haangphai lamphaia ajungeida dogo damsije, hoba haoei maangdüh yongko anatensije, kümsilei ong yingalonga haoei maangangbü kümtiashi; tetlabü, haosi chem kantiashi; khoei haoei shabü ashonda.

³⁷Lausikei maangangenbü kaangbü müt aoei jembü manga maangangena, hoba haoei jembüei maangangbü khulimbo akümbo haoeibü saosüngnyu thangnyu angako phoyola maangangda, haoei kümbü kho janbü yinglabü.

³⁸Hibü aoei haoeibü saosüngbü thangnyu ngada, haoei maian jungeida, hoba aoei sao anga, haoei maibou jungeida.

³⁹Lao lang kishongko yak che kho hao phanga khühakei; lausikei lao haialonga, saoei ao jungto haumang sühdaje sao maang, lausikei Bunyubou to mailembü yoa ong sao laolamla hautishi.

⁴⁰Lausikei sao khei ong setbü olinbou yinglabü. Ho ngei dambü hoba Mühghaü Soushou kü yoa ki dogo damda.