Read Chang Naga 1 KORINT 8 Bible Online

1 KORINT 8 - Chang Naga bible

1 KORINT 8

¹Tou heangsho la okbü shausiyung shangabü: “Sen pendouei hapbüngebü” kia dogo kanei lauda; lausikei kaneibü hapbüngebü khoei müt yonglamtida, lausikei sanouei chingtida.

²Atei denche ngeakei dogo damsije haoei toukei ai ngejan yingkeije angekei;

³lausikei atei Mühghaü sanousije hao kho haoei ngeakei.

⁴Hibü heangsho la silip jakubü shausiyung shaubü shangabü, “Kaodaka heangsho ai aying, hoba Mühghaü che to liman ao aki” dogo senei ngekei.

⁵Aishanga khuthüka yingasikei, kaodaka yingasikei mühghaü dogo nyenasikei, (haü, maimaitham mühghaü juong hoba bunyubou juongnyu kia),

⁶khei yinga tegükei sen thüka Mühghaü che ong ki, ao ka ajanjan pendou ki hoba ao shanga sen lang ki; hoba Bunyubou che ong kia, kho Jisu Khrista, hoba hao danko pendou ki, hoba hao danko sen lang ki.

⁷Lausikei müt pendoueije kho angekei. Aieilausi ateije tou sühko heangsho shangabü khünjinsije, haoenei heangsho to silip jabü shausiyung dogo dambo shauda; hoba haoen sensimaang hau akisije kho shatida.

⁸Lausikei shaueiyungei sen Mühghaü junga anyangtilabü; senei ashaubü shanga dogo kongbü aki, hoba senei shaubüei dogo pailetbü aki.

⁹Lausikei kan la jankubüei hau akibü shuong aphaiyettila maangsangshi.

¹⁰Aishanga haibü shanga ngebü müt cheei no heangsho lemshanga shauko yungko hapalonga, hoba hao hau akilonga, heangsho lembü shausiyung shaula hao maang ayaangentilep lo?

¹¹Aishanga kaibü ngebü danko hau akibü jaisina, ao shanga Khrista haikei, hao mauda!

¹²Ladang kanei kho tegübüa jaisina khulimbo shabü shonda, hoba haoen hau akibü sensimaanga aktida, kheijinei kanei Khrista khulimbo shabü shonda.

¹³Hibü, shausiyungei ngeibü jaisina phaiyettialonga, ngei ngeibü jaisina aphaiyettila shanga ladangkei phe ashaulabü.