Read Chang Naga 1 KORINT 9 Bible Online

1 KORINT 9 - Chang Naga bible

1 KORINT 9

¹Ngo dongebü ji lo? Ngo youkoikjai che aying lo? Ngei seneibü Bunyubou Jisu ühüp lo? Ngei Bunyubou khangenbüa loushadbü kümsilei kan ji lo?

²Mü shanga ngo youkoikjai che habü aying tegükei kan shangaje ngo yingakei; aishanga Bunyuboua kan ngeibü youkoikjai kümsilei aukabü ki.

³Ngo takteibü shuong thedanga ngo satenshang ho ki:

⁴küneikei shaula si yungla janbü aying lo?

⁵Lubü youkoikjai hoba Bunyubou jaisinasi shuong, hoba Kaifaei tegü küneikei mailembü yak che leiyeila janbü aying si?

⁶Ayingsi Barnaba küsiei ong shiang shanga kümsilei kümjan si?

⁷Sepai cheei jembü nyaksinam shauko khangenda si? Aoei semlüh kean khoeibü mai ashauda? Aoei san shuong lombo haoen ka sendei anyatyungda?

⁸Ngei ho müteibü haua lauda sai? Ayingsi Ngühkhümakei ho alenda sai?

⁹Mosa Ngühkhüma ho doakei, “Nyi youshou nakjinei masu la sembung tekhühlepbu.” Masu shangabü Mühghaüei damda sai?

¹⁰Haoei ho maimaitham kün shangabü lauda ji si? Ho kün shangabü dokei, aieilausi sek shapbouei maanglem phoan shapda hoba nakbouei hao phejan hapla maanglem phoan youshang nakda.

¹¹Künei ka la soushou youli wenkuan phaia kaodak latsi kho kün shanga yongko dankei dogo damda sai?

¹²Lubü shuongei mangkei hai jungeijan yingalonga künei bouje aei khei jungeijan ayingsi? Khei yingankei künei kho janbü alam. Aeiko toukei Khrista Ngühlang Maibü apeksektila shanga künei ajanjan pendou aman apda.

¹³Lembüchema saopobü jungeibü shuongei lembü shauda, hoba lemshona khangenbü shuongei lemshon ka jembü phejan hapda, dogo kanei angekei lo?

¹⁴Kho tegü ong, Bunyubou Ngühlang Maibü phinthonbü shuong la Ngühlang Maibüei haoen lang kila shanga ngühkhüm kukei.

¹⁵Lausikei ngei habü ho ai ajungei, hoba kü shanga khei jungeitila ngei habü ngüh ado; aishanga kü the lenenbü amlangbüla yeitikhoulabü khantoje ngo haibü ong maibou.

¹⁶Aishanga ngei Ngühlang Maibü songlensi, ngo aikei yonglamlabü aki; aishanga kho on kü thüka ki. Aishanga ngei Ngühlang Maibü song alenlongaje, kü shanga ügütü!

¹⁷Aieilausi ngei ho maangnyu angko kümsije ngei pailetlabü, lausikei maang üangko kümalonga ho Mühghaüei kü la nongnaela nongkubü danko ong kümda.

¹⁸Kholongaje ngeibü mu ai? Ngei mu aleko Ngühlang Maibü song lenenjan; hoba Ngühlang Maibü songlenbü shanga ngeibü kusikhang ajungeilabü.

¹⁹Aishanga ngo aoeibü aao ayingsikei, ngei thükthüng Khrista shanga juong pailetla ngo müt pendoueibü aao la yeikei.

²⁰Jihudabü pailetla ngo Jihudabü junga Jihudabü la yeikei; Ngühkhüm phanga kibü shuong thedanga, ngoje Ngühkhüm phanga akisi dogokei, haoen dan pailetla shanga ngokei Ngühkhüm phanga kibü che tegü yeikei;

²¹Ngühkhüm akibü Küksithang shuong pailetla shanga, ngoje Mühghaü ngühkhüm padaka ayingko ngo Khrista ngühkhüm maanga kiasikei, ngo Ngühkhüm akibü müt che la yeikei;

²²hau akibü thedanga haoen pailetla shanga ngokei hau akibüla yeikei; haoen at ongkei khümenla shanga ngei thükbü hangsilam pendouei pendou thedanga pendou yeikei.

²³Ngei kümbü pendou kho, ngokei haülabüa penlabü lele, Ngühlang Maibü shanga kümda.

²⁴Laangyobü pendouei laangda, lausikei cheei ong jongsak hapda dogo kanei angekei lo? Kho tegü kanei thükbü hapla shanga laangashi.

²⁵Louyojayobüa tokyobü pendouei ajanjan pendoua jembü lolo thepetda. Haoenei kho athabou khun hapla kümda; lausikei senei thabou khun hapla shanga jembü lolo thepetda.

²⁶Khoei ngei nyekthe phoan laangda. Ngei yei to thangbü mütei tegü ngei alongyoda.

²⁷Lausikei ngei mü to songlenan phaia ngo amuko apbula dogo, ngei kü manga thepetda, hoba khoeibü aao la yeitida.