Read Chang Naga 2 KORINT 1 Bible Online

2 KORINT 1 - Chang Naga bible

2 KORINT 1

¹Ho le, Mühghaü maangangbüei Khrista Jisu youkoikjai Paul, si Jaisina Timoti ka Korinta kibü Mühghaü lashong hoba Akhaia khümboa Mühghaü mütshuong pendou jungto.

²Seneibü Bou Mühghaü hoba Bunyubou Jisu Khrista ka kan jungto onou yingshi.

³Seneibü Bunyubou Jisu Khristaeibü Mühghaü hoba Bou, üeisanou, hoba hakso pendou Mühghaü sangko kishi.

⁴Künei jembü lolo Mühghaü ka ai hakso hapda, kho haksoei khonkua aoyou ki, künei haksoentila shanga haoei kün khonku pendoua haksotida.

⁵Aishanga Khrista khonku danko ailai kün khonku juongnyu ki, kho tegütham Khrista danko kün haksokei juongnyu ki.

⁶Lausikei kün khonkualonga, kho kaneibü hakso hoba khümenbü shanga ki; ayingsi kün haksoalonga, kho kaneibü hakso shanga ki; künei natbü khonku jeteibü kho kanei natenjinei, kho haksoei kan to kümda.

⁷Hobaje ailai kan khonkua yoan ki, kho tegü ong haksoakei yoda dogo künei ngesi küneibü maanglem kün shanga kangkhühtham ki.

⁸Jaisinasi shuong, Asiaa kün to ai khonku haüthükei kho shangabü künei kan la ngetimang sühda: haoenei küneibü hauei ajemaphambo, yongkotham atshaian khonkutisije küneibü langkei kei maanglem akiko kikei.

⁹Haü, künei jembü to maialemlabü lausikei haibü shuong langngaitibou Mühghaü to mailemla shanga kün jembü to haibüei sühlanglabü dogo dambei.

¹⁰Lausikei haoei kün kho hatlabü haibü thu ka püetkei, hoba haoei kün püetlabü. Hobaje kanei kün shanga welaukubü danko kün tokei püetlabü dogo künei hao to maanglemda. Kheijinei haoei kün to onoubü shanga, kün nyena müt juongeibü nyensangbü welau Mühghaü junga sühlanglabü.

¹²Kün the lenenbü kho ho, künei kaodak thedanga, hoba kongnyu leko kan yoa küneibü himjama, Mühghaü ka hapbü saopobü hoba tükdebü hangeilamei künei jungeia dogo küneibü seneimaangei ngühchung kuenda. Künei ho kaodak songsihonei aying, lausikei Mühghaü onou seiei kümbei.

¹³Aishanga künei kan jungto kanei aweenlabü lele ayingsi aditenlabü ai adoda. Hobaje ngei maanglemda,

¹⁴kanei kün thodak ong ditenan kibü kho penkosouko ditletlabü, hoba Bunyubou Jisu Chaloua künei kan shanga the lenenla kibü tegü, kaneikei kün shanga the lenenlabü.

¹⁵Hobaje ngei kho mailemetnyu shaangla kan pean chühla ngei ditletkei. Lausikei ngei kan la den nyia haptimang sühko damenkei.

¹⁶Hobaje kan danko Makedonia to hauko hoba tokei Makedonia ka kan jungto nopmaiko kanei ngo Jihuda kaodak to haubü wakoua lam to hanglabü dogo ngei maangangenkei.

¹⁷Maimaitham, ladang ngei ho maang- angenkei, ngo dambü jeileibou dogo lenenda sai? Ayingsi jih chenei ong ngei “haü” hoba “ji” dogo lauko kaodak hangeilamei janthetda sai?

¹⁸Mühghaü ailai ngühmaang lauko ki, kho tegü kan jungto küneibü ngüh “haü” hoba “ji” dogo aying.

¹⁹Aishanga Mühghaü shou, Jisu Khrista, ao künei, ngo hoba Silvana hoba Timotiei kan yoa songlenkei, hao “haü” hoba “ji” dogo aying, lausikei Mühghaü “haü” hao to ki.

²⁰Aishanga Mühghaü thekubü shuong den ladüng ong kilaje pendou Khrista to “haü” dogo ki. Hibü tou Mühghaü soneikangbü shanga künei Khrista danko Amen dogo lauda.

²¹Toukei kün si kan ham Khristaa hau kitibou Mühghaü ki; hoba sen naangenbou kho Mühghaü ki.

²²Hobaje haoei sen la amaaphilabü thipbukei, hoba seneibü maangpona authebü künla Soushou kukei.

²³Lausikei kan to onousi, ngo Korint to alouko ngo lolo senetakei dogo, ngei kü soushou yoa aukabü lela Mühghaü ngada.

²⁴Kanei mailemjan dogo künei kan to alenda; aishanga kaneibü mailem kaangetsouettiakei. Lausikei künei kan olinbü shanga kümdaleida.