Read Chang Naga 2 KORINT 11 Bible Online

2 KORINT 11 - Chang Naga bible

2 KORINT 11

¹Ngo hansho ngoushangbüa kanei kü to natenashi; tou dogokei kanei natenda.

²aishanga ngei Mühghaü nyekshat maangshatei kan shanga nyekto shatkuda. Aishanga ngei kanei hinseibü saosüngnyu medei tegü Khrista to kimbei hoba jimbütangbü lao tegü, kan hao la kuan apbei.

³Lausikei ailai pinyuei haoeibü huonsiyouei Ev khüpettikei, kho tegü kan Khrista aenei kibü tükdebü hoba hinseibü ka kaneibü maang sulanglabü dogo ngo hatkuda.

⁴Aishanga künei songalenbü lubü Jisu kan to atei songlensije, ayingsi kanei shaangla asungletbü soushou phangche kanei sungletalonga, ayingsi kanei thedang to asungletbü lubü Ngühlang Maibü sungletalonga, kanei hao ka bangenla maibou.

⁵Aishanga thükkabou youkoikjai shuong to aineikei phangche ayei dogo ngei damda.

⁶Ngo ngüha seibü che ayinglakei thükkei, lausikei songadoaje lenenakei. Ho künei kan la hangsilam pendoua tang khitko lena.

⁷Ngei kan la Mühghaü Ngühlang Maibü songlenkei hoba kan ka ai ihi. Kan ngangtilabü laüa ngei ngo lolo hanbüla yeikei. Kho shabü yingan kiteikei sai?

⁸Kan khangenla shanga ngei lubü lashong ka kokbüsobü tegü mu lekei.

⁹Ngo kan yoa kongbü kangbüa kikei, lausikei aoeibü onatla ayeiti, aishanga ladang jaisinasi shuong Makedonia ka loukei, haoenei ngei khambü kukei. Hobaje pendoua kan onat ayingtila ngo aeibou jemtenkei, hoba ngei tokei khei kümlabü.

¹⁰Khrista ngühmai kü to ki yingsije, Akhaia kaodak kaijemboa ngo the lenenbü aoeikei athaktilabü.

¹¹Aila? Ngei kan asanoubüei sai? Ngei sanouda dogo Mühghaüei ngekei.

¹²Lausikei kheinyu mangsühbü dan aoyouei haoen lolo yaangenko kün to jeteibü dogo lenmangsühko chüheida haoen la kaokuok akulabü lele ngei tou kümbü tegü ong kümtang lelabü.

¹³Aishanga khübü müt shuong jembü lolo Khrista youkoikjai phatko jeienbü amlangbü youkoikjai shuong, khüpbülangbü kümbü shuong ki.

¹⁴Hobaje ho aikei maangpanglabü aki, aishanga Satanei jembü lolo ngesakbü khuthük hangangbü tegü jeienda.

¹⁵Hibü hao khangenbü shuongeikei jembü lolo saopobü khangenbü shuong tegü jeiensije kho aikei yaangbü aying. Haoen thonshang kho haoeneibü kümsilei thüng yinglabü.

¹⁶Ngei nopmaida: aoeikei ngo ngoubü dogo tedam. Lausikei kanei kheinyu damsije ngei yonglamshangko lenlabü lele kanei ngo ngoubü che tegü sungletshima.

¹⁷Ngei tou laobou yonglam khuian tegü lauda kho Bunyubou hangae lamaeka ji, lausikei ngoualouabü haangei lauda.

¹⁸Juongnyuei kaodak hangphai lamphai ka yaangenda; khülonga ngeikei aila ayaangenla?

¹⁹Aishanga kan songsihon kibü yingsije, kanei olinangko ngoubü müt to natenda.

²⁰Aishanga müt atei kan aaola yeitisije, haoei kan minshaualonga, haoei kan lapan jinalonga, haoei jembü lolo yaangenalonga, haoei kaneibü thenyek to ipalonga, kho kanei natenda.

²¹Ho shanga kün hau akitei dogo ngo himoula lenda. Lausikei atei denche shanga maimaitham yaangenmang sühalongaje (haü, ngei ngoubü che tegü lauda) ngeikei yaangenla thükakei.

²²Haoen Ibribü si? Ngokei nai. Haoen Israelbü si? Ngokei nai. Haoen Abraham thensilen si? Ngokei nai.

²³Haoen Khrista khangenbü shuong si? Ngo bouje nai. (Ngei ho dalako tegü lauda) Ngo hübümangbüa, thüngshanga, ngümbüa, haibü thusheda, aeiche haoenei angebü khonsak hapshaukei.

²⁴Jihudabü ka ngaonei sühko khujinto günei bang semshaukei.

²⁵Semnei kü to buei ngümbei, che laangei sonkei, semnei sühko long leilubüa yoan kikei, langyang hoba chalou che ngo dei thüka dantikei.

²⁶Wakoua annebenko, shusiyung thusheda, kokshau kokyung thusheda, jembü kaodak mütli thusheda, küksithang thusheda, sangnyu thusheda, ushi thusheda, yungnyu thusheda, amlangbü jaisina thusheda;

²⁷hübümangbü hoba khonkua annebenko nyeket shedbüa, müh hoba deilabüa, annebenko müheinyengbüa, khambülühbüa hoba mütkongbüa.

²⁸Ngei alenbü khonku aweko lashong pendou shanga maangmau ho kü to chalou weko nongetan ki.

²⁹Ao hau aki ngokei hau aki aying lo? Ao shabüa atetda, ngokei maang sha aleda lo?

³⁰Ngo yaangenla kümsilei yingsije, ngo kü athükamin shanga yaangenjan.

³¹Ngei amlang alauda dogo ponpen sanglabü Bunyubou Jisueibü Bou Mühghaüei ngeakei.

³²Damaskaa Areta Choba phanga kibü governorei ngo lapla shanga Damaskabü sangnyu lombei,

³³lausikei koulom danko ngo kammanga laangshang ba aiko tonletko hao ikmangka satenkei.