Read Chang Naga 2 KORINT 13 Bible Online

2 KORINT 13 - Chang Naga bible

2 KORINT 13

¹Toubü hoei semboubü ngo kan jungto louda. “Aukabü nyi ayingsi semeibü sembungei ngüh pendou jemlabü” dogo Laishibaei lauda.

²Ngo kan yoa nyibou yojinei shangied shabü shonbü shuong hoba pendou la maangsanglabü ngüh lena. Ngo tou kan yoa aki, lausikei ngei nopmaida; ngo loualonga ngei kan aphokeilabü.

³Kanei mangsühbü Khristaei ngo danko joyobü ngühchung kho ho yingkei. Hao kan aenei hau akibü aying; lausikei haoeibü seiei kan yoa kümdaleida.

⁴Hao peiseia thüngjinei hao hau akitei, yingasikei Mühghaü seiei hao la langkei kukei. Aishanga künkei hao to hau aki, lausikei kan aenei Mühghaü sei danko kün hao to lang kilabü.

⁵Kan mailema kilaoje kan lolo takteiashi. Jisu Khrista kan to kida dogo kanei angekei lo? Kheishou ayinglonga kan maimaitham mat maibü dan aying.

⁶Lausikei kün mat maitikei dogo kanei ngelabü, kho ngei maanglemda.

⁷Tou kanei amaibü aikei ajungeila shanga, hoba kün mat maitibü tegü longla shanga aying, lausikei kün athükamina lousheda tegükei, kanei maibü kümlabü lele künei Mühghaü to welauda.

⁸Aishanga künei ngühmai khulimbo aikei kümla athük, lausikei ngühmai shanga ong kümla thükda.

⁹Aieilausi ladang kün hau akida, lausikei kan hau kida, kheijinei künei olinda. Hobaje kan benbüsoubü shanga künei welauda.

¹⁰Khoei panletla aying lausikei huongyola shanga Bunyubouei kü la songdak hau kukei, kho songdak hau thüng, ngo yojineikei kaangko alaula shanga, ayojinei habü ho doda.

¹¹Thonbüa jaisinasi shuong, bangmai. Benbüsoubü kishi, haksoa kishi, maangpon chela leshi, jikophaiko kishi. Hobaje sanou hoba hakso Mühghaü kan yoa kilabü.

¹²Saopobü sembung shepyobüei salem kuyoashi.

¹³Saopobü shuong pendouei kan la salem küntida.

¹⁴Bunyubou Jisu Khrista onou, hoba Mühghaü sanou, hoba Soushou Saopobü himjam kan pendou yoa yoan kishi.