Read Chang Naga 2 KORINT 4 Bible Online

2 KORINT 4 - Chang Naga bible

2 KORINT 4

¹Hibü, künei Mühghaü üeisanou danko ho khangenbü hapsi, künei hau athetda.

²Yongbou, künei nakthüh hoba himou kümsilei pendou atheletko apa; kün ayepeiko kida. Künei Mühghaü ngüh yepeijaweko ajungei lausikei ngühmai ngesakbü to sungbada hoba müt pendoueibü sensimaanga Mühghaü junga kün lolo ngühmaanglanbü dogo lenda.

³Aishanga küneibü Ngühlang Maibü yuklepan kia tegükei, kho maulabü mütshuong ka ong yukngailangda.

⁴Mühghaü phatbüa kibü Khrista soneikangbü shangabü Ngühlang Maibü ngesakbü ühüptila shanga ho meten Mühghaüei mai alembü maangpon nyek thutikei.

⁵Künei jembü shangabü song alenda; lausikei künei Khrista Jisu kho Bunyubou ki, dogo songlenda, hoba Jisu shanga kün kaneibü sambü shuong ki dogo ngekletda.

⁶Aishanga jeteibü Mühghaü, aoei “Nakthüh ka ngesakbü hauashi” dogo laukei, haoei Khrista thenyeka Mühghaü soneikangbü ngebü ngesakbü longtila shanga kaneibü maangpona hautikei.

⁷Lausikei, sei yaangbou kho kün ka ayingko Mühghaü ka louda dogo lenla shanga ho nyaksinam künei thamchaka thanakei.

⁸Pendou aenei kün to sangasikei kün anyitnyin, phenyemtikei lausikei maang akou,

⁹shieikei lausikei üpyo, ngüman koutikei lausikei amau.

¹⁰Jisu langkei kei küneibü manga lenenlabü lele Jisu haibü ponpendou küneibü manga thongan paida.

¹¹Aishanga Jisu langkei kün hailabü phea tang khitenlabü lele kün aoyou lang ki, Jisu shanga haibü la ponpen khümbo kuakei.

¹²Hibü haibüei kün to kümda, lausikei kan to langkeiei kümda.

¹³Lausikei kün to mailem ki. Laishibaei lauda, “Kün to mailem kikei, khoei ngei laukei.” Kün tokei kho jeteibü mailem soushou ki, hibü küneikei lauda,

¹⁴aishanga aoei Bunyubou langngaitikei haoei künkei Jisu yoa langngaitilabü hoba hao junga kün kan yoa yotilabü dogo künei ngekei.

¹⁵Ho pendou kan shangabü ki; aishanga Mühghaü onou aei juongbou to haajinei mütshuongeibü nyensangei Mühghaü soneikangbü soplabü.

¹⁶Khoei kün hau athetda. Tangkabü müteibü phe hangasikei, kün maangkabü müt chaangboua haansangla yeida.

¹⁷Küneibü khonku songoktham hoba chale shanga ong, lausikei hoei kün shanga thon akibü atakenbü soneikangbü atshaibü lamlekuda;

¹⁸aishanga künei hapbü peisilei to aying, lausikei ühüpbü peisilei to chühda. Aiyei lausi ai hapda, kho chale peisilei; lausikei ühüpbü peisilei kho lole.