Read Chang Naga 2 KORINT 5 Bible Online

2 KORINT 5 - Chang Naga bible

2 KORINT 5

¹Aishanga kün kaodaka kishang, ho neichem leilualonga, Mühghaü ka, ikei akümbü, küneibü ponpen thon akibü khuthüka kibü chem che kia, dogo künei ngekei.

²Khüto yoko, küneibü khuthükbü kishanga neiei tegü huomlepla shanga ngühko chüheida.

³Aieilausi ladang kün huomleplaje kün mütkong ühüplabü.

⁴Aishanga kün ho pheeibü neichema kijinei künei onat la yeiko ngühda. Künei hangbü mang mautimang sühbü aying, lausikei maulabü kho langkeiei suian aptilabü lele haanbou che kho püetan phomang sühda.

⁵Mühghaüei nyekchüha lamlekei, hoba loula kibü shanga pienbü si authebü tegü haoei künla Soushou kukei.

⁶Hibü ponpen kün maang khaiyettiakei, aishanga künei ho mang chema pak shongko Bunyubou ka bangan ki dogo künei ngekei.

⁷Kün hapbüei ayingko mailemei paida.

⁸Kün maang khaiyettiakei, dogo ngei lauda, hoba mang ka bangan kian Bunyubou yoa chema kila bouje maikuda.

⁹Hibü kün chema kiasikei, akisikei, hao maang haitila nyekchüh ki.

¹⁰Aishanga mütpem weko manga kümbü kümsilei thüng, maibü yingsikei amaibü yingsikei hapla shanga sen pendou Khrista matjemshanga lolabü.

¹¹Künei mütshuong suletla haujemda aieilausi Bunyubou to hatlabü kho ai yingkeije künei ngeakei. Mühghaüei kün khümbomeiko ngeakei hoba ngei mailemda kaneikei kün ai yingkeije ditenakei.

¹²Künei nyibou kan thedanga jembü nyen asangngaida; lausikei aoyou maangpona ayingko hesihang shanga yonglambü shuong thedanga kan the lenenko jongaishang kitila shanga laukuda.

¹³Kün dalasikei kho Mühghaü shanga; hoba kün mütsang maangpona kiasikei kho kan shangabü.

¹⁴Khrista sanouei kün thungeida, aieilausi pendou shangabü che haikukei, hibü pendou haibüa yokei dogo künei damenkei.

¹⁵Aoyou lang ki haoen jembü shanga touje lang akilabü lausikei ao haoen shanga haikukei hoba langngaikei, hao shanga hao langkei kijan, ho shanga hao pendou shanga haikei.

¹⁶Hibü tou ka jaüan künei aokei kaodak hangae lamae ka aphanda. Künei phe aedang ka dambo Khrista ngeasikei, tou künei hao kho hangae aphanda.

¹⁷Hibü müt at Khristaa kisije hao haansang bakbü; hangbü dana, chühashi, haanbou kho louakei!

¹⁸Hobaje Mühghaü, aoei jembü to kün Khrista danko jitiphaitikei, hao ka pendou ki; hoba jitiphaitibü songlen kümsilei kün la kukei;

¹⁹khei khunak shousi la haoeibü shedbü aweeiko khunak shousi jembü to jitiphaitiko Mühghaü Khristaa kikei, hoba jitiphaitibü ngüh kho songlenla kün la kukei.

²⁰Hibü kün Khrista shanga lambubou shuong ki. Mühghaüei kün danko sudajada: Mühghaü to jiaphaiashi dogo Khrista nyena künei kan to sudajada.

²¹Khristaei shabü ange. Yingasikei senei hao danko Mühghaü saopobü janyola shanga Mühghaüei hao sen nyena shabü la yeitikei.