Read Chang Naga 2 KORINT 6 Bible Online

2 KORINT 6 - Chang Naga bible

2 KORINT 6

¹Mühghaüeibü thujam khangenbü shuong tegü, künei kan to Mühghaü onou jim akibüa tesunglet dogo sudajada.

²Aishanga haoei lauda, “Maangshikbü jihsiphaia ngei ka to ditkukei; hoba khümenbü chaloua ngei no thuikei.”

³Aoeikei küneibü khangenbü kümsileia shedbü ühüptilabü lele künei ao hangakei phaiyet laang aphokuda.

⁴Lausikei Mühghaü khangenbü tegü künei pendoua jembü lolo muakei dogo lenenda: natenbüa, khonsaka, lai alebüa, khonkua,

⁵ngümbüa, thüngbüa, lemenbüa, kümsilei sekbüa, hübütoubüa, nyeket shedbüa, mühei nyengbüa;

⁶hinseibüa, ditenbüa, amenbüa, üeisanoua, Soushou Saopobüa, maanglanbü sanoua,

⁷ngühmaia, Mühghaü seia, nanae mae shanga saopobü insiaubuei;

⁸soneikangbü hoba aweasüngbü danko, amaibü ngühlang hoba maibü ngühlang danko, kün khüpbülangbü tegü weeikei, lausikei kün ngühmai;

⁹kün wela ale, lausikei maisho ngebü; kün haibü tegü, lausikei kün lang kia; shieikoekei lausikei kün ühaiti;

¹⁰kün maang ngangbü tegü lausikei kün ponpendou olinyoda; kün shalebü lausikei künei juong keitikei; künei ai aki, lausikei künei pendou ki.

¹¹Korintbü shuong, künei kan to asukatembo lauda, künei maangkou ipakei;

¹²künei kan ka küneibü sanou asenngaida, lausikei kanei kün ka senngaida.

¹³Tou kaneikei sepeiko kaneibü maangponkei hopale ipashi. Ngei bouei shousi shuongto laubü tegü lauda.

¹⁴Maialembü bulenga apausapbo chela telengyo. Aishanga shabü yoa saopobü ainei jienkei? Hobaje nakthüh yoa ngesakbü ainei jikei?

¹⁵Hobaje shabü mühghaü to Khrista ainei thangjam ki? Ayingsi maialembü yoa mailembü ai phejan ki?

¹⁶Hobaje heangsho to Mühghaü Lembüchem ainei jienkei? Aishanga sen langkeibü Mühghaü Lembüchem. Mühghaüei laubü tegü, “Ngo haoen to kilabü hoba haoen yoa pailabü; ngo haoeneibü Mühghaü, hoba haoen kü mütshuong yinglabü.

¹⁷Hibü haoen yoka longenashi hoba haoen apyoashi, dogo Bunyubouei lauda; asaopobü to temeiti; hoba ngei no sungletlabü,

¹⁸hoba ngo kaneibü Bou yeilabü, hoba kan ngeibü jayang nouyangshou shuong yeilabü, dogo Thükenbü Bunyubouei lauda.”