Read Chang Naga 2 KORINT 8 Bible Online

2 KORINT 8 - Chang Naga bible

2 KORINT 8

¹Jaisinasi shuong, Mühghaüei Makedonia lashong dan la kubü onou shangabü ngei kan la ngetimang sühda.

²Haoen khonsak kaangbüei takteikei, yingasikei kho kanglanga mangkei haoeneibü olin haakei; hoba haoen atetbou shaleasikei, maangmai kubüa haoen aeibou maangnyu angko kiteikei.

³Aishanga haoenei hapbü thüngei hoba khüto limankei thuila kukei dogo ngei kan to lenla thükakei. Haoenei lolo maangangenbüei,

⁴kho maangshik shanga, hoba Mühghaü mütshuong to thuibüa thangjam shanga kün to aeibou sukeijakei.

⁵Hobaje kho, künei dambü ong aying, lausikei khüto aei, haoenei shaangboua haoen lulo Bunyubou la hoba kün la Mühghaüei maangangbü danko kukei.

⁶Hibü künei Tita to haoei ailai shaangla khangkei, kho khei kan yoa ho maangshik kümsilei kei kümsemla hao to thungeikei.

⁷Lausikei kan mailema, maangtakbüa, hoba kün to kaneibü sanoua, kan ailai pendoua haakei, kho tegü ho kubü maangshikakei haashi yaangshima.

⁸Ngei kan la ngühkhüm akuda, lausikei mü to thuila maangtakbüei kaneibü sanou maimaitham takteida.

⁹Kanei seneibü Bunyubou Jisu Khrista onou ngeakei. Hao latetche keian kiteikei! Yingasikei hao shalebü danko kan keitilabü lele hao kan shanga shalebü la yeikei.

¹⁰Hibü honei ngeibü dambü kuda. Shampo kan kula ong aying lausikei kümlakei dogo hama maangtakbü shaangbou kiteikei.

¹¹Hobaje kanei ailai maangangla lamlean kiteikei, kho tegü kaneibü hau thüng kümsilei lamlean kila shanga, tou kümbü khokei wantiashi.

¹²Müt che khoei maimaitham kula maangdakbü kialonga, Mühghaüei haoei akibü ka ihida, lausikei haoei kula kibü thüngei haoei jongsak kho sungletda.

¹³Ngei kan to lubü shuong on soan kan naatshaila shanga lauda ji. Lausikei ho lekyenbüa künjan.

¹⁴Toubü jihaje haabü yaangbüei haoen deletkuda; nyet- cheje haoen haabü yaangbüei kan deletlabü, khei yingsije jeteibü kilabü.

¹⁵Laishibaei laubü tegü, “Aoei juong yoshaikei aeibü aki, hoba aoei shijo yoshaikei asouko aki.”

¹⁶Mühghaü, aoei kan shanga künei tegü maangtakbü jeteibü Tita maangpona phokuda, hao nyen sangashi.

¹⁷Künei thungeibü haoei maimaitham sungletkei, lausikei haoei lolo aeibou maangtakko kisije, haoei jembü maangangbüei kan jungto loukei.

¹⁸Künei hao yoa liko jaisina che, aoeibü nyensang Ngühlang Maibü phinthonbüa lashong pendoua phinthonan ki hao hautida.

¹⁹Kho ong aying, lausikei Bunyubou soneikangbü shanga hoba kün lulo maangtakbü lenenla shanga künei khangenko kibü maangshik thuibü künan hautila shanga lashong tanei küneibü wakou youjamla hao pienkei.

²⁰Toukei laobou künei nongeida, kho maangshik thuibü shombü shangabüa aoeikei künla shedbü akula shanga künei maangsangda;

²¹aishanga künei Mühghaü thedanga ong ayingko mütshuong thedangakei ai janbü ki kho kümla nyekchüh phoda.

²²Hobaje küneibü jaisina, ao to künei annebenko kümsilei juonga maangtakbü hapbei, hoba aoei tou kan yoa mailem aeibou kiko aei maangtakda, hao künei haoen yoa hautikei.

²³Tita, hao kü jambou hoba kan shanga hao kü thujambou ki; hoba jaisinasi shuong kho lashong hangangbü hoba Khrista soneikangbü ki.

²⁴Hibü lashong tan thedanga kanei hao to sanoubü aukabü, hoba künei kan shanga the lenenbü aukabü lenashi.