Read Chang Naga 2 KORINT 9 Bible Online

2 KORINT 9 - Chang Naga bible

2 KORINT 9

¹Mühghaü mütshuong to maangmai thuibü shanga ngei kan to dola akhamda.

²Thuila shanga kan latetche maangangetnyu ki ngei ngekei; ho shanga ngei Makedoniabü shuong to the lenenko lenda, hoba Akhaia je shampoa thama lamlean kiteikei dogo haoen to lenda. Kaneibü maangtakei haoen juongnyu maang bungentia.

³Lausikei ho shangabü künei kan nyen sangko laubü pendou amlangbü la ayeila shanga ngei jaisinasi shuong hautikuda. Ngei kan shanga laukubü tegütham kan lamlean kitimang sühda.

⁴Aishanga kü yoto Makedoniabü at louan kan alamleko hapalonga kün ong himou baula ayingko yongbou maanglemetnyu setteibü shanga kankei himou baulabü.

⁵Khoei ngei jaisinasi shuong kan jungto thedang to hauan kanei thekubü maangmai jongsak shuong lamleteila kümsilei dogo dambei.

⁶Ho damenashi: aoei shikkokhaiko wenda, haoei latlakei shikkokhaiko latlabü, hoba aoei apsileko wenda haoei latlakei apsileko latlabü.

⁷Mütpem wekoei jembü maangpona lai kula janthetkei kho khei kuashi, lausikei maang üangsapbo aying, tukosekko aying; aishanga Mühghaüei maangnyu angko kubü sanouda.

⁸Hobaje pendoua ponpen kan yongko souko aoko kisije, kümsilei maibü pendoua haalayaangla shanga, Mühghaüei kan la onou pendou haatiyaangtila thükda.

⁹Laishibaei laubü tegü, “Haoei maangmai shomkua, haoei shalejonglebü la jankua; hao saopobü ponpen kida.”

¹⁰Hobaje aoei youshapbou la youli kuda hoba shaula shanga wentek kuda, wenla shanga haoei kan la youli kuko haatilaü; hoba kaneibü saopobü youman haatilabü.

¹¹Hobaje ajanjan pendoua maanglansele kubüa kan haoei apsileko keitiyaangtilabü, hoba künei kümbü danko lubü shuongei Mühghaü nyen sanglabü.

¹²Aishanga kho thuibü kubü kho Mühghaü mütshuong khambüa senyühshemtibü ong aying, lausikei Mühghaü to nyensang juongnyu yeitida.

¹³Aishanga ho maangmai kubü kümsilei ho kaneibü mailem aukabü ki, hoba haoenei ho shanga Mühghaü nyen sangda; aishanga kanei Khrista Ngühlang Maibü theletbü ong aying lausikei kanei kibü pendou haoen yoa hoba mütpem weko yoa maanglansele janyo bangyobü danko kanei hao ngüha leda.

¹⁴Hobaje kan yoa shanenbü Mühghaü onou yobü haoenei haplabü hoba kan shanga sanouei welaukulabü.

¹⁵Hao alauenbü jongsak shanga hao nyen sangashi.