Read Chang Naga GALATIA 1 Bible Online

GALATIA 1 - Chang Naga bible

GALATIA 1

¹Ho le, Paul hoba hao yoa kibü jaisinasi shuong pendou ka Galatia kabü lashong dan jungto. Ngo Paulei, youkoikjai cheei tegü doda. Ngo müteibü hauei ohauti; ao müteikei ngo youkoikjai che la ayeiti. Lausikei ngo Jisu Khristaei hoba hao haibü ka langngaitibou Bou Mühghaüei yeitikei.

³Bou Mühghaü hoba Bunyubou Jisu Khrista ka kan jungto onou hoba hakso yingshi.

⁴Haoei seneibü Bou Mühghaüei maangangbü tegü tou kibü amaibü kaodak ho ka sen khümenla shanga seneibü shabü shanga jembü lolo kukei.

⁵Hao to ponpen thon akibü soneikangbü yingshi! Amen.

⁶Khrista aoei haoeibü onoua kan ngakei, hao ka lubü “ngühlangmaibü” to kanei tongde satbü hapan ngo aeibou maangpangda.

⁷Lubü “ngühlangmaibü” aikei phangche aki. Maimaitham Khrista Ngühlang Maibü süktinongtibü danei kan mangtida.

⁸Touje künei kan to Ngühlang Maibü songlenbü to liman künei yingasikei, khuthük ka khuthük hangangbü cheei yingasikei lubü ngühlang maibü songlensije hao to Mühghaü shedsikhau yingshi!

⁹Künei ho shaangla lena hoba ngei ho tou nyibou la lenda, khei kanei sungletbü Ngühlang Maibü to liman ngühlang maibü lubü atei songlena longa, hao to Mühghaü shedsikhau yingshi!

¹⁰Ho ngei müt maang haitila haujembü tegü si Mühghaü maang haitila laubü tegü ditenda? Ngei tou sühko müt olintila haujema tegüje ngo Khrista aao teyingkhoulabü.

¹¹Jaisinasi shuong, ngei kan to songlenbü Ngühlang Maibü kho müt ka pakbü aying dogo ngei kan la ngetida.

¹²Ngei ho ao ka asunglet, ayingsi ao müteikei kü la alen. Lausikei Jisu Khristaei lolo ho kü to tang khitkukei

¹³Ngei Jihuda songle jungeijinei ngo che hangbü lamnyua kibü kanei dida. Ngei Mühghaü lashong lai tet akiko shieikoekei hoba mautila haujembei kho kanei ngeakei.

¹⁴Hobaje küpi kübousi shuong shangiedbü ngühli shanga ngo aeibou maangdakko Jihudabü songlea kü mütli yoa kü himshuong juong to ngo aei theae loushangko satan kiteikei.

¹⁵Lausikei bukjineitham Mühghaüei ngo phangche pienan phoan kiteikei hoba haoei hao onou danko ngo ngakei. Hibü ladang haoei

¹⁶ngei haoeibü Ngühlang Maibü Küksithang shuong yoa songlenlabü lele kü to hao Shou tang khittila pienkei, ngei ai ong kümjan yingkeije ngei ao müt to kei apheyo.

¹⁷Ngo Jerusalem to kü thedangkabü youkoikjai shuong jungto mangkei ohau. Aeiko ngo Arabia to bouje shaang haukei. Kho phaia ngo Damaska to haan longeikei.

¹⁸Po sem danan phaia, Peter to haüyola ngo Jerusalem to angkei, hoba anthükngao nyet ngo hao yoa thüngkei.

¹⁹Lausikei lubü youkoikjai shuong, Bunyuboueibü na Jakob to liman ngei che ongkei ühüp.

²⁰Ngei kan jungto ai ngüh ong doda ho ngühmai yingkei dogo ngei thedalanda.

²¹Kho phaia ngo Siria si Kilikia kaijembü kaonyek to haukei.

²²Lausikei Jihuda kabü Khristan lashong to ngo boushou ühüpyoko kikei.

²³Haoenei ditoubü pendouei haju ong, “Sen shieikoebou kho touje haoei che mautila haujembü mailem kho songlenko paida lauda.”

²⁴Hobaje haoenei kü shanga Mühghaü nyen sangkei.