Read Chang Naga GALATIA 2 Bible Online

GALATIA 2 - Chang Naga bible

GALATIA 2

¹Po anthüklei danan phaia, ngo Barnaba yoa Tita kü yoto leian nyiboula Jerusalem to angkei.

²Aishanga Mühghaüei tang khitko lenbü shanga ngo haukei. Khulei lamleibü shuong dogo laubü yoa ngei chemphang kambü kikei hoba ngei Küksithang shuong to songlenko kibü Ngühlang Maibü kho haoen yoa wanyokei; aishanga ngei küküm küleia jim akibüa langthemang asüh.

³Lausikei kü yokabü Tita, Grikbü yingasikei, hao akipti.

⁴Ho hainyu loushadkei: khei Khrista Jisua kibü küneibü donge solo huphanga kokpheila shanga, amlangbü jaisinasi shuong kokshoua leiyetkei. Haoenei kün aao la yeitimang sühkei,

⁵lausikei künei haoen la insing che ongkei akukku. Aishanga Ngühlang Maibü ngühmai kho künei kan yoa ponpen thüngtimang sühkei.

⁶Aoyouei nyenshen dan tegü damda, haoen ai younaka kiteikeije khoei dogo kü la ai aying; aieilausi Mühghaüei the to chühko matjem akuda; hoba khübü nyenshen danei ngeibü songlen to aikei aei ashomyo.

⁷Aeiko tokei, ailai Jihudabü shuong shanga Ngühlang Maibü kho Peter la nongkukei, kho tegü Küksithang shuong shanga Ngühlang Maibü kho kü la jangkuakei dogo haoenei damenkei.

⁸Aishanga Jihudabü shuong jungto youkoikjai yingla aoei Peter ngakei, kho Mühghaüei ngokei Küksithang jungto youkoikjai yingla ngakei.

⁹Hobaje ladang haoenei kü la kubü kho ngeenkei, kheijinei Jakob, Peter hoba Johan, aoyou to lashong thaonyu dan dogo lauda haoenei ngo hoba Barnaba to thujambü amaaphilabü lenko mae ik hatyokei. Aieilausi kün Küksithang shuong jungto hoba haoen Jihudabü shuong jungto haulabü kiteikei.

¹⁰Haoenei kün la nongkubü kho: künei shalebü damenla shangabü, laobou kümsileia ngo athakko maangdak kiteikei.

¹¹Lausikei ladang Peter Antiok to loukei, ngei hao thedanga hao khulimbo lokei, aieilausi haoei mashikan kiteikei.

¹²Aishanga Jakob ka müt at aloushongko haoei Küksithang yoa shaukei. Lausikei ladang sühlangkei, hao Küksithang yo ka banglangkei aieilausi hao Küksithang shuong kiptimang sühbü dan to hatkei.

¹³Hobaje lubü Jihudabü pendouei hao yoa khanenan satkei; hoba kho tegü haoeneibü hisiyouei Barnaba leilangkei.

¹⁴Lausikei ladang haoenei Ngühlang Maibü ngühmai khünei tükde apaida dogo ngei chühenkei, ngei haoen pendou thedanga Peter to laukei, “No Jihudabü yingkei, lankei no Jihudabü aphatko Küksithang che tegü kida. Khülonga nyi aila Küksithang Jihudabü tegü kitila kausakda?”

¹⁵Haangei kün Jihudabü, hoba “Küksithang shabü shuong” aying,

¹⁶khei yingasikei, Ngühkhüm jungeibüei ji lausikei Jisu Khrista to mailembü danko ong müt che kho Mühghaü thedanga mat maitida dogo künei ngekei; hoba ngühkhüm jungeibü danko aying, lausikei Khrista to mailembü danko Mühghaü thedanga mat mailabü lele küneikei Khrista Jisu to mailem phokei. Laishibaei lauda, “Ngühkhüm jungeibüei aokei Mühghaü thedanga mat amaitilabü.”

¹⁷Ladang senei Mühghaü yoa Khrista to mat maila lameida, kheijinei sen kho Küksithang tegü “Shabü mütshuong” dogo aukabü kuda, khülongaje Khrista kho shabü khangenbou sai? Ladangkei ji.

¹⁸Aishanga ngei luan koutibü Ngühkhüm ngei phonngeialonga, ngo lolo maimaitham “Shabü müt” dogo aukabü kuenda.

¹⁹Aieilausi kü thuakei ngühkhümei kü langkei Ngühkhüm phanga thontikei. Ngühkhüm aedangka ngo Mühghaü shanga lang kilabü lele ngo haibü ki. Khrista peiseia thüngkei hoba ngo haoyoa thünga.

²⁰Touje ngo ji lausikei kü to kibou Khrista lang ki. Tou ngo phea langkei kibü hoje, Mühghaü Shou, aoei kü to sanoukei hoba hao lolo kü shanga langkei, hao to mailembüa lang ki.

²¹Ngei Mühghaü onou jim akibüla ayeitilabü. Aishanga Ngühkhüm danko müt Mühghaü yoa mat maitila thükalonga, Khrista haibü ai ngühtet aki.