Read Chang Naga GALATIA 3 Bible Online

GALATIA 3 - Chang Naga bible

GALATIA 3

¹Kan Galatiabü ngoubü shuong! Kan ai seiei mangtikei? Kanei Jisu Khrista peiseia thüngettibü kan the to louko shangashatbü hapa.

²Kü la ho ong lenbü: Kanei Ngühkhüm jungeibüei Soushou sungletkei si ayingsi kanei Ngühlang Maibü ditan mailembü ka sungletkei?

³Kan maimaitham ngouakei si? Mühghaü Soushou danko kan langkei haanbü khangkei. Kaneibü müteibü hangsilamei penbüsoubü haplep dogo damda lo?

⁴Kan jim akibüa hajuchenei khonsakkei lo? Maimaitham kheinyu yeila athük.

⁵Haoei kan la hao Soushou maangshikko kuda hoba kan to seikümseilei kümtida. Ho kanei Ngühkhüm jungeibü ka si ayingsi kanei Ngühlang Maibü ditan mailembüei ho sungletkei? Kü la lenbü.

⁶Laishibaei lauda, “Abrahamei Mühghaü to mailembei; khoei Mühghaüei hao hao thedanga saopobü dogo weeikei.”

⁷Hibü aoyouei mailemda haoen Abrahameibü tükdebü shousi shuong dogo kanei ngeashi.

⁸Laishibaei Abraham, mailembou müt shanga lauda, “Phangshuong pendou no danko haükulabü;” hoba khübü ngüh shuonga shangieda hao la Ngühlang Maibü thedang to lenteikei. Mühghaüei Küksithang shuong haoeneibü mailem danko hao to mat maitilabü jihsiphai kho hapsepan kiteikei.

⁹Hibü aoyouei mailemda, haoen pendou mailembou Abraham yoa haükuda.

¹⁰Ngühkhüm jungeienbüa maanglembü shuong pendou shedsikhau phanga ki; aishanga Laishibaei lauda, “Ladüngei Ngühkhüm Lea doan kibü pendou ngüha leko ajungeida haoen shedsikhau phanga ki.”

¹¹Ngühkhümei Mühghaü thedanga aokei mat amaitida dogo shanga shatettiakei, aieilausi Laishibaei lauda, “Mailemei saopobü shuong lang kilabü.”

¹²Lausikei Ngühkhüm si mailem kanglanga aikei phen- yobü aki, aishanga ngühkhümei laubü kho ho ki: “Ngühkhümei sakkubü aoei kümda hao khübüei lang kilabü.”

¹³Hao sen laüa shedsikhau la yeiko, Khristaei sen Ngühkhüm shedsikhau ka angthetkei, aishanga Laishibaei lauda, “Bua saübü pendou shedsikhau yingshi.”

¹⁴Abraham thüka kibü haülabü Khrista Jisu danko Küksithang thükto naloula shanga, hoba senei mailem danko Soushou Saopobü theletbü kho sungletlabü lele haoei khonsak pendou natenkei.

¹⁵Jaisinasi shuong, ngei kan la chaangbou langkei ka tetsida che kulabü. Müt nyi kanglanga theyolanyobü shanga daman chühashi. Ho müt kanglanga theyolanyobü che ong yingsikei che janthetan phaiaje aoeikei ho apla athük ayingsi ho to jinyolakei athük.

¹⁶Laishiba aeto chühalonga theyolanyobü kho Abraham hoba haoeibü youyik to kümbei. Youyik kho juong to alau. Kaibü “Youyik shuong” ayingko kaibü “Youyik” dogo laukei. Hibü ho juong to ayingko che to laukei. Hobaje che kho Khrista.

¹⁷Ngei lenmangsühbü kho ho: Po saongao leito khujin danan phaia loubü ngühkhümei shangiedbü Mühghaü thebülanbü amautida ayingsi thebülanbü kho ngühkhümei amlangbüla ayeitida.

¹⁸Aishanga senei ngühkhümei Mühghaü phetphan hapdalongaje, kho thebülanbü loushadbü ji; lausikei Abraham la Mühghaüei kubü jongsak khoje thebülanbü loushadbü ki.

¹⁹Khülonga aila Ngühkhüm kümsilei yingan kiteikei? Ho shabü shean lenla shanga kukei, lausikei ho laobou “Youli” to thebülanbü kho kümbei hao aloushongko shanga ong kiteikei. Ho khuthük hangangbü shuong danko autoatbou ikei lamletikei.

²⁰Tan chenei ongje autoatbou akhamda; hoba Mühghaü kho che ki.

²¹Kholonga Ngühkhüm kho Mühghaü thebülanbü to khulimbo sai? Ladangkei aying! Ngühkhüm kho müt langkei kitila kuan ki tegüje maimaitham kho danko Mühghaü junga mat maikhoulabü.

²²Lausikei mailemei Jisu Khrista to mailembü pendou la thebülanbü kula shanga, kaodak pendou kho shabü thüngdanga phoakei dogo Laishibaei tang khittida.

²³Lausikei mailem aloujinei sen ngühkhüm phanga thüngan kiteikei, hoba laobou mailem phaito tang khittikula kiteikei, kho shanga sen thüngan kikei.

²⁴Hibü mailem danko sen Mühghaü junga mat maitila shanga, Khrista jungto leilabü Ngühkhüm kho seneibü lamleibü yeian ki.

²⁵Lausikei mailem louabü sen touje lamleibü phanga aki.

²⁶Aishanga mailem danko kan pendou Khrista Jisua Mühghaü shousi shuong ki.

²⁷Aishanga kan lajuche Khristaa baptiko kikei, kanei jembü lolo Khrista langkei yoa hele lekei.

²⁸Jihudabü ayingsi Grikbü dogo, aao ayingsi dongebü dogo, bousu ayingsi yaksa dogo, aikei janyinbü kila athük; aishanga kan pendou Khrista Jisua che ong.

²⁹Hobaje kan Khrista mütshuong yingalonga, kan Abrahameibü youyik, hoba thebülanbü danko kan Mühghaü phetphanbü shuong ki.