Read Chang Naga GALATIA 4 Bible Online

GALATIA 4 - Chang Naga bible

GALATIA 4

¹Ngei laubü kho ho: müt cheeibü shou kho peisilei khümbo thüka phetphanlabü che yinglakei thükkei, lausikei hao in athon shongkoje hao aao che to aikei lulu aying;

²lausikei hao bouei thekubü jih asühshongko nashou kho lombü shuong hoba ikjaibü shuong phanga ki.

³Hibü seneikei khei: ladang sen nashoua kiteikei, senkei shangiedbü kaodak soushou haangeibü aaola lekei.

⁴Lausikei ladang jih tükdebü sühkei, kheijinei senei tükdebü shoumai yeibü den khümbomeiko sungletlabü lele Ngühkhüm phanga kibü shuong angla shanga Mühghaüei Ngühkhüm phanga bukbü, hoba yaksa cheei bukbü hao shou hautikei.

⁶Hobaje kan shousi shuong dogo lenla shanga, Mühghaüei hao Shoueibü Soushou, “Aba, Abou,” dogo ngekko seneibü maangpon to hautikukei.

⁷Hibü touje kan aao aying lausikei shou che ki; hoba shou yingalonga, kheijinei no Mühghaü danko phetphanbou ki.

⁸Lausikei jih chenei kanei Mühghaü ange, kheijinei aoyou haangei mühghaü shuong aying, haoen phanga kan aaola lekei;

⁹lausikei tou kanei Mühghaü ngejinei, ayingsi khei Mühghaüei kan ngejinei, kan ho kaodak hau akibü hoba lejim akibü shaangbou song, laobou phanga kan nyiboula aao tegü yeimang sühda, khito kanei aila nyibou sepeida?

¹⁰Kanei chalou shuong, lit, jihsiphai hoba po nouda.

¹¹Ngo kan nyena hübümangbü pendou jim akibü la yeitilep dogo ngo jemtenda.

¹²Jaisinasi shuong, ngo tegü yeishi dogo ngei sudajada, aieilausi ngokei kan tegü yeiakei. Kanei kü to ai shedbü aküm;

¹³lausikei manga athükamin yingsije, ngei shaangla kan to Ngühlang Maibü songlenkei dogo kanei ngekei,

¹⁴hoba kü phea athükaminei kan takteiko kiasikei kanei anyiku ayingsi apilet, lausikei Mühghaü khuthük hangangbü tegü, khei ngo Khrista tegütham kanei ngo sungletkei.

¹⁵Kan olinbü tou lanei ki? Thükda laubü habü tegüje, kanei jembü nyeklang phekenan kula mangkei maangangko kiteikei dogo ngei kan to aukabü leda.

¹⁶Hibü ngei kan to ngühmai laubü hangshong ngo kaneibü dangbou la yeia sai?

¹⁷Kü thangbou shuongei kan aicheküman maangdakei lamda lausikei janbü hangalama aying; aieilausi kanei haoen to maangdakla shanga haoenei kan kü ka bangtimang sühda.

¹⁸Janbü shanga ong yingalonga, ngo kijinei ong ayingko ponpendou lubü shuongei kan to maangdakbü kho maijemaikei.

¹⁹Kü shousi shuong, kan to Khrista alongshongko, ngo nabuk shatei nyibou shatda.

²⁰Ngo tou kan yoa yoan kü ngüh jeileiama dogo damda, aieilausi kan shangabü ngo aeibou maanga shuda.

²¹Kan ngühkhüm phanga kimang sühbü dan, kü to lenkai, kanei Ngühkhüm kho ajungeilep lo?

²²Aishanga Laishibaei lenda, Abrahamei shousi nyi kikei, aao saoei che, hoba tükdebü yakei che.

²³Lausikei aao saoei bukbü kho phe tegü bukkei, hoba tükdebü yakei bukbü kho thebülanbü danko bukkei.

²⁴Hanei huphang ngühtet kia; yaksa nyi kho theyolanyobü nyi shanga lenda. Haosi yoa che Sinai shongh ka louyenda, hoba saoeibü youyik kho aaothu la yeilabü; sao kho Hagar.

²⁵Hagar kho Arabiaa Sinai shongh ki. Sao Jerusalem shanga loda, aishanga Jerusalem kho saoeibü shousi shuong yoa aao thua ki.

²⁶Lausikei tükdebü yak kho khuthükbü Jerusalem shangabü ngühtet hoba sao kho seneibü nyu.

²⁷Aishanga Laishibaei lauda, “Angkong sao, no shousi abuknyu yingsikei olinashi, no nashat alongsikei kaangbang wiko ngekashi; aishanga lao kibü yaksa toje, nyushou apyobü saoei shousi juongbou ki.”

²⁸Lausikei jaisinasi shuong, Isak tegü kan thekubü shousi shuong ki.

²⁹Lausikei shangied ailai phe tegü bukbü nashou shieikoekei, kho tegü toukei ki.

³⁰Lausikei Laishibaei ai lauda? “Aaosao hoba saoeibü shou shian sattiashi, aishanga aao saoeibü shousiei tükdebü yakeibü shou yoa phet aphanlabü.”

³¹Hibü jaisinasi shuong, sen aao cheeibü shousi shuong aying, lausikei tükdebü yakeibü shousi shuong ki.