Read Chang Naga GALATIA 6 Bible Online

GALATIA 6 - Chang Naga bible

GALATIA 6

¹Jaisinasi shuong, müt che shedbü aineiche lapa tegükei, kan soushou kibü danei jembü shanga damanchühko, jembü bouje takteisi amaibüla dogo, sembüambü soushouei kheibü müt tangtikuashi.

²Jenabou si jenabou on künyoashi, hoba khei kümbü danko kanei Khrista ngühkhüm haüthükkulabü.

³Aishanga müt cheei ai ayingnyu hao phangche tegü limshangan damsije, haoei jembü lolo khüpettida.

⁴Lausikei mütpem wekoei jembü kümsilei takteiashi; kheijinei mü shanga aying, lausikei haoei jembü shanga nyensang haplabü;

⁵aieilausi mütpem wekoei jembü on künjan.

⁶Aoto ngüh kho lenan ki haoei peisilei maibü pendou lenbou to janyoashi.

⁷Kan lolo tehuonet; Mühghaü aweasüngko aying. Aishanga müt cheei ai wenlaje haoei kho latlabü.

⁸Aoei jembü phea wenlaje haoei phe ka maubü latlabü; lausikei aoei Soushoua wenlaje haoei Soushoua ponpen langkei latlabü.

⁹Hobaje senei maibü kümbüa tuotenongkho, aishanga senei maang akoulonga, jiha- phaia latlabü.

¹⁰Hibü hangsilam ong longalonga, müt pendou shanga hoba kongnyuleko mailembü shuong shanga maibü kümbho.

¹¹Ailai dopem yaangbüei jembü ikei ngei kan jungto dokei, kho chüha!

¹²Lajucheei phea the lenenmang sühda, haoenei kan kiptila haujemda, lausikei Khrista peisei shanga haoenei shieikoe ühüpla shanga ong kho kümda.

¹³Tokei aoyou kipbüla yeida haoenei jembü lolo Ngühkhüm ajungeida, lausikei haoenei kaneibü phe shanga yonglamla kiptimang sühda.

¹⁴Lausikei seneibü Bunyubou Jisu Khrista peisei, laobou danko kü aenei kaodak hoba kaodak aenei ngo peiseia thünga, kho peisei to liman ngo aineikei ayaangenlabü.

¹⁵Aishanga müt haanbü la yeibü to liman kipbü yingsikei akipbü yingsikei ai aki.

¹⁶Hobaje lajucheei ho ngühkhümei pailaje, haoen thüka hoba Mühghaü Israel tan pendou thüka hakso hoba üeisanou yingshi.

¹⁷Tou ka jaüan aoeikei ngo khon tesakti: aishanga ngei kü manga Jisu nali shuong künda.

¹⁸Jaisinasi shuong seneibü Bunyubou Jisu Khrista onou kan soushou yoa kishi. Amen.