Read Chang Naga EFESIA 1 Bible Online

EFESIA 1 - Chang Naga bible

EFESIA 1

¹Ho le, Mühghaüei maangangbü danko Khrista Jisu youkoikjai Paul, Efesiaa kibü saopobü dan hoba Khrista Jisua maanglemenbü Mühghaü müt shuong jungto.

²Seneibü Bou Mühghaü hoba Bunyubou Jisu Khrista ka kan jungto onou hoba hakso yingshi.

³Seneibü Bunyubou Jisu Khristaeibü Bou Mühghaü, aoei khuthük kishang ka Soushou haülabü pendouei Khristaa sen haükua, hao nyen sangashi!

⁴Sen hao thedanga sanoua saopobü hoba shedbü akiko kila kaodak moyaüjinei haoei sen Khristaa pienkei.

⁵Hobaje haoeibü onou, laobou haoei sanoubüa sen la maangmai kukei, kho onou soneikangbü nyensangla shanga, Mühghaü maangshikbü tegütham,

⁶Jisu Khrista danko sen Mühghaüei hao shousi shuong tegü yeila shaanglathama pienkei.

⁷Hobaje hao onou nyaksinam tegütham senei Khristaa hao sii danko sen khümenbü, khei seneibü shabü ap kubü hapbei.

⁸Hobaje songsihon hoba ditenbü pendoua haoei haoeibü onou nyaksinam sen la juongnyu kukei;

⁹hoba khuthüka kibü si kaodaka kibü pendou Khristaa yoshailabü, penbüsoubü meten thüka songdakla shanga,

¹⁰Khristaa Mühghaü maanghaibü tegütham laobou ngüh haoei maangangkei, kho tegü hao huphang ngüh nyekchüh sen la ngetikei.

¹¹Khrista danko kün Jihudabü shuong pienkei hoba hao mütli la lela phangche pienan phokei, aishanga kho, aoei pendou haoeibü manga künda, haoeibü lamthen haangei kümbü kiteikei.

¹²Haoeibü lamthen kho, kün Jihudabü shuong, aoyouei kan to shaang Khrista to maanglem phokei, haoenei mütshuong la hao soneikangbü nyen sangtila shanga lenbü kiteikei.

¹³Kheijinei kan Küksithangeikei Khrista danko kan khümenlabü Ngühlang Maibü ngühmai songlen ditkei. Hobaje hao danko kankei mailembüla yeikei, hoba kan haoeibü dogo lenla shanga kanei Soushou Saopobü jongsak sungletkei.

¹⁴Hobaje Mühghaü soneikangbü nyensangbü shanga haoei jembüeibü kibü kho üangthet shongko, Soushou Saopobü kho seneibü phetphan shanga authebü kubou kho ki.

¹⁵Khei yingsikei ngei tokei Bunyubou Jisu to kaneibü mailem shangabü hoba saopobü shuong pendou shanga kaneibü sanou shangabü ditsi,

¹⁶ngei ngeibü welaua kan nyen phongko kan shangabü athakko nyensang kuda.

¹⁷Hobaje seneibü Bunyubou Jisu Khristaeibü Mühghaü, soneikangbü Bouei hao shangabü ngebüa songsihon hoba tang khitbü Soushou jongsak kho kan la kulabü dogo ngei welauda.

¹⁸Hobaje haoei kan ngebüa haoei ai maanglem ki, hoba saopobü shuong la haoeibü phetphan soneikangbü hoba nyaksinam ai,

¹⁹hoba sen mailembü to haoeibü sei lai yaangkei, khübü kho kanei ngela shanga, kaneibü maangpon nyek ngesaktila ngei welauda.

²⁰Ladang haoei Khrista haibü ka langngaitikei, hoba ladang songdak pendou hoba sei pendou hoba Sangle pendou thüka,

²¹hoba tou jihsiphaia ong aying, lausikei loulabü jihsiphaia nyen pendou thükkabou yingla shanga, khuthük kishanga Bouei jembü mae aenei Khrista settikei, kho sühko kümbüei Mühghaü sei lai yingkei kho tang khitkei.

²²Hobaje haoei Khrista you phanga pendou phokei, hoba lashong shanga pendou thüka hao khu yeitikei.

²³Lashong kho haoeibü mang; hoba aoei pendoua pendou shentida hao penbüsoubü kho lashong.