Read Chang Naga EFESIA 2 Bible Online

EFESIA 2 - Chang Naga bible

EFESIA 2

¹Jih chenei kan shuong kaneibü mashikbü hoba shabü danko haian kiteikei.

²Kaneibü langkei khümboei shabü phai sembei. Hobaje kho kaodak meten tegü kanei mühlom kabü yaangenbü sei shuong, laobou soushouei Mühghaü to ngüha alebü shousi shuong yoa tou kümdaleida, kho soushou phangto khombukei.

³Cheje senkei haoen tegü kikei. Senei phe hoba maangponei dühbü jungeikei. Hobaje senkei mü tegü Mühghaü maangshat hapshaula muan kiteikei.

⁴Lausikei Mühghaüei sen to yongko sanousije, haoei hao onou latetche keikei kho lenkei.

⁵Seneibü maangshikbü danko sen haian kiteiasikei haoei sen Khrista yoa nyibou langngaitikei. Mühghaü onouei ong kan khümenkei.

⁶Aieilausi sen Khrista Jisueibü yingbüka haoei sen hao yoa liko langngaitikei hoba haoei müh kaodaka haoeibü nyenhang setshanga settikei.

⁷Kho pendou haoei loulabü kaodak la hao atakenbü onou lenenlabü lele haoeibü üeisanou danko Khrista Jisua sen to kümbei.

⁸Kanei hao to mailembei hoba khümena. Haü sem! Lausikei ho pendou hao onou danko ki. Ho aiche kanei lolo kümenbü ka aying, lausikei ho Mühghaü jongsak ki.

⁹Ho aiche yonglamlabü lele kaneibü kümkaleika longbü aying.

¹⁰Aishanga haoei kümsembü kümsilei kho sen, hoba laobou kümsilei maibüa senei paila Mühghaüei shangieda lamlekei, kho kümsilei maibü shanga Khrista Jisua sen küma.

¹¹Hibü, jih cheneije kan phea akipbü danko kan to Küksithang dogo laukei. Maimaitham, haoen aoyou “Phea kipbü shuong” ki, haoenei kan to “Akipbü” dogo laukei.

¹²Kheijinei kanei Messia akitei dogo damenashi. Kan Israel phang püshi ka wailetkei, kan thekubü thesilan ka yen la lekei, hoba ho kaodaka kan maanglem hoba Mühghaü ayoko kiteikei.

¹³Lausikei tou Khrista Jisua kan aoyou shangied saabüa kiteikei, kan tou Khrista haibü danko nyangko leibuakei.

¹⁴Khrista seneibü sangmai, aishanga haoei Jihudabü si Küksithang mütli che la yeitikei. Haoei haoeibü mang kuan sen bangnyintibü mangsenbü kümthang kho leilutikei,

¹⁵hoba haoei songa kibü Ngühkhümei sakkubü khümbo mautikei. Khübü pendou kho haoei Jihudabü si Küksithang ka hao to thangyenbü danko mütli haanbü che longtila, hoba sangmai sungbala shanga kümbei.

¹⁶Mangsenyobü mautila hoba sen tan penyi ham Mühghaü jungto mütli chela yeiko leingaibala shanga hao peiseia haikukei.

¹⁷Hao louakei hoba kan saabüa kibü hoba nyangbüa kibü, Jihudabü hoba Küksithang ham la sangmai Ngühlang Maibü songlenkei.

¹⁸Aishanga hao danko sen ham Soushou chenei Bou jungto loutibü ki.

¹⁹Hibü touje kan yenbou hoba loushad loumoubü aying; lausikei Mühghaü mütshuong yoa püshi hoba Mühghaü chemdang kabü shuong ki.

²⁰Kan youkoikjai hoba thuseibü shuong thüka huongbü ki, hoba Jisu Khrista hao chemnyek laang yeikei.

²¹Hao to chem khümbo büngbüyenbüa thenakei hoba Bunyuboua saüenbü chem chela yeiko loenda.

²²Hobaje Soushoua Mühghaü kishang chem che yeila shanga hao to kankei paplepshoule huongenda.