Read Chang Naga EFESIA 4 Bible Online

EFESIA 4 - Chang Naga bible

EFESIA 4

¹Hibü, laobou ngabü kanei sungletkei, kho ngabü langkei muko paiashi, dogo ngo, Bunyubou shanga thüngbouei kan to sudajada.

²Ponpendou sangsembo, eaaoa hoba natenko kiashi. Kanei jenabou si jenabou amai apyobü danko sanou lenashi.

³Soushouei kan che yeitia. Kanei che ei che to sangmaia kienbü danko kho Soushou thangjam phola maibouthamei haujemashi.

⁴Mang che hoba Soushou che ki, khei kankei kan ngabü maanglem chenei ngakei,

⁵Bunyubou che, mailem che, baptibü che,

⁶sen pendoueibü Mühghaü hoba Bou che; hoba pendou thüka, hoba pendou danko, hoba pendoua ki.

⁷Lausikei Khrista jongsak takletbü thüng sen mütpem weko la onou kukei.

⁸Khoei ong Laishibaei lauda, “Ladang hao thükaeto nguikei, haoei langsenbü shuong lapan angkei, hoba haoei müt shuongla jongsak kukei.”

⁹(Hao “nguikei” laubü ngühtet ai? Kho tetlabü hao kaonyudak phangtokei louyenkei.

¹⁰Haoei hang pendou shentila shanga louyenbou hoba khuthük pendou to thükkabou to angbou ham kho che ong ki.)

¹¹Hobaje “haoei jongsak kukei” laubü ngühtet ai? Kho tetlabü, haoei at hangangbü shuong, at thuseibü shuong, at songlendolenbü shuong, at sanlombü shuong, hoba at lenbou shuong yingla kukei.

¹²Haoeneibü kümsilei kho khei thonbüa, sen pendoua, mailema hoba Mühghaü Shou ngebüa jetei ayei shongko khangenbü kümsilei shanga Mühghaü müt shuong lenenlabü hoba Khrista mang huongenbüa penbüsoubü yeitilabü shanga ki. Kheijinei senei Khrista ka loubü tükdebü mütang onbü hapenlabü.

¹⁴Senje touje nashou hanbü tegü akilabü, ayingsi lenbü yei weko la asoulangtilabü, ayingsi müt ye- peibü hoba maanglimaangsangei sen mashikan amlangbü lenbüei hau, longei, dogo asoueitilabü.

¹⁵Aeiko, sanoua ngühmai lauko pendoua hao to sen chinglabü, hao khu, khei Khrista.

¹⁶Hobaje hao ka mang pendou büngbüyenbüa thenyoan, sapyobü wekoei jembü kümsilei kümbü tegü mang kho jembü lolo sanoua chingenko yeitida.

¹⁷Hibü Küksithang shuongei jembü maang yaangbüa paibü tegü kanei toukei apaila shanga ngei ho lenda, hoba Bunyuboua aukabü kuda.

¹⁸Haoen jembü to ühüpangebü kisije, hoba haoen jembü maang kaangsije, haoen ditenbü nyek nakthühla yeiko Mühghaü langkei ka haoen bangakei.

¹⁹Haoen damlabü ngouan, aeibou maangdakbüei asaopobü pendou jungeila shanga jembü lolo pejapelabü la kukei.

²⁰Lausikei kaneije Khrista kho haangei aditen.

²¹Maimaitham kanei hao shangabü ditkei, hoba Jisu to kibü ngühmai yoa kan hao to lenenkei.

²²Kanei shaangbou langkei, hangbü müt, laobou khüpbülangbü maangdühei leilutian ki, kho apashi.

²³Kan soushoua haansang yeijan.

²⁴Kanei langkei haanbü, Mühghaü phatbüa yaübü müt, laobou ngühmai hoba saopobüa tang khida, kho hele la leashi.

²⁵Hibü amlang laubü apan, hoba Laishibaei laubü tegü, “Mütpem wekoei jembü lepbou to ngühmai lauashi,” aieilausi mang che tegü sen pendou küksihuo chebang ki.

²⁶Shabü shonko khau tüang. No khauang thüka chanyu tenepti,

²⁷hoba shabü mühghaü la kaokuok teku.

²⁸Kokko kibouei touje nangashi; lausikei khambü müt to janyola kilabü lele haoei jembü ik jungeiko kümaleiashi.

²⁹Kaneibü sembung ka amaibü ngühkung che ongkei telongti, lausikei kümsilei yingbü tegü ai huongyola shanga maibü ki, ditbü shuong la haülabü haptilabü lele kho laushi.

³⁰Hobaje Mühghaü Soushou Saopobü, ao to khümenlabü chalou shanga kaneibü amaaphilabü shangjinkei, hao tengangti.

³¹Kaneibü maangpon ka khauekbü, maangpokbü, khauang, nyikubü hoba mangsenbü pendou apashi.

³²Hobaje jenabou si jenabou sanouyoko maangshikyoko kiashi, hoba ailai Mühghaüei Khristaa kaneibü shedbü apbukei, kho tegütham kaneikei cheei che la ap kuyoashi.