Read Chang Naga EFESIA 5 Bible Online

EFESIA 5 - Chang Naga bible

EFESIA 5

¹Kan Mühghaü shousi shuong ki hoba haoei kan sanouda, hibü hao phatbüa kila haujemashi.

²Hobaje Khristaei ailai kan to sanoukei hoba ponlem teishikbü tegü Mühghaü la sen shanga jembü lolo khümbomeiko kukei, kho tegü kanei sanoua paiashi.

³Lausikei kan yoa Mühghaü müt shuong laula amuko, asangalanbü hoba suonlambü pendou, ayingsi nyekto shatbü laulo telaueiti.

⁴Ayingsi amaibü, ayingsi ngoualoua laubü, ayingsi ekyonyiyo, laobou haang aying, kheibü telaueiti. Lausikei Bunyubou la bouje nyensang kuashi.

⁵Aishanga ho chongchingashi: asangalanbü ayingsi ihinseibü müt, ayingsi maangdüh müt, ao heangsho lembü ki, khübü yoa aoeikei Khrista hoba Mühghaü Sanglea phet aphanda dogo kanei ngekei.

⁶Aolakei jim akibüei kan tehuonetti, aieilausi khübü shanga ngüha alebü shousi shuong to Mühghaü maangshat louada.

⁷Hibü kan haoen to janyobou teyei.

⁸Aishanga kan che nakthühbü kiteikei, lausikei tou Bunyuboua kan ngesakbü ki. Ngesakbü shousi shuong tegü paiashi.

⁹Aishanga ngesakbü hek kho maibü hoba saopobü hoba ngühmai pendoua ki dogo damenashi.

¹⁰Hobaje Bunyubou thedanga maanghailabü ai ki kho hapenla haujemashi.

¹¹Hobaje mai ehekbü nakthüh kümsilei to tejam, yongbou khübü khuokentiashi.

¹²Haoenei huphanga kümbü khübü shuong laueila mangkei himoulabü che ki.

¹³Lausikei ngesakbüei khuokenbü shuong kho changea tang khitko shenda,

¹⁴aishanga ajanjan pendou tang khittibou ngesakbü ki. Khoei ong chiaei lauda, “O yepbou, laksepashi, haibü ka pienashi, hoba Khristaei ka thükto haukulabü.”

¹⁵Hibü kan lai paida maangsangko chühashi, asangadobü tegü aying lausikei maanglimaangsang tegü paiashi;

¹⁶jih maibü pendou angthetashi, aishanga chalou shuong amaibü ki.

¹⁷Hibü tengou, lausikei Bunyubou maangangbü ai ki kho ditenashi.

¹⁸Hobaje ih, laonei lemenlabü ki, khoei tejaakma. Aeiko Soushouei shenko kishi.

¹⁹Nyensang chia hoba saopobü chia hoba soushou chiaei lauyoko, chia maibü ngüh longko maang- pon khümboei Bunyubou to laushi.

²⁰Ponpendou Bou Mühghaü, seneibü Bunyubou Jisu Khrista nyena pendou shanga nyen sangashi.

²¹Khristaa soumo hatbüa kanei jembü lolo cheei che phanga kikuashi.

²²Yaksi shuong, Bunyuboua tegütham jembü laosi shuong phanga kishi.

²³Aishanga ailai Khristaei jembü lolo mang khümenbou kian, lashong khu ki, kho tegütham lao kho yak khu.

²⁴Lausikei ailai lashong kho Khrista phanga ki, kho tegütham yaksi kho pendoua jembü laosi phanga kishi.

²⁵Laosi shuong, Khristaei ailai lashong to sanoukei hoba jembü lolo sao shanga khümbo kuan apbei, kho tegütham kaneibü yaksi shuong to sanouashi.

²⁶Kho haoei sao deiei hoba ngühei sakenkula hoba saüenkula,

²⁷hoba kho tegütham haoei sao shedbü akiko soneikangbü hemai saomaia, kapnak ayingsi nyungbü aikei akibü lashong che, haoei jembü lolo la kula shanga kümbei.

²⁸Kho tegü laosi shuongei jembü mang to tegütham haoeneibü yaksi shuong to sanoujan. Aishanga aoei jembü yak to sanouda haoei jembü lolo sanouda.

²⁹Aishanga aoeikei aijih dangakei jembü phe amangsen; lausikei haoei samda hoba thounouda; kho tegütham Khristaeikei lashong kho samda hoba thounouda,

³⁰aishanga sen haoeibü mang küksihuo ki.

³¹Laishibaei lenbü tegü, “Ho shanga bousuei haobou si haonyu apyolabü hoba jembü yak to maanghaiko kilabü, hoba haosi ham phe che yeilabü.”

³²Ho huphang ngüh yaangbü ki; lausikei ngei Khrista hoba lashong shangabü lauda.

³³Khei yingasikei kaneikei mütpem wekoei jembü tegü jembü yak to sanouashi; hoba yakei jembü lao to soumo hatashi.