Read Chang Naga EFESIA 6 Bible Online

EFESIA 6 - Chang Naga bible

EFESIA 6

¹Nashousi shuong, Bunyuboua kanei jembü nyusibou to ngüha leashi, aishanga kho song.

²“No haükulabü shanga hoba kaodaka salangla shanga, kanyu si kabou to soumo hatashi.” Ho thekubü thonbü shaangbou Ngühkhüm ki.

⁴Hobaje kanei jembü shousi shuong ngangko khau tüangti, lausikei Bunyubouei lenbü hoba thungeijangeibüa samenashi.

⁵Sambü shuong, kanei Khrista to tegü hatbü hoba lühbüa lanbü maangponei phea jembü bunyu shuong to ngüha leashi.

⁶Müt olintibü shuong tegü nyekei haptila aying, lausikei Khrista khangenbü tegü jembü maangpon khümboei Mühghaüei maangangbü kümashi.

⁷Aao yingasikei, dongebü yingasikei, aoei ai ong maibü kümlaje haoei Bunyubou ka jeteibü kho hapmeilabü dogo ngean,

⁸maanglansele kümbo müt to aying, lausikei Bunyubou to tegü khangenashi.

⁹Hobaje bunyu shuong, kho tegü kaneikei haoen to kümashi. Haoeneibü hoba kaneibü Bunyubou khuthüka kia dogo, hoba haoei müt the achühda dogo ngean haoen tehütenti.

¹⁰Thonla, Bunyubou hoba hao seisihaua hau kishi.

¹¹Kanei shabü mühghaü khüpettibü khulimbo loenlabü shanga, Mühghaü lakoubü hele khümbo leashi.

¹²Aishanga senei sii hoba phe khulimbo awapyoda, lausikei mühlom kaodak songdakbü khulimbo, ho nakthühbü meten songdak hau khulimbo, hoba sei shuong khulimbo wapyoda.

¹³Hibü amaibou chaloua kanei loenlabü shanga, hoba pendou kümpheman phaia loenlabü lele Mühghaü wapyo hele pendou leashi.

¹⁴Hibü kanei loshang lamenashi. Kanei ngühmaiei shembe kaiashi hoba saopobü khükhuom la leashi.

¹⁵Hakso Ngühlang Maibü songlenla lamlean kibü kho kaneibü youa nguok la lonshi.

¹⁶Kaneibü mailem kho amaiboueibü wanlüh takbü laujin tokla shanga ponpen aih la thangshi.

¹⁷Hobaje khümenbü jongsak kaneibü namkhun la leshi hoba Soushou inlou, laobou Mühghaü ngüh ki, khübü sungletashi.

¹⁸Welau hoba subüjabü pendouei Soushou seia jihsiphai pendoua welauashi. Hobaje khonei athakko haujembü hoba subüjabü pendoua Mühghaü müt shuong pendou shanga, hoba kü shanga pikolembo welauashi.

¹⁹Khei ngei Ngühlang Maibü huphang ngüh, laobou shangabüa ngo yangmen youkoikjai che ki, kho maangkhaiko laula kü sembung ipjinei ngüh lauenla shanga, kanei pikolembo welauko sushijashi.

²⁰Ngei laujan tegü Ngühlang Maibü maangkhaiko songlenla shanga kanei welaushi.

²¹Kanei kü shangabü ngela shanga hoba ngo lai ong ki kho sanoubü jaisina hoba Bunyuboua maanglemenbü khangenbou Tikhikaei kan la pendou ngetilabü.

²²Kanei küneibü thu pendou ngela shangabü hoba kan thungei jangeitila ngei hao kan jungto hautikuda.

²³Bou Mühghaü hoba Bunyubou Jisu Khrista ka jaisina pendou jungto hakso, mailem yoa sanou yingshi.

²⁴Aoyouei seneibü Bunyubou Jisu Khrista to maimaithambüei sanouda haoen pendou yoa onou kishi.