Read Chang Naga FILIPI 1 Bible Online

FILIPI 1 - Chang Naga bible

FILIPI 1

¹Ho le, Khrista Bunyuboueibü sambü shuong, Paul si Timoti ka, Filipia kibü Khrista Jisueibü Mühghaü mütshuong, hoba lombü shuong si dikon shuong jungto.

²Seneibü Bou Mühghaü hoba Bunyubou Jisu Khrista ka kan jungto onou hoba hakso yingshi.

³Ladang ong ngei kan shanga damda, ngei kü Mühghaü nyen sangda;

⁴hoba ladang ong ngei welauda, ngei kan pendou shanga welauda hoba ngo olinbüei shenettiakei,

⁵aieilausi kanei khangbü ka tou sühko Ngühlang Maibü phinthonla kanei kü yoa phejan lekei.

⁶Aishanga Mühghaü, aoei kan to ho kümsilei maibü khangkei, haoei Jisu Khrista Chalou sühko kho pentisoutilabü dogo ngei mailemda.

⁷Hai pendou shangabü damlabü kho kü shanga janbü, aishanga ngei kü maangpona kan thüngtida. Aishanga kan mütpem wekoei kü la Mühghaüei tetletkubü yangmen hoba Ngühlang Maibü kapetla si khangenkula ngabüa phejan leda.

⁸Khrista Jisu sanoua kan pendou shanga ngei lai chüheida ho shangabü Mühghaü ngeibü aukabü ki.

⁹Ho kü welau: kaneibü welau aei haübou chingashi; ho hapbüngebü hoba maangdaka sopbojaiko chingashi!

¹⁰Kholongaje, ai maiboutham kho kanei lenenlabü, hoba ladang Khrista Chalou lousühlaje kan hinseibü hoba shedbü akiko,

¹¹hoba Mühghaü soneikangbü hoba nyensangbü shanga saopobü lang, laobou Jisu Khristaei ong kula thükkei, khoei kan shenan kiteilabü

¹²Jaisinasi shuong, kü to ai haüthükkei khoei Ngühlang Maibü peksekkei ayingko aei shomenkei dogo ngei kan la ngetimang sühda,

¹³aishanga ngo lombü si lubü shuong pendou to Khrista phai sembü aoa ngo thüngdanga ki dogo tang khitkei.

¹⁴Hobaje Bunyuboua jaisina juongbou ngeibü yangmenei maang yaangenko yeian, Mühghaü ngüh ühütko laula aeibou maang yaangko yeia.

¹⁵Atei maimaitham nyekshat maangshat hoba oyophetyoei Khrista songlenda, lausikei atei maang tangbüei songlenda.

¹⁶Atei sanouei songlenda, aishanga Ngühlang Maibü kapletla shanga ngo pentikei dogo haoenei ngekei.

¹⁷Lausikei lubüei ngeibü khühbüa aei khonsak pailetkula, ngühmaiei ayingko janyinbüei Khrista phinthonda.

¹⁸Kholongaje ai? Ho ong, hibüyoubüa yingasikei, maimaithambüa yingasikei, pendou aenei Khrista phinthonakei; hoba khonei ngo olinda, hoba toukei olinlabü.

¹⁹Aishanga kaneibü welau danko hoba Khrista Jisuei kü la hao Soushou kubü danko thonlaje ngo litilabü.

²⁰Hibü haüko kuokko dambo maanglembü tegütham ngei ailakei himou ühüplabü, lausikei maangyaangbü pendouei, nyishoubü tegü, langkeiei yingasikei haibüei yingasikei toukei ngeibü manga Khrista yaangentilabü.

²¹Aishanga kü shanga lang kilabü kho Khrista, hoba hailabü kho ku.

²²Lausikei ngo phea lang kilabü yingsije, kho tetlabü, kibü thüng yingko mai hektilabü. Laobou pienlaje ngei angekei.

²³Lausikei ham kanglanga ngo phenyembü thua kia. Kü shangaje ngo bangan Khrista yoa kila waangda. Kho yongan ean maibou yinglabü.

²⁴Lausikei ngo kan shanga phea lang kilabü kho aei khambou ki.

²⁵Hobaje kho ngean, ngo kan jungto nyibou loubüei Khrista Jisua kü to kan the lenenlabü aei yeila shanga, mailema kan haalabü hoba olinla shanga, ngo lang kilabü dogo ngei ngekei.

²⁷Ai haüthüklaje haüthükashi, himshuong yoa kaneibü chaangbou langkei kho Khrista Ngühlang Maibü muko kishi. Ngo louan kan to joyojinei yingashi ayingsi ngo ayojineikei yingashi, kan soushoua thangjaman kaangkhühtham loan, khei kan san che hoba nyekchüh chela lean Ngühlangmaibü mailem shanga thungyoda,

²⁸hoba kaneibü dangbou to kan ai ajemtenko shuokyoda dogo ngei ditmang sühda. Hoei haoen shemlabü lausikei kan khümenlabü dogo haoen to lenlabü.

²⁹Kho Mühghaüei kan la Khrista to mailemlabü ong aying, lausikei hao shanga khonsaklabü phejankei kukei.

³⁰Kanei ngo che mailem shanga wapyoko hapa. Hobaje ngo athakko longyoda dogo kanei ditda. Kankei jeteibü lasona kia dogo damenashi.