Read Chang Naga FILIPI 2 Bible Online

FILIPI 2 - Chang Naga bible

FILIPI 2

¹Hibü Khristaa denche thungeijangeibü kisije, sanou ka denche hakso kisije, Soushoua himjam denche kisije,

²denche üeisanou hoba sanouko dambü kisije, jibüphaibü chenei, songsido chenei, sanou jetei kiko, kan sensimaang jetei kila shanga, kanei kü olin shentishi.

³Hobaje janyinyobüei yingasikei, jim akibü liliseseei yingasikei, aikei teküm, lausikei eaaoabüei müt- pem wekoei jembü to mü khaibou dogo weeiashi.

⁴Kan mütpem wekoei jembü shanga adambo mü shanga damashi.

⁵Khrista Jisu to laobou dambü kikei kho kan to kei kishi:

⁶Büngla khangla thama hao to Mühghaü haang kiteikei, lausikei hao Mühghaü to jeteitham himyoan kijan dogo haoei adam.

⁷Lausikei, haoei jembü lolo kongenkei, hoba sambü haang la yeikei, hoba sen tegübü müt che la yeikei. Hao müt maimai yeikei,

⁸hoba haibüa sühko, khei, peiseia haila mangkei ngühaleko, haoei jembü lolo sangsemmeilangkei.

⁹Khoei Mühghaüei hao thükkabou kaoen to tonenkei, hibü Jisu nyena khuthük kabü shuong, kaodak kabü shuong hoba kaonyu mangkabü shuong mütpem wekoei youkükei thungetan khüpetko lemlabü, hoba Bou Mühghaü la soneikangbü kuko, “Jisu Khrista Bunyubou ki” dogo lauko mütpem wekoei theletlabü lele hao la pendou to thükkabou nyen kukei.

¹²Hibü, ngei sanoubü jaisinasi shuong, kanei ngüha lebü tetsida ho ki. Ngo kan yoa kijinei kanei ponpendou kü ngüha lekei. Tou ngo kan yo ka bangan kijinei aei ngüha leda. Ngei laubü ho ditashi: hatko hoba lühko kaneibü khümenbü pentisoutila kümaleiashi.

¹³Aishanga aoei jembü maanghaiko kümtila shanga kan to maangangenlabü hoba kümlabü ham longtida, kho Mühghaü.

¹⁴Kan nali athebü hoba hinseibü yeilabü lele, kanei kümbüleibü pendou anyamnyambo hoba apekawetyoko kümashi. Kholongaje kombü hoba khei- peinyu paibü meten yoa kan penbüsoubü Mühghaü shousi shuong yinglabü,

¹⁶hoba kanei haoen la ngühlang kho songlenjinei kan kaodaka haoen yoa khanshoulitshou tegü haulabü. Khei yingsije, ngo amlangbüa alaang hoba jim akibüa akümalei dogo Khrista Chaloua ngo denche shanga the lenenla thüklabü.

¹⁷Kaneibü mailem kho Mühghaü la kubü lembüsabü ki, hoba kü langkei sii kho lembü thük to jonlep yingkei; khei yingsije ngo olinlabü hoba kan pendou yoa kü olin janyolabü.

¹⁸Kankei olinjan hoba kho olin janyobüa yojan.

¹⁹Bunyubouei maangangbü yingsije, kan jungto Timoti tongde hautikulabü dogo ngei maanglemda. Aishanga kaneibü ngühlang ditoubü danko ngo olinmang sühda.

²⁰Aishanga kaneibü thu shanga maimaitham dambubou hao maangpon tegü yembü kü yoa müt ao aki.

²¹Aishanga haoen pendouei Jisu Khrista shanga alambo jembü ku shanga lamda.

²²Lausikei nashou cheei ailai jembü bou khangenda, kho tegü Ngühlang Maibü haatila shanga haoei kü yoa khangenkei, dogo kanei hao shanga aukabü ngeakei.

²³Hibü kü shanga ailai yeilabü ngei ngeko lousije hao kan jungto khoyam hautilabü dogo ngei maanglemda.

²⁴Lausikei Bunyubouei maang- angsije ngo kan jungto lalok akiko louphang.

²⁵Ngei jaisina Epafrodita kan jungto ngaitilabü dogo dambei. Haoei kü yoa kümbeileikei hoba ngeibü khambüa ngo khangenla hautikubou kaneibü ngühlang künbouei kü yoa thipan long- yokei.

²⁶Aishanga hao shatko kikei dogo kanei ditsi, haoei kan pendou haüyola chüheikei, hoba aeibou maangmaukei.

²⁷Maimaitham hao haikhün ka langko shatkei. Lausikei Mühghaüei hao to onoukei, hoba hao to ong ayingko kü to kei onoukei. Ngangbü thüka ngangbü ühüptila haoei ngo püetkei.

²⁸Hibü kanei hao nyibou hapbo olinla shanga, hoba ngeibü maangmau koutila shanga, ngei hao aeibou hautimang sühko hautikua.

²⁹Maimaitham Bunyuboua hao aeibou olinko sungletashi, hoba kanei kheibü müt la soumo kuashi.

³⁰Aishanga Khrista khangenbüa hao haikhün ka sheibütham püetkei. Kü to thuila kan akitei, hoba kan jeiko lokula shanga haoei hao langkeiei thungyokei.