Read Chang Naga FILIPI 3 Bible Online

FILIPI 3 - Chang Naga bible

FILIPI 3

¹Thonla, kü jaisinasi shuong, Bunyuboua olinashi. Ngei kan to thedang to lenbü ong ngei nopmaida, lausikei khoei ngo aoda hoba ho kan shanga maangsanglabü ki.

²Kei shuong shanga maangsangashi, lipan apbü shuong shanga maangsangashi.

³Tükdebü kipbü shuong kho sen ki. Mühghaü Soushouei seneibü lembü hangsilam leida. Sen yaangenbü kho Khrista Jisua ki. Senei tangkabü phea maanglem aphoda.

⁴Tangkabü phe haanga habü yinga tegükei ngo aikei hatlabü aki. Atei phea maanglemla thükbü shanga laualonga, kü to aeibou ao ki?

⁵Ngo chalou setbounyet kipbei; Ngo Israel mütli, Benjamin phang, hoba Ibribü nyusiboueibü shou Ibribü. Ngühkhüm jungeibü aenei ngo Farisi che kiteikei.

⁶Ngei maangdakbü aeka lashong shieikoekei; hoba Ngühkhümei sakkubü saopobü aeka shedbü ühüpenbü müt.

⁷Khei yingasikei khübü pailetbü pendou Khrista shanga kongbü dogo weeikei.

⁸Hobaje toukei ngeibü Bunyubou Khrista Jisu hapbüngebü maiboutham shanga pendou maubü dogo ngei weeida.

⁹Hobaje ngei Khrista pailetbü shanga hoba ngeibü saopobü laobou ngühkhüm ka ki, kho aying, lausikei saopobü laobou Khrista to mailembü danko hoba Mühghaü ka mailemei louda, kho saopobü kian, ngei hao hapla shanga, hao shangabüa ngo pendouei kongbü natenkei, hoba khübü kho odsinot ong dogo weeida.

¹⁰Ngei ngemang sühbü khümboei Khrista hoba hao langngaibü danko loubü sei. Ngei hao khonsak janyomang sühda hoba hao haibüa hao phatko yeimang sühda;

¹¹hoba ushaleko ongkei haibü ka ngo nyibou langngaimang sühda.

¹²Ngei pendou hapa ayingsi ngoje penasoua dogo ngei alauda. Lausikei ngei thungyoda hoba ho lapoula haujemda, aieilausi Khrista Jisueikei kho shanga ong ngo lapbei.

¹³Jaisinasi shuong, ngei ho molapoukei dogo ngeakei. Lausikei kü shanga che ong ki: phainei ai ki kho maada hoba ai thea thangan ki kho onlangda.

¹⁴Jisu Khrista danko Mühghaüei ngo ngabü khuthükbü langkei jongsak kaopheitet sühlangla ngo thungyoda.

¹⁵Hibü sen ladüng soushoua inthonbü shuong ki, kho sensimaang ong kikho, hoba kanei aineije sensimaang phangche kisije, khokei Mühghaüei kan la shanga shattikulabü.

¹⁶Senei sen loshang ka khangjan, lausikei senei sühlangbü younaka sen kijung haujan.

¹⁷Jaisinasi shuong, kan pendou ngo tegü kila haujemashi. Künei kan la tetsida che phokuda; aoyouei kün tegü paida haoen chühletashi.

¹⁸Aishanga, ngei kan to annebenko lenbü tegü hoba toukei ngei haapbo lenda, khei juongnyu Khrista peisei dangbou shuong tegü langkeida.

¹⁹Thonbüa haoen shemlabü; aishanga jembü shiang haoeneibü mühghaü ki, haoen yaangenbü haoen himoua ki, hoba haoeneibü maangpon kaodak peisileia ngütakei.

²⁰Lausikei sen khuthük mütli ki. Hobaje Bunyubou Jisu Khrista khuthük ka louan sen khümenla shanga senei haiyeida.

²¹Haoei laobou seiei ajanjan pendou jembü phanga phola thükkei, kho seisihau jungeiko haoei seneibü akhainyu mang kho hao soneikangbü mang phatko haansangla yeiko jeileikulabü.