Read Chang Naga FILIPI 4 Bible Online

FILIPI 4 - Chang Naga bible

FILIPI 4

¹Hibü jasinasi shuong, ngei kan to sanouda hoba kan waangda. Kanei kü la olinbü kuda hoba ngeibü thüksimin amaaphilabü kan ki. Hibü ngei sanoubü jaisinasi shuong, Khristaei kan shanga kümbula thükbü pendou shanga kan Khristan shuong phatko kaangkhühtham loashi.

²Ngei Euodia si Sintikhe Bunyuboua maangpon che la yeishi dogo thungeida.

³Haü, kü yoa maimaitham buleng chenei lengbü, nyi khübü yaksa shuong to thuiashi dogo ngei katokei sudajada, aishanga haoenei kü yoa hoba Klement hoba kü yoa liko kümbü lubü shuong, aoyou nyen langkei lea doan ki, haoen yoa khübü sao shuongei Ngühlang maibüa kümbei.

⁴Ponpen Bunyuboua olinashi; nyiboukei ngei lenkho, Olinashi!

⁵Kan semet ametbü pendou la ngetiashi. Bunyubou khama nyangko ki.

⁶Aineikei maangpon tekouma, lausikei pendoua welaubü hoba subüjabü hoba nyensangei kanei hibü Mühghaü la ngetiashi.

⁷Hobaje Mühghaü hakso laobouei ditenbü pendou leithetda khoei Khrista Jisua kaneibü maangpon hoba dambü lombo kilabü.

⁸Thonbüa, jaisinasi shuong, ai ong ngühmai ki, ai ong soumo hatlabü ki, ai ong janbü ki, ai ong hinseibü ki, ai ong sanoulabü ki, ai shanga ong ngühlang maibü ki, denche maibü kisije, hoba denche nyensang kisije, khübü shanga daman chühashi.

⁹Ai ong kanei kü ka ditletkei, hoba sungletkei hoba ditkei hoba hapbei, khübü kho kümashi; kholongaje hakso Mühghaü kan yoa kilabü.

¹⁰Lausikei tou thonbüa kanei kü shanga dambü sinngaia dogo, ngo Bunyuboua aeibou olinda; maimaitham kaneikei ngo dambo kikei, lausikei kanei kü to thuila jih maibü ühüp.

¹¹Aki alebü shanga ngei lauda ji, aishanga ai thua ong ngo kilaje, khünei maanghaiko kila ngei thekua.

¹²Ailai akhainyu thua kila kho ngei ngekei, hoba ailai souko auko kila khokei ngei ngekei. Ajanjan pendou hoba kümsilei pendoua, photko kilakei hoba shikong lopkong kilakei, juongnyu phoan kilakei hoba kangan kilakei, kho huphang ngüh kho ngei ditleda.

¹³Khrista aoei ngo hau kitida hao danko ngei pendou kümla thükkei.

¹⁴Khei yingasikei kanei ngo khonsak khonkua thangjamsi, kanei maibü jungeikei.

¹⁵Hobaje toukei Ngühlang Maibü songlen khangbüa, ladang ngo Makedonia ka bangkei, kan to liman lubü lashong aoeikei lemla kubü hoba sungletbüa kü yoa ajam dogo kan Filipibüei ngekei;

¹⁶aishanga ngo Thesalonikaa kijineikei che nyinei sühko ngo khambü kanei küntikei.

¹⁷Ngei jongsak shanga lauda aying, lausikei kan nyena habü buhek shanga ngei phanda.

¹⁸Lausikei ngei pendou kia, hoba juongnyu kia. Ngei kan ka ponlem maibü hibü, Mühghaüei maanghaibü kan ka loubü sungletla mubü lembü, Epafrodita ka sungletan ngo souakei.

¹⁹Hobaje kü Mühghaüei Khrista Jisu danko hao soneikangbü nyaksinam thüng kan khambü pendou kulabü.

²⁰Tou seneibü Bunyubou Mühghaü to ponpen thon akibü soneikangbü yingshi. Amen.

²¹Khrista Jisua saopobü shuong weko la salem kuashi. Kü yo kabü jaisinasi shuongei kan la salem kuda.

²²Saopobü shuong pendouei hoba kongnyu leko Kaisar chemdanga kibü shuongei, kan la salem kuda.

²³Bunyubou Jisu Khrista onou kaneibü soushou yoa kishi.