Read Chang Naga KOLOSI 1 Bible Online

KOLOSI 1 - Chang Naga bible

KOLOSI 1

¹Ho le Mühghaüei maangangbüei youkoikjai Paul, hoba seneibü jaisina Timoti ka,

²Kolosia kibü Khristaa Mühghaü mütshuong hoba maanglemenbü jaisinasi shuong jungto. Seneibü Bou Mühghaü ka kan jungto onou hoba hakso yingshi.

³Ladang ong künei kan shanga welauda, künei seneibü Bunyubou Jisu Khristaeibü Bou Mühghaü la nyensang kuda;

⁴aishanga künei Khrista Jisua kaneibü mailem hoba kanei Mühghaü mütshuong pendou to sanoubü shanga dida.

⁵Hobaje ham pakshang kho, tükdebü Ngühlangmaibü ngühlang kan jungto loujinei ditbü mailem laobou kan shanga khuthüka tang khitlabü ki, kho mailem yingkei.

⁶Hobaje ailai Ngühlang Maibü kaodak pendoua mai hekda hoba haada, kho tegü laonyet kanei Mühghaü onou shangabü maimaitham ditkei hoba ngekei, khünyet ka jaüan kan yoakei Ngühlang Maibü kho mai hekda.

⁷Aishanga kün jenabou sambü sanoubü Epafra, ao lekün shanga Khrista maanglemenbü khangenbü ki, hao ka kanei Ngühlang maibü kho ditletkei,

⁸hoba haoei Soushoua kaneibü sanou kün la ngetikei.

⁹Hibü kho ngüh ditnyet ka jaüan künei kan shanga athakko welauko sudajada. Soushou songsihon hoba ditenbü pendoua hao maangangbü ngebüei kan shenlabü shanga,

¹⁰hoba Mühghaü ngebüa hakso, kümsilei maibü pendoua mai hekko, hoba pendoua Bunyubou maang haitiko, muko paila shanga künei welauda.

¹¹Hobaje olinbüei lounyu natenbü hoba aman apbü, pendou shanga hao soneikangbü sei tegü hau pendouei hau kitila shanga,

¹²hoba Bou aoei ngesakbüa hao mütshuong yoa phetphan janyobü yeila shanga sen mutikei, kanei hao nyen sangla shanga ngei welauda.

¹³Aishanga haoei nakthüh songdak ka sen khümenkei hoba haoei sanoubü shou Sangle to sen leibakei.

¹⁴Hobaje Shouei seneibü shabü apbukei hoba sen angthetkei.

¹⁵Haoei sen la hao langkeia ühüpenbü Mühghaü noksa lenda. Yaübü peisilei pendou thüka hao shaangbou shou ki,

¹⁶aishanga hao danko Mühghaüei khuthüka hoba kaodaka kibü, hapbü hoba ühüpbü; choba setshang hoba bunyu shuong, songdakbü shuong hoba songdak hau shuong, hoba ajanjan pendou Mühghaüei hao danko hoba hao shanga yaükei.

¹⁷Hao pendou to shaangbou ka thama ki, hoba hao to pendou kida.

¹⁸Lashong kho haoeibü mang hoba hao khoeibü khu. Ajanjan pendoua hao shaangbou yingla shanga, hao khangbou, hoba haibü shuong yoka shaangbü Shou.

¹⁹Aishanga Mühghaüei hao penbüsoubü pendou hao to kila pienkei.

²⁰Hobaje peiseia haoeibü sii koubüei sangmai kümbü danko, haoei mühnyu kaonyu khümbo hao danko hao to jitiphaitila pienkei. Haü, mühnyu kaonyu khümbo, khuthüka si kaodaka kibü pendou hao danko jitiphaitikei.

²¹Honei kankei yoakei. Jih chenei kan Mühghaü ka bangan kiteikei, aishanga kaneibü dambü pendou hao khulimbü hoba kümsilei shuong amaibü kikei.

²²Lausikei kan saopobü, nali athebü hoba shedbü akiko hao thedanga kuenlabü lele hao Shou phea haibü danko Müghaüei kan jembü to jitiphaitikei.

²³Lausikei kan kaneibü mailema anyaakeiko kaangkhühtham lojan. Kanei ditbü Ngühlang Maibüei kubü maanglem ka kan tekuk. Ngühlang Maibü kho kaodak khümbo jembo phinthona hoba ngo Paul, khoeibü sambü la yeikei.

²⁴Tou ngo kan laüa khonsakla olinda. Haoeibü mang, khei lashong, shanga ngo phea khonsakbü pendou Khristaei ho shanga khonsakbüa shomyokuda. Ngei hao khonsak pentisoutida.

²⁵Mühghaüei ngo lashongeibü sambü yeitikei. Haoei kü la kan nyena shanenbü kümsilei che nongkukei,

²⁶kho, khuthükbü hoba kaodak meten sünga huan kibü Mühghaü ngühlang benbüsoubüa kan la khuokenkula shanga kiteikei, lausikei thonla hao mütshuong to tang khida.

²⁷Hobaje Mühghaüei Küksithang yoa ho huphang ngüh soneikangbü nyaksinam ho ai, kho haoen la ngetila maanghaiko kikei. Kho Khrista kan to kibü, hoba hoei kan la loulabü soneikangbü shanga maanglem kuda.

²⁸Künei müt pendou penbüsoubüa Khrista thedanga kuenlabü lele, künei mütpem weko lenenko hoba mütpem weko thungeiko songlenda.

²⁹Hobaje ho shangabü aoei kü to seiei kümsilei kümda haoeibü hau pendouei ngeikei wapyoko kümsilei kümda.