Read Chang Naga KOLOSI 2 Bible Online

KOLOSI 2 - Chang Naga bible

KOLOSI 2

¹Ngei kan shanga hoba Laodikiaa kibü shuong hoba aoyou thenyek ngei ühüpbei, haoen shanga ngei latetche long- yoko wapyoda kho kan la ngetimang sühda.

²Ngei haoen maang yaangentimang sühda. Haoenei penkosouko ditenan pendoua sopbojaiko keilabü lele ngei haoen sanoua thangjamtimang sühda. Khei yingsije haoenei Mühghaüeibü huphang tangkhit, ao Khrista ki, hao ngelabü.

³Hao to songsihon hoba hapbüngebü pendou huan ki.

⁴Ngüh teibüei aolakei kan akhüpettila shanga ngei ho lenda.

⁵Ngo phea ayoensikei, ngo soushoua kan yoa yoakei hoba kaneibü tedtangbü the- chüh hoba Khrista to kibü kaneibü mailem kaangbü hapan olinda.

⁶Hibü kanei ailai Khrista Jisu sungletkei, kho tegü hao to li atko hoba jenshuokko

⁷kan la lenbü mailema kaangtiko, nyensang aeibou kuko hao to paiashi.

⁸Atei hao hapbü ngebü songsido hoba khüpbülangbü lejim akibüa, hoba müteibü pisibou ngühli hoba kaopakbü ngüh shuong, laobou Khrista ka aying, khübüei kan aao la leko aleilangtila maangsangashi.

⁹Aishanga hao to Mühghaü tükdebü pendou penbüsoubü mang khümbomeiko thonakei;

¹⁰hoba ao soushou konglebou hoba sei pendou thüka songdak hau ki, hao to kan penbüsoubü yeitida.

¹¹Ik ayoko kipan apbüei, Khrista kipbüa phe mang kho apbüei, hao to kan kipan apbei.

¹²Hobaje baptibüa kan hao yoa khünkei, hoba tokei baptibüa haibü ka hao langngaitibou Mühghaüei kümbü mailem danko kan hao yoa langngaitikei.

¹³Hobaje kan shabüa hoba Küksithang yingsije phe kipan üpbü hama haian kibü ka haoei kan hao yoa liko langngaitikei. Haoei sen la seneibü shabü pendou apbukei.

¹⁴Hobaje sen khulimbo ikei dobü ngühkhüm laobou sen khulimbo loan kikei, kho haoei haman apan peiseia thünglanga.

¹⁵Hobaje kongnyubou shuong hoba sei shuong soletan, khübü thüka thükenbou yeiko haoei khübü tang khitko lena.

¹⁶Hibü shaubü yingasikei, yungbü yingasikei, lemsilang chalou yingasikei, litnyu touanga yingasikei, Nounyet shangabü yingasikei aolakei kaneibü mat tejemti.

¹⁷Habü pendou loula kibü yeme che ong; lausikei mang kho Khristaeibü.

¹⁸Khu, ao phanga mang pemtolo, thenyobü hoba phejak liko jujambo jenshuokan Mühghaü lamthena chingda, kho khu to thangjaman kikhoulabü jeila,

¹⁹jim akibü phe sensimaangei olin kungkhenko yeian, mühei nyengbü hoba khuthük hangangbü lembü songle shangabü aolakei jembü maang leko kan shanga ngühkhüm tekümti.

²⁰Kan kaodak songsido khangshang ngüh shuong ka bangan Khrista yoa haikei longa, kholonga aila kan tou sühko kho ngühkhüm phanga kibü tegü:

²¹“Tejungei, tejep, temeiti,” dogo lautida?

²²Khübü peisilei pendou jungeibü ka maula tetsepakei, aieilausi khübü kho müteibü ngühkhüm hoba lenbüa thonakei.

²³Jembüei lemmangsühbü lembü hoba hanglenla sangsembü hoba mang khonkutibü, habü hoeije songsihon phatko haptida, lausikei haoenei phe dühbü pejapelabüje asenetenda.