Read Chang Naga KOLOSI 3 Bible Online

KOLOSI 3 - Chang Naga bible

KOLOSI 3

¹Kan Khrista yoa langngaikei; hibü Mühghaü maenei, laonei Khrista setan ki, thükaenei kibü peisilei shuong lamashi.

²Kaodaka kibü peisilei aying, lausikei thükaenei kibü peisileia kaneibü maangpon phoashi.

³Aishanga kan haikei, hoba kaneibü langkei Khrista yoa Mühghaüa huakei.

⁴Khrista, kaneibü tükdebü langkei ki, hoba ladang hao nyibou tang khitlaje kankei hao yoa soneikangbüa tang khitlabü.

⁵Hibü kaodak haang kaneibü küksihuo, khei; asangalanbü, ihinseibü, amaibü dühbü, pejapelabü, hoba nyekdüh maangdüh, laobou heangsho lembü ki, khübü pendou kanei haitiashi.

⁶Aishanga habü laüa ngüha alebü shuong thükto Mühghaü maangshat louada.

⁷Shangied ladang kan habünei haangkei, kankei khünei paikei.

⁸Lausikei touje Khristan shuong yingsije, kanei habü pendou, khei khauang, maangshat longbü, theshoubü, nyikubü hoba sembung ka himou ngüh laubü apashi.

⁹Cheei che to teyepei; aishanga kanei hangbü müt kümsilei yoa hangletnyu apa,

¹⁰hoba ao müt haanbü, jembü kümbou phatko penbüsoubü songsihon to haanbü küman ki, hao hele la lea.

¹¹Ho haanbü langkeiaje Grikbü hoba Jihudabü, kipbü hoba akipbü, barbarbü hoba Sitiabü, aao, dongebü, dogo aikei janyinbü aki. Khrista pendou, hoba pendoua ki.

¹²Hibü, Mühghaüeibü pienbü shuong tegü, saopobü hoba sanou, sanouko dambü maangpon, üeisanou, haanbü la yeibü, eaaoabü, lounyu natenbü, habü hele leashi.

¹³Müt atei at khulimbo shedbü kula kisije, kanei jenabou si jenabou lounyu natenyoko amai apyoashi. Bunyubouei kan la amai apbua hibü kaneikei apbuashi.

¹⁴Hobaje habü pendou thüka sanou, laobou penbüsoubü khühbü ki, kho sungletashi.

¹⁵Hobaje Khrista hakso, laobou jungto kankei mang chenei ngakei, kho kaneibü maangpona chobatiashi, hoba kanei nyensangko kishi.

¹⁶Nyaksinam tegü Khrista ngüh kan to thüngtiashi. Songsihon pendouei jenabou si jenabou lenyoashi hoba thungei- yoashi. Nyensang chia hoba saopobü chia hoba soushou chiaei kaneibü maangpona olinbüei Mühghaü to laushi.

¹⁷Hobaje ngühanga yingsikei, kümaleia yingsikei, kanei ai ong kümlaje, Bunyubou Jisu nyena pendou kümashi, hoba hao danko Bou Mühghaü la nyensang kuashi.

¹⁸Yaksi shuong, Bunyuboua lai mubü ki, kho tegü jembü lao phanga kishi.

¹⁹Laosi shuong, jembü yaksi shuong to sanouashi hoba haoen khulimbo tekausak.

²⁰Nashousi shuong, kanei jembü nyusibou to ponpen ngüha leshi; aishanga khoei Bunyubou olintida.

²¹Bousi shuong, haoen hau thetlabü lele kan shousi shuong to temaangpok.

²²Sambü shuong, kaneibü bunyu shuong to ponpen ngüha leshi, hoba müt olintibou shuong tegü, nyekeibü kümsileiei aying, lausikei Bunyubou to soumo hatbüa lanbü maangponei kümaleiashi.

²³Bunyubou ka phet- phanbü ku haplabü dogo ngean,

²⁴kanei ai ong kümlaje kho müt to aying, lausikei Bunyubou to maangpon khümboei kümashi. Kanei Bunyubou Khrista khangenda.

²⁵Aishanga aoei ong shedbü jungeilaje haoei jembüei kümbü shedbü shanga hapmeilabü, hoba khünei müt the chühbü aki.