Read Chang Naga KOLOSI 4 Bible Online

KOLOSI 4 - Chang Naga bible

KOLOSI 4

¹Bunyu shuong, khuthüka kaneibü Bunyu che kia dogo ngean kaneibü sambü shuong janbüa hoba hangalama jungeiashi.

²Welaua kaangko athakko kiashi, hoba khonei nyensang kubü yoa pikolemko kishi.

³Khüto yoko, Khrista huphang ngüh laobou laüa ngo tou thüngdanga ki, kho ngüh lenenlabü lele koukhün ipbuashi dogo Mühghaü to pheko kün shangakei welaukushi.

⁴Ngei hangalama shangashatbüei lauenlabü lele welaukushi.

⁵Jihsiphai maibü angthetko, kokabü shuong aenei songadoa paiashi.

⁶Mütpem weko to kanei lai jongaijan kho kanei ngela shanga kaneibü ngüh ponpen onou yoa jemei teitiashi.

⁷Tikhikaei kan la kü shangabü ngühlang pendou lenlabü. Hao küneibü sanoubü jaisina hoba maanglemenbü thuibou hoba Bunyubou kümsileia thujam-sambü ki.

⁸Kün shangabü pendou kan la ngetila hoba kan thungeitilabü nyekchüha ngei hao kan jungto hautikuda.

⁹Küneibü maanglemenbü hoba sanoubü jaisina, Onesima, kan yokabü che, hao yoa thonakei. Hakabü kümsilei pendou haosiei kan la ngetilabü.

¹⁰Thüngbüa kü meitangbou Aristarkha, Barnaba li Mark hoba Jasta nyenbü Jisu ka kan to salem küntida. (Kanei Mark shangabü sakkubü sungleda; hao kan jungto lousije sungletashi.) Khübü dan kho ong kü yoa Mühghaü Sangle shanga kümbüleibü Jihudabü Khristan shuong ki; haoen kü shanga maangpon haksoshang kiteikei.

¹²Kan yokabü müt che Epafra kakei salem küntida. Khrista Jisu khangenbü che tegü, Mühghaüei maangangbü pendoua kan penbüsoubü hoba tükdebü yeiko loenlabü shanga, haoei haoeibü welaua ponpen kan shanga haujemda.

¹³Hobaje kan hoba Laodikia hoba Hierapolia kibü shuong shanga haoei kümsilei aeibou kümbo hüda dogo ngei hao shangabü aukabü kuda.

¹⁴Sanoubü daktar Luk hoba Demaei kan la salem küntida.

¹⁵Laodikiaa hoba Nimfa hoba saoeibü chema kibü lashongbü la salem kuashi.

¹⁶Ho le kan yoa wean chühan phaia Laodikia kabü lashong lakei wean chühtiashi; hoba Laodikia ka loubü le kho kan yoa wean chühashi.

¹⁷Hobaje Arkhipa to, “Nyi Bunyuboua ai khangenbü kümsilei sungletkei kho khümtila haujemshi” dogo lenshi.

¹⁸Ngei ho kü ikei doda: Ngo Paul ka salem. Ngo thüngdanga kia dogo damenashi. Mühghaü onou kan yoa kishi.