Read Chang Naga 1 THESALONIKA 2 Bible Online

1 THESALONIKA 2 - Chang Naga bible

1 THESALONIKA 2

¹Jaisinasi shuong, künei kan pean chühbü kho lejim akibü ayingtei dogo kanei ngekei.

²Kanei ngeakei shangla kün Filipia khonsak hoba awe asüngbü hapbei, lausikei juongnyuei kün kheinyu shiletasikei kan to haoeibü Ngühlang Maibü lenla küneibü Mühghaüei künla maangkhai kukei.

³Aishanga künei thungeijangeibü, shedbüa, pejapelabüa ayingsi khüpettibüa aying.

⁴Lausi dogokei, Mühghaüei künla haoeibü Ngühlang Maibü nongkula janthetkei hoba künei haoeibü maangangbüa lauda. Künei müt ayingko Mühghaü olintila haujemda, aieilausi haoei küneibü maangpon takteida.

⁵Aishanga kanei ngean kibü tegü ladangkei künei amlangbüa nyensang laubü ühüp; ayingsi nyekdüh mangdüh hulepla ajungeiko kikei dogo Mühghaü aukabü ki.

⁶Ayingsi kün Khrista youkoikjai yingbü shanga kan la künlean jinkuko kikhoulabü, lausikei kan ka yingasikei mü ka yingasikei müt aokakei nyensang alam.

⁷Lausikei senyopbüei jembü shousi thounoubü tegü kan yoa kün eaaoa kikei.

⁸Kho tegü kan to maangshikko sanousi, künei kan la Mühghaü Ngühlang Maibü ong aying, lausikei küneibü langkei mangkai kula maanghaiko kikei, aieilausi künei kan to aeibou sanouko yeikei.

⁹Aishanga jaisinasi shuong, künei kan aolakei künalekula shanga, change nangnak kümsilei kümbo künei kan to Mühghaü Ngühlang Maibü songlenko kikei dogo kanei künei aicheküman haujembo kümbü hoba hübütoubü damenashi.

¹⁰Kan mailembü aenei künei kün lolo lai hinseibü, saopobü hoba shedbü akiko jungeikei, kan hoba Mühghaükei aukabü ki.

¹¹Künei kan lai bouei hao shousi shuong thounoubü tegü thounoukei kho kanei ngeakei.

¹²Mühghaüeibü soneikangbü Sangle to kan ngabü muko langkei kila shanga künei kan thungeijangeikei, maangkhaitikei hoba takshattikei.

¹³Künei athakko Mühghaü nyen sangbü denche kia; aieilausi ladang kanei kün ka ditbü Mühghaü ngühlang sungletkei, kanei ho müteibü ngüh tegü asunglet; lausikei tou kan mailembü dan to kümeileiei loushedko kibü tegü, maimaitham Mühghaü ngüh ki dogo sungletkei.

¹⁴Aishanga jaisinasi shuong, Khrista Jisua Jihudaa kibü Mühghaü lashong chühletbü shuong kan yeikei. Aishanga haoenei Jihudabü ka khonsak hapbü tegü, kaneikei jembü kaodak müt shuong ka khonsak jeteibü hapbei.

¹⁵Haoenei Bunyubou Jisu hoba thuseibü shuong ham haitikei hoba kün shian sattikei. Haoenei Mühghaü aolintida hoba haoen müt pendoueibü dangbou ki.

¹⁶Aishanga Küksithang shuong la haoen khümenlabü shanga lenbü ka ongkei haoenei kün shiletda. Hobaje haoenei kho tegü haoeneibü shabü lühbak ontida. Lausikei thonla Mühghaü maangshat haoen thükto lousüha.

¹⁷Jaisinasi shuong, künei kan apyoan phaia kan nyekei ühüpsi dogokei, kan ladangkei maang- pon ka abang. Künei kan to theshuok hapyomang sühko waangan phaia tou ho longche ong hauda.

¹⁸Kho aoa ong künei kan jungto loumang sühkei. Maimaitham ngo, Paulei, che nyinei huongeia. Lausikei Satanei kün shiletkei.

¹⁹Aishanga ladang seneibü Bunyubou Jisu nyibou loulaje, kan ayingdangaje, küneibü mailem, ayingsi olinbü, ayingsi soneikangbü ao yingla?

²⁰Aishanga kan küneibü soneikangbü hoba küneibü olinbü.