Read Chang Naga 1 THESALONIKA 3 Bible Online

1 THESALONIKA 3 - Chang Naga bible

1 THESALONIKA 3

¹Hibü künei touje anatenko, künei khanenan Athen sangnyua sukngailangan kila maikei dogo dambei.

²Hobaje khübü khonsakei aokei anyaakeitila shanga, kan kangtila hoba kan mailema hau kitila, künei Khrista Ngühlang Maibüa Mühghaü khangenbou hoba küneibü na Timoti kan jungto hautikukei.

³Aishanga ho shieikoeei kan aokei sepeinyu angailabü lele khonsak natenla sen pienakei dogo kanei kan lolo ngekei.

⁴Aieilausi maimaitham, ladang kün kan yoa kikei, senei shieikoe haplabü dogo künei kan to shangiednyu lenkei; kho khei loushadkei hoba kanei ngeda.

⁵Khoei ong ngei kan jungto Timoti hautikei. Ngeikei touje lalok anatenko apbei. Aishanga kaneibü mailemei takteibü tokkei si ayingsi küneibü kümsilei pendou jim akibüla yeikeije ngei ngemangsühkei.

⁶Lausikei Timoti tou ong longeiakei hoba haoei kün la kaneibü mailem si sanou shangabü ngühlang maibü künbua. Kanei ponpendou kün sanouko damenda hoba künei kan hapmang sühbü tegü, kanei kün hapla waangko chüheida dogo haoei kün la lenkei.

⁷Hibü, jaisinasi shuong, kün khonsak hoba khonkua kiasikei, kaneibü mailem shangabü ngühlangei kün aicheküman takliama.

⁸Aishanga kan Bunyuboua kaangkhühtham loa longaje salang thüng yingakei.

⁹Kan nyena hao junga kün olinbü pendou shanga künei Mühghaü ailai ong penkosouko sangenla?

¹⁰Khoei kaneibü thenyek hapenla, hoba kaneibü mailema asoualebü soutila shanga, künei change nangnak aeibou haüko welauda.

¹¹Seneibü Mühghaü hoba Bou hoba seneibü Bunyubou Jisu Khristaei kün kan jungto leishima.

¹²Künei kan to sanoubü tegü, kan jenabou si jenabou hoba müt pendou to apsileko haabü- yaangbüei sanouyola shanga Bunyubouei kan to thuiashi.

¹³Seneibü Bunyubou Jisu, jembü saopobü shuong pendou yoa loujinei, seneibü Mühghaü hoba Bou thedanga kan nali atheko hoba saopotham kiteilabü lele haoei kaneibü maangpon hau kitiashi.