Read Chang Naga 1 THESALONIKA 4 Bible Online

1 THESALONIKA 4 - Chang Naga bible

1 THESALONIKA 4

¹Thonla jaisinasi shuong, khüpjambü Khristan shuong tegü künei kan to toukei denche phela hoba sulajala kia. Kanei kün ka ailai Mühghaü maang- hailabü lele paila ditletkei, hoba kan tokei laonei paida, khonei kan athakko aei haakoyaangko paila shanga thungeijangeida.

²Aishanga Bunyubou Jisu danko künei kan la ai ngühkhüm kukei, kanei ngekei.

³Mühghaüei kan ka mangsühbü kho saopobü: kan asangalanbü ka bangenashi;

⁴kan mütpem wekoei jembü yak soumo kuko hoba hinseibüa phoenko jembü mang thepetla ngejan.

⁵Mühghaü angebü Küksithang shuong tegü kanei phedüh maangdüha akhonyojan.

⁶Ho shangabü aoeikei jembü jaisina akhüpettijan hoba shedbü ajungeijan; aishanga künei shangied kan maangsangtibü hoba aukabü kubü tegü khübü pendoua phoklambou kho Bunyubou ki.

⁷Aishanga Mühghaüei sen ihinseibü shanga aying lausikei saopobüa ngakei.

⁸Hibü aoei inletda haoei müt inletda aying lausikei Mühghaü aoei kan la Soushou Saopobü kuda, hao inletda.

⁹Lausikei jaisina sanouyobü shangabü kan jungto dola akhamda, aishanga jenabou si jenabou sanouyola Mühghaüei kan la lena.

¹⁰Hobaje maimaitham kanei Makedoniaa kibü jaisina pendou to kho jungeida. Jaisinasi shuong, khüto limankei haula shanga künei kan to sudajada.

¹¹Hobaje sangsembü langkei kila shanga, langkei kümsileia hautak nepla hoba künei shaangla lenbü tegü kaneibü ikei kümlaleila shanga kaneibü nyekchüh phoashi.

¹²Kholonga kanei tangkabü ka soumo haplabü hoba shakei alelabü hoba aotokei anonglabü.

¹³Jaisinasi shuong, maanglem akibü songalebü dan tegü, kanei mang ühaapla shanga, künei kan la haibü shuong shangabü angeko kitimang asühda.

¹⁴Aishanga Jisu haikei hoba langngaikei dogo senei mailemsije, khei yingalonga Jisua haibü shuongkei Mühghaüei hao yoa leingaibalabü.

¹⁵Aishanga Bunyubou loubüa sühko sen lang kibü shuong haibü shuong to ai aoakei ashaanglabü, dogo künei Bunyubou ngühei kan to lenda.

¹⁶Aishanga uihinko, yaangenbü khuthük hangangbü langhei, hoba Mühghaü teklaangei, Bunyubou jembü lolo khuthük ka louyenlabü, hoba Khristaa haibü shuong shaang langngailabü.

¹⁷Kheijinei sen lang kibü, jouan kibü shuong, mühloma Bunyubou to haüyola haoen yoa liko sangmeia hipjung anglabü. Hobaje kho tegü sen ponpendou Bunyubou yoa kilabü.

¹⁸Hibü habü ngühei kan jenabou si jenabou maang suyoashi.