Read Chang Naga 1 THESALONIKA 5 Bible Online

1 THESALONIKA 5 - Chang Naga bible

1 THESALONIKA 5

¹Lausikei jaisinasi shuong, jihsiphai si chalou shangabü kan jungto dola akhamda.

²Aishanga nangnak kokbü loubü tegü Bunyubou Chalou loulabü dogo kanei chongchingko ngeakei.

³Ladang haoenei, “Hakso hoba püetbü” dogo laulaje, kheijinei yaksa na hapjinei khonkubü tegü, hakde haoen jungto maubü louda; hoba haoen ai aoakei asatenlabü.

⁴Lausikei jaisinasi shuong, kokbüei tegü kho Chalouei koklanglabü lele kan nakthüha aki.

⁵Aishanga kan pendou ngesakbü shousi hoba chalou shousi shuong. Sen nangnak ayingsi nakthüheibü aying.

⁶Hibü lubü shuong tegü sen teyepkho. Lausikei sen pianleman hoba maangsangko kikho.

⁷Aishanga yepbü shuong nangnak yepda hoba ihei jaakbü shuong nangnak jaakda;

⁸lausikei sen chaloueibü shuong pianleman kikho. Senei khükhuom la mailem si sanou lekho hoba khun la khümenbü maanglem hankho.

⁹Aishanga Mühghaüei sen haoeibü maangshata yola tetenkei aying lausikei seneibü Bunyubou Jisu Khrista danko khümenbü pailetla pienkei

¹⁰Sen pian kiasikei ayingsi yepan kiasikei sen hao yoa liko lang kila shanga hao sen shanga haikukei.

¹¹Hibü kanei kümbo kibü tegü, jenabouei jenabou thungeijangeiyoashi hoba hau kitiashi.

¹²Lausikei, jaisinasi shuong, kan yoa aoyouei kümda, hoba maangsangtida. haoen ngeashi.

¹³Haoen to haoeneibü kümsilei shangabü sanoua aicheküman thüka soumo hatla shanga künei kan to sudajada. Kan yoa jikophaiko kishi.

¹⁴Jaisinasi shuong, ayinglamto paibü shuong maangsangtiashi, maang tuongbü shuong thungeijangeiashi, hau akibü shuong to thuiashi hoba pendou ae lounyu natenashi dogo künei kan to thungeijangeida.

¹⁵Aoeikei amaibü jeila amaibü akungaila maangsangashi; lausikei jenabou aenei hoba pendou aenei, ai maibü kho ponpen lamashi.

¹⁶Ponpen olinashi,

¹⁷athakko welauashi.

¹⁸Ajanjan pendoua nyensang kuashi. Aieilausi kan shanga Khrista Jisua ho Mühghaüei maangangbü ki.

¹⁹Soushou kho tenyetti,

²⁰songlen ngüh to tenyiku;

²¹pendou takteiashi hoba maibou hatlepashi;

²²amaibü phang pendou ka bangenashi.

²³Hakso kubou Mühghaüei kan khümbo saüenkushi. Seneibü Bunyubou Jisu Khrista loujinei haoei kan soushou hoba langkei hoba mang shedbü akiko khümenan phokushi.

²⁴Aoei kan ngada hao maanglemenbü, hoba haoei kho kümlabü.

²⁵Jaisinasi shuong, kün shanga welaukuashi.

²⁶Saopobü sembung shepbüei pendou la salem kuashi.

²⁷Ho le jaisinasi shuong pendou thedanga weashi dogo ngei Bunyubou nyena kan to kaangko lenda.

²⁸Seneibü Bunyubou Jisu Khrista onou kan yoa kishi.