Read Chang Naga JOSHUA 1 Bible Online

JOSHUA 1 - Chang Naga bible

JOSHUA 1

¹Tou ho tegü loukei, BUNYUBOU khangenbou Mosa haian phaia Mosa khangenbou Naneibü shou Joshua to BUNYUBOUei laukei,

²“Ngo khangenbou Mosa haia, hibü tou meimeiashi, ngei haoen khei Israel shousi la kubü kaodak khüto no hoba habü mütli pendou Jordan to hauashi.

³Ngei Mosa to lenbü tegü, kaibü you yaüetlangshang pendou kho kan la kua.

⁴Yamlamang hoba ho Lebanon ka shumang yaangbü Eufrates shumang sühko Hitbü kaodak pendou hoba chanep shumang yaangbü sühko kaibü leilang kilabü.

⁵Kaibü salang sünga no khulimbo lola thükbü müt cheongkei akilabü, ngo Mosa yoa yobü tegü ka yoa yolabü, ngei ka la athük alotilabü, ayingsi no ainletlabü.

⁶Hau kiashi, hoba maang kaangashi, aieilausi ngei haoeneibü pisibou la kula shanga laobou thekulankukei kho kaodak nyi habü mütli la phet phantilabü.

⁷Ngo khangenbou Mosaei ka la sakkubü ngühkhüm pendou jungeiko kümlabü lele hau kiashi hoba maang ong aeibou kaang- ashi, no lato ong haulaje hausikei, thük haplabü lele ho ngühkhüm ka mae ayingsi nanae tesepei.

⁸Ho ngühkhüm le ho kaibü sembung ka abanglabü, lausikei khünei doan kibü pendou paplepbo jungeienlabü lele nyi change nangnak kho daman chühlabü, khoei nyi kaibü langkei lam naang mailabü hoba nyi thük maibü haplabü.

⁹Ngei ka la asakku sai? Hau kiashi hoba maang kaangashi; hatko deki ayingsi maang hanko teyei aishanga no lato ong haulaje hausikei BUNYUBOU kaibü Mühghaü ka yoa kia.”

¹⁰Kheijinei Joshuaei mütli leiyeibü shuong la sakkuko laukei,

¹¹“Shaishang peko hauan mütshuong la ngühkhüm kuko lauashi, ‘Kan lolo shausiyung lamleashi, aishanga BUNYUBOU kaneibü Mühghaüei kan la kubü kaodak kho lela chalou semnyet kanglanga kan ho Jordan danjung haulabü.’ ”

¹²Hobaje Reubenbü hoba Gadbü hoba Manasse chung jamde to laukei,

¹³“BUNYUBOU khangenbou Mosaei kan to, ‘BUNYUBOUei kan la hakso kuda, hoba ho kaodak kan la kulabü dogo sakkuko laubü ngüh damenashi.’

¹⁴Jordan thi aenei Mosaei kan la kubü kaodak khünei kaneibü yaksi, kaneibü nashou hanbü shuong hoba kaneibü samkeisamuk kilabü;

¹⁵lausikei BUNYUBOUei kan la kubü tegü kaneibü jailanala hakso aku shongko hoba BUNYUBOU kaneibü Mühghaüei haoen la kubü kaodak kho haoeneibü la ale shongko sekbülakbü pendou kaneibü jaisina thedanga insi aubu jungan haulabü, hoba haoen to thuilabü; kheijinei ong BUNYUBOU khangenbou Mosaei Jordan danan chaang aenei kibü kan la kubü kaonyek khüto sepeilabü hoba kho lelabü.”

¹⁶Hobaje haoenei Joshua to laukei, “Nyi kün la sakkubü pendou künei kümlabü hoba nyi kün lae to ong hautilaje kün haulabü.

¹⁷Künei Mosa to pendou ngüha lebü tegü ka to künei ngüha lelabü; Mosa to yobü tegü ka yoa ong BUNYUBOU Mühghaü yoan kishi:

¹⁸Hobaje aoei ong kaibü ngühkhüm khulimbo meimeilaje hoba nyi sakkubü pendou ngüha alelaje hao haitiashi, hau kiashi hoba maang kaangko kishi.”