Read Chang Naga JOSHUA 10 Bible Online

JOSHUA 10 - Chang Naga bible

JOSHUA 10

¹Tou ho longkei, ladang Jerusalembü Choba Adoni- zedekei lai Joshuaei Jerikho hoba kho Choba to kümbü tegü haoei Ai hoba kho Choba to kümbo Ai shian apbei hoba kho khümbo mautikei, hoba lai Gibeona kibü shuong Israelbü yoa sangmai kümbei hoba haoen yoa kibü ditkei,

²kheijinei haoen aeibou hatkei, aieilausi Gibeon kho Chobaeibü sangnyu yoa che yingsije, sangnyu yaangbü che kikei, hoba kho Ai to yaangbou hoba khünei kibü müt pendou laakbü hongbü kikei.

³Hibü Jerusalem kabü Choba Adonizedekei Hebronbü Choba Hoham, Jarmuthbü Choba Piram to hoba Lakhishbü Choba Jafia to hoba Eglonbü Choba Debie to sühko laukei:

⁴“Kü yoa yoshi hoba kü to thuikai, hoba senei Gibeon mautikho, aishanga haoei Joshua hoba Israelbü to sangmai küma.”

⁵Hibü Amor Choba ngao, Jerusalem, Hebron Choba, Jarmuth Choba, Lakhish Choba, Eglon Choba, haoen pendou liko yoshaikei, hoba haoen hoba haoeneibü sepai pendou yoan Gibeon khulimbo takshatkei, hoba kho khulimbo wapyokei.

⁶Hobaje Gibeonbü shuongei Gilgal shaishang khüto Joshua jungto you sühko louan laukei, “Kaibü sambü shuong ka kaibü ik senetan tepho, kün jungto tongde kaiya hoba kün püetashi, hoba kün to thuikai, aishanga shongh kaodaka kibü Amorbü Choba kün khulimbo liko yoshaiakei.”

⁷Hibü Joshuaei hao hoba wapyobü müt pendou hoba lakjaibü pendou hao yoa Gilgal ka angkei.

⁸BUNYUBOUei Joshua to laukei, “No haoen to tehüt, aishanga ngei kaibü ika haoen khümbo kuan apa; haoen yoa ka thea loenlabü müt che ongkei aki.”

⁹Hibü Joshua mangde ong haoen jungto loukei, aishanga langyang sünga hao Gilgal ka haukei.

¹⁰Hobaje BUNYUBOUei Israelbü thedangka haoen shian apbei, hoba Gibeona haoei haoen juong haitikei, hoba Beth Horon lam to angbü sühko shijung haukei, Azeka hoba Makkeda sühko haoen haitikei.

¹¹Hobaje ho longkei, Israelbü thedang ka haoen satjung hauan Beth Horon to yanko kijinei Azekaa haoen to BUNYUBOUei senlaang yaangbü müh ka yantikei hoba haoen haikei. Israel shousi shuongei inei haitibü toje senlaangei haibü juongbou kikei.

¹²BUNYUBOUei Israelbü la Amorbü khümbo kubü chaloua Joshuaei Israel shousi shuong thedanga BUNYUBOU to joyoko laukei, “Chanyu, no Gibeon thüka atopeiko loashi; hoba litnyu, no Aijalon pholia atopeiko loashi.”

¹³Hobaje chanyuei atopeiko lokei hoba litnyuei haiyeikei. Khei phang khoei haoeneibü dangbou labou to phok alamshongko. Ho Jashar lea doan aki lo? Hobaje chanyu kho mühjia haiyeiko, hoba chaseko anepbo haiteikei.

¹⁴Hobaje BUNYUBOUei müt che to ngüha lebü tegü shangied ayingsi kho phaia kho chalou tegü akitei; aishanga BUNYUBOUei Israel shanga wapyokei.

¹⁵Hobaje Joshua hoba Israelbü pendou hao yoa Gilgala shaishang to longkei.

¹⁶Hobaje khübü Choba ngao satkei, hoba Makkedaa haoen lolo laangpoba hukei.

¹⁷Hobaje Joshua to ho tegü laukei, “Choba ngao kho Makkedaa laangpoba huan kia.”

¹⁸Hobaje Joshuaei laukei, “Laangpob koukhüna laang yaangbü baman jinkushi, hoba haoen lomla kho nyangko müt apyoashi;

¹⁹lausikei kan khünei haiko teki, kaneibü labou shuong shijung hauashi, hoba haoen yoa phaibou thonbou sühko haitiashi, hoba haoen haoeneibü sangnyu shuong to tütti; aishanga BUNYUBOU kaneibü Mühghaüei haoen kaneibü ika kua.”

²⁰Hobaje haoen amauti shongko hoba haoen yoa satenan kibü shuong khümenan kibü sangnyu khüto ütshongko Joshua hoba Israel shousi shuongei haoen juong haitibü thonbü to loukei.

²¹Kheijinei Makkedaa shaishang khüto Joshua jungto sangmaia sepeinyu longeikei, aoeikei Israel shousi shuong at ongkei khulimbo lishang atopei.

²²Kheijinei Joshuaei laukei, “Laangpob koukhün ipashi, hoba laangpob ka khübü Choba ngao kü jungto leiba.”

²³Hobaje laubü tegü haoenei kümbei, hoba khübü Choba ngao Jerusalem Choba, Hebron Choba, Jarmuth Choba, Lakhish Choba hoba Eglon Choba laangpob ka leiyenan hao jungto leian loukei.

²⁴Hobaje ladang khübü Choba haoenei Joshua jungto leian loukei, Joshuaei kheijinei Israel mütshuong ngakei, hoba hao yoa haubü lakjaibü thüka konglebü shuong to haoei laukei, “Nyangko kaiya, khübü Choba shuongeibü ngüma kanei kaneibü you phoashi;” hoba haoen nyangko loukei hoba haoeneibü you haoeneibü ngüma phokei.

²⁵Hobaje Joshuaei haoen to laukei, “Tehüt ayingsi maang tehün, hau kiashi, hoba maang kaangashi; aishanga kaneibü dangbou shuong aoyou khulimbo kan wapyolaje BUNYUBOUei pendou kho khei kümlabü.”

²⁶Hobaje longche kian, Joshuaei haoen khonkutikei, hoba haoen haitikei, hoba haoen bunyu ngaoa saükei, hoba chasem sühko haoen bunyua saüan phokei.

²⁷Hobaje chanyu neplamto Joshuaei ngühkhüm kukei hoba haoenei bunyu ka haoen sungletkei hoba ainei haoen lolo hukei kho laangpob khüna jinan phokukei hoba laangpob koukhüna laang yaangbüei küpan phokei hoba kho tat sühko kia.

²⁸Hobaje khünyet kho Joshuaei Makkeda lekei, hoba kho sangnyu hoba khünei kibü Choba inei haitikei; haoei khübü kho hoba khünei kibü müt pendou aokei ajoutiko lemailela mautikei; hoba haoei Jerikho Choba to jungeibü tegü Makkedabü tokei kümbei.

²⁹Hobaje Joshua hoba Israelbü pendou hao yoa Makkeda ka meimeian Libna sühkei, hoba Libna khulimbo wapyokei.

³⁰Hobaje BUNYUBOUei khokei hoba khünei kibü Choba Israelbü ika khümbo kukei, hoba haoei sangnyu hoba khünei kibü müt pendou inei haitikei, haoenei khünei aokei jouan aphoku; haoei Jerikho Choba ong jouan phokukei, haoei Jerikho Choba to jungeibü tegü kho Choba to kümbei.

³¹Hobaje Joshua hoba Israelbü pendou hao yoa Libna ka meimeian Lakhish sühkei hoba kho khulimbo wapyola lamlekei.

³²Hobaje BUNYUBOUei Israelbü ika Lakhish khümbo kukei hoba nyibounyet haoei kho lekei, hoba Libna to kümbü pendou tegü haoei khünei kibü müt pendou inei mautikei.

³³Kheijinei Gezer Choba Horamei Lakhish to thuila loukei, lausikei müt aokei ajoutiko Joshuaei hao hoba haoen müt shuong shemtikei.

³⁴Hobaje Joshua hoba Israelbü pendou hao yoa Lakhish ka kukjung Eglon sühkei hoba haoenei kho khulimbo wapyola lamlekei;

³⁵Hobaje kaonyek kho haoenei lekei, inei kho leilukukei, hoba khünei kibü müt pendou haoei mautikei, haoei Lakhish to kümbü tegütham khünei kibü müt pendou lemailela mautikei.

³⁶Hobaje Joshua hoba Israelbü pendou hao yoa Eglon ka Hebron to angkei hoba haoenei kho khulimbo wapyokei.

³⁷Hobaje haoenei kho lekei, hoba haoei Eglon to kümbü pendou phatko khünei kibü Choba hoba kho sangnyu pendou haoei aokei ajoutiko inei mautikei; tokei haoei kho hoba khünei kibü müt pendou lemailela mautikei.

³⁸Hobaje Joshua hoba Israelbü pendou hao yoa Debir to sepeijung longaikei, hoba kho khulimbo wapyokei.

³⁹Haoenei khünei kibü Choba hoba kho sangnyu pendou haoei lekei; haoenei khübü kho inei mautikei, hoba aokei ajoutiko khünei kibü müt pendou lemailela mautikei. Hobaje haoenei Libna si khoeibü Choba to, hoba Hebron to kümbü tegütham haoenei Debir to jungeikei.

⁴⁰Kho tegü kaonyek pendou shongh kaodak, hoba chaangbou phei hoba pholi kaodak, shimpük kaodak, hoba khübü Choba pendou Joshuaei shian apbei. Israel Mühghaü BUNYUBOUei sakkubü tegü haoei ai joutian aphoku, lausikei lang kibü pendou lemailela mautikei.

⁴¹Hobaje Joshuaei Kadesh Barnea ka Gaza sühko hoba Goshen ka Gibeon sühko haoen pendou mautikei.

⁴²Hobaje khübü Choba pendou hoba haoeneibü kaodak Joshuaei jih chenei ong lekei, aieilausi Israel Mühghaü BUNYUBOUei Israel shanga wapyokei.

⁴³Hobaje Joshua hoba Israelbü pendou hao yoa Gilgal shaishang to longeikei.