Read Chang Naga JOSHUA 11 Bible Online

JOSHUA 11 - Chang Naga bible

JOSHUA 11

¹Hobaje ladang Hazorbü Choba Jabinei kho shangabü ditkei, Madonbü Choba Jobab hoba Shimron si Aksafbü Choba

²hoba chanepae kibü shongh kaodaka kibü Choba shuong hoba Khinerot chaangbou phei Arabaa kibü hoba kho pholia kibü hoba chanep Dor shonghkhua kibü,

³hoba chaangbou hoba chanepa kibü Kananbü hoba Perizbü hoba shongh kaodaka kibü Hermon, phanga Hivbü jungto haoei ngühlang hautikei.

⁴Hobaje haoen yoa sepai tan tan müt juong khei yungkoa phetsen tegü koli hoba kailong juong yoan haukei,

⁵hoba khübü Choba pendou liko haüyokei hoba haoenei louan Israelbü to wapyola Merom deia shaikei.

⁶Hobaje BUNYUBOUei Joshua to laukei, “Haoen loubü shanga tehüt, aishanga ngiet ho jiha Israelbü thedanga pendou haitilabü lele ngei haoen khümbo kulabü; nyi haoeneibü koli shuong you peipeileilei aptikulabü, haoeneibü tongjin kailong shuong wanei jikan apbulabü.”

⁷Hibü Joshua hoba hao yoa wapyobü mütshuong pendou hao yoa Merom dei nyangko haoen khulimbo mangde loukei, hoba haoen to ik shatkei.

⁸Hobaje BUNYUBOUei haoen Israelbü ik to khümbo kukei, hoba haoenei haoen shemtikei, hoba haoen Sidon sangnyu hoba Misrefot Maim hoba Mizpa chaangbou pholi sühko haoen shijung haukei; haoenei aokei jouan aphoku shongko haoen haitikei.

⁹Hobaje BUNYUBOUei laubü tegü Joshuaei haoen to jungeikei; haoei haoeneibü koli peipeileilei aptikukei, hoba haoeneibü kailong shuong wana jikan apbukei.

¹⁰Hobaje kho chaloua Joshua sepeinyu louan Hazor lekei hoba khükabü Choba inei haitikei; aishanga kho thedangto khübü Choba sangnyu pendou thüka Hazor bunyu yeikei.

¹¹Hobaje khünei kibü langkeibü pendou hoba Choba pendou Joshuaei haitikei.

¹²Hobaje BUNYUBOU khangenbou Mosaei sakkubü tegü haoei haoen lemailela inei mautikei; hoba khünei langkei che ongkei jouan aphoku, haoei wanei jikan apbukei.

¹³Lausikei Joshuaei jikan apbubü Hazor to liman shongha sangnyua kibü sangnyu shuongje Israelbüei jikan üpbu.

¹⁴Hobaje khübü sangnyua apsilebü peisilei pendou hoba samkeisamuk Israel shousi shuongei soletbü peisilei tegü haoen shanga künkei, lausikei haoen aokei langkei aphoku, pendou inei shemtikei.

¹⁵BUNYUBOUei hao khangenbou Mosa la sakkukei hoba Joshuaei kho tegü kümbei; BUNYUBOUei Mosa la sakkubü pendou haoei akümbo üpyo.

¹⁶Hibü kaodak pendou, shongh kaodak hoba chaangbou phei pendou hoba Goshen kaodak pendou pholi kaodak hoba Araba kaodak hoba Israelbü shongh hoba pholi kaonyek pendou Joshuaei lekei;

¹⁷khei Halak shongh ka louyenbü Seir sühko tokei Hermon shongh phang Lebanon pholia Baalgad sühko hoba khübü Choba pendou haoei lekei, hoba haoen to ngümbei hoba haoen haitikei.

¹⁸Khübü Choba pendou to Joshuaei po lounyu jakkei.

¹⁹Gibeona kibü Hivbü to liman sangnyu cheei ongkei sangmai aküm; pendou wapyoa thükkei.

²⁰Aishanga BUNYUBOUei Mosa la sakkubü tegü haoen to üeisanou akaakku; lausikei haoei haoen lemailela shemtilabü lele lasona Israelbü khulimbo loula BUNYUBOUei haoen maangpon yaangtikei.

²¹Hobaje kho jiha Joshua loukei, hoba shongh kaodak pendou ka Hebron ka, Debir ka, Arab ka, Jihuda shongh kaodak pendou ka, hoba Israel shongh kaodak pendou ka Joshuaei Anakim mautikei, haoeneibü sangnyu shuong yoa liko haoen lemailela mautikei.

²²Israel shousi shuong kaonyeka Anakimbü aokei jouan akitei, khei Gaza, Gath hoba Ashdoda ong at jouan kiteikei.

²³Kho tegü, BUNYUBOUei Mosa to joyobü pendou tegütham, Joshuaei kaonyek pendou lekei, hoba haoen phang janbü hima Joshuaei Israelbü la kaonyek kho phet phantikei. Hobaje kaonyek wapyo ka hakso hapbei.