Read Chang Naga JOSHUA 13 Bible Online

JOSHUA 13 - Chang Naga bible

JOSHUA 13

¹Tou Joshua aeibou baushi sinan kikei; hoba BUNYUBOUei hao to laukei, “No aeibou baushi sinsi dogokei toukei kaonyek juong sunglabü jouakei.

²Jouan kibü kaonyek kho ho ki: Filistia hoba Geshurbü kaonyek pendou;

³Ijep thedanga kibü Shihor shumang ka Kananbü dogo weeibü chanep pheiae Ekron leilang sühko; Filistiabü bunyu ngao, Gazabü, Ashdodbü, Ashkelonbü, Gatbü hoba Ekronbü; toukei chaangbou pheia kibü Avimbü yoan;

⁴Kananbüeibü kaonyek pendou hoba Sidonbüeibü Meara, Amorbü leilang Ara Afek sühko;

⁵Hobaje chaangbou ae Gebal si Lebanonbü kaonyek Harmon phang Baalgad ka Lebo Hamat asühshongko;

⁶shongh müt kibü kaonyek pendou Lebanon ka Misrepoth Maim sühko, khei Sidonbü pendou yoan; Israelbü thedang ka ngei haoen shian aplabü; ngei ka la sakkubü tegü nyi kho ong Israelbü la phetphan shanga tükde janshi.

⁷Hibü tou phang gü hoba Manasse phang jamde la kho kaonyek ho jankukei.”

⁸Jordan shumangeibü chaang aephei danan hao yoa Reubenbü si Gadbüei lulueibü phetphan la Mosaei kubü hapbei, laobou BUNYUBOU khangenbou Mosaei kukei.

⁹Arnon pholi jenyua kibü sangnyu yoa hoba Medeba kao pholi pendou Dibon sühko;

¹⁰hoba Amorbü Choba Sihon, aoei Heshbon ka Ammon shousi shuong leilang sühko songdakkei, haoeibü sangnyu pendou,

¹¹hoba Gilead hoba Geshur si Maakabü leilang hoba Hermon shongh khümbo Bashan pendou Saleka sühko;

¹²hoba Bashana Og Choba, aoei Ashtarot hoba Edrei (Refaima jouan apyobü) a songdakkei; haoeibü sangle pendoua haabü tegü, aieilausi Mosaei khübü kho thükenkei, hoba haoen shian apbei.

¹³Khei yingasikei Israel shousi shuongei Geshur si Maakabü shian asatti hoba tat sühko Geshur hoba Maakat Israel yoa kia.

¹⁴Levi phang la ong haoei phetphan aku, haoei haoen la lenbü tegü Israel Mühghaü BUNYUBOU wanei kümbü lembü shuong kho haoeibü phet yinglabü.

¹⁵Hobaje Mosaei haoen chemdang thüng Reubeneibü shousi chempen la kukei.

¹⁶Hobaje haoeibü leilang Arnon pholi thonbüa kibü Aoer ka yomang jenyua kibü sangnyu Medeba kao yomang pendou;

¹⁷Heshbon hoba kho yo kaonyeka kibü sangnyu pendou, Dibon hoba Bamoth Baal Beth Baalmeon;

¹⁸Jahaz, hoba Kedemot hoba Mefaat;

¹⁹hoba Keriathaim, hoba Sibma hoba yomanga shongh tokbü Zereth- Shahar;

²⁰hoba Beth-Peor hoba Pisga shimpük hoba Beth Jeshimot;

²¹hoba pholi kaodak sangnyu pendou hoba Amorbü Choba Sihon sangle pendou aoei Heshbona songdakkei hoba aoei Midianbü konglebou Evi, Rekem, Zur, Hur, hoba Reba kaonyeka kibü Sihon phanga bunyu shuong yoan shian apbei.

²²Hobaje haitibü shuong yoa jouan kibü Beoreibü shou Balaam thulenbou Israel shousi shuongei inei haitikei.

²³Hobaje Reuben shousi shuong leilang Jordan hoba kho kommanga kikei. Khünei kibü sang hoba sangnyu shuong kho chemdang thüng Reubenbü shousi shuongei phetphanbü kikei.

²⁴Hobaje Gadeibü shousi shuong, Gad phang la Mosaei haoen chemdang thüng kukei.

²⁵Hobaje haoeneibü leilang Jazer Gilead sangnyu pendou hoba Ammonbü shousi shuong kaonyek jamde Rabbaa kibü Aroer sühko;

²⁶hoba Heshbon ka Ramath-Mizpa sühko, hoba Betonim hoba Mahanaim ka Debir leilang sühko;

²⁷hoba pholi kaodaka Beth Haram hoba Bethnimra hoba Sukkot hoba Zafon, hoba Heshbonbü Choba Sihin sangnyu joubü Jordan hoba kho kaijembo chaang naphei Jordan danjung hauan Khineret yungnyu thon sühko kikei.

²⁸Khünei kibü sang hoba sangnyu shuong kho haoen chemdang thüng Gadbü shousi shuongei phetphanbü kikei.

²⁹Hobaje Mosaei Manasse phang jamde la phetphan kukei; kho haoen phang jamde shousi shuong shanga haoen chemdang thüng ong kikei.

³⁰Hobaje haoeneibü leilang Mahanaim ka Bashanbü Choba Og sangle pendou hoba Bashana kibü Jair sangnyu saosem, khübü pendou;

³¹hoba Gilead pheiche, Choba Bashan sangle Ashtarot hoba Edrei sangnyu shuong Manasseeibü shou Makhireibü mütli pheiche shanga haoen chemdang thüng kikei.

³²Jordan danan Jerikhoeibü chaangbou ae Moab pholia Mosaei jankubü phetphanbü shuong habü ho ki.

³³Lausikei Mosaei Levi phang la phetphan aku; haoei haoen to lenbü tegü BUNYUBOU Israel Mühghaü haoeneibü phet ki.